नदीजन्य पदार्थको ढुवानीको माग राख्दै नगरपालिकाको कार्यालय घेराउ- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

नदीजन्य पदार्थको ढुवानीको माग राख्दै नगरपालिकाको कार्यालय घेराउ

शिव पुरी

रौतहट — नदीजन्य पदार्थको ढुवानी गर्न दिनुपर्ने माग राख्दै आइतबार यहाँका ट्याक्टर व्यवसायीहरुले चन्द्रपुर नगरपालिकाको कार्यालय घेराउ गरेका छन् ।

उनीहरुले नगरपालिकाको मुख्य गेटमा ट्याक्टर राखेर मेयरको गाडी समेत भित्र पस्‍न दिएनन् । यस क्षेत्रमा रहेका ५०/६० वटा ट्याक्टर मजदुरहरुले बिहान १० बजेदेखि नै नगरपालिकाको कार्यालय घरेर बसेका हुन् ।

वर्षाको समयमा नदीजन्य बस्तुको ओसार पसारमा रोक लगाए पनि असोज १ गतेबाट खुला नभएपछि व्यवासयीहरु आन्दोलिन भएका हुन् । चन्द्रपुर नगरपालीकाले समयमा नै नदीजन्य बस्तुको ठेक्का नलगाएकाले खोलाबाट बालुवा, गिटि निकासी हुन पाएको छैन ।नगरपालिकाले असोज १ गतेबाट नदीबाट बालुवा,गिटि निकाल्न प्रवेश दिने भनिए पनि व्यवस्थापन गर्न नसकेपछि व्यवसायीहरु घेराउ गर्न पुगेका हुन् ।

ट्याक्टर व्यवसायी शंकर रिजालले असोज १ गतेबाट खोलामा प्रवेश गर्न दिइने नियम भए पनि नगरपालिकाले रोक लगाएको सुनाए । ‘समयमा ठेक्का लगाउनुस भन्दा वास्ता नगर्ने । अहिले आएर अझै ४/५ दिन पर्खनुस भनेर सम्झाउनु खोज्ने,’उनले भने,‘नगरपालिकाले नियम अनुसार समयमा काम गर्न नसके पछि समस्या आएको हो । हामी ट्याक्टर व्यवसायीहरु धेरै मारमा परेका छौं ।’ आइतबार बिहान चाँदी नदीमा बालुवा लिन गएको चारवटा ट्याक्टर इलाका प्रहरी कार्यालयले नियन्त्रणमा लिएको थियो ।

लामो समय लकडाउनको मारमा परेको बेला निर्माण प्रायोजनका लागि नदीजन्य बस्तु ढुवानी गर्न नदीएको भन्दै ट्याक्टर मजदुरहरु मेयर रामचन्द्र चौधरी र प्रमुख प्रशासकिय अधिकृत कृष्णप्रसाद सिग्देल प्रति आक्रोसित छन् ।


मेयर चौधरीले छलफलबाट समस्याको समाधान निकाल्ने बताए ।

प्रकाशित : आश्विन ४, २०७७ १५:३६
प्रतिक्रिया
पठाउनुहोस्

चीनको शासनशैली अनुकरणीय : राजदूत पाण्डे

लक्ष्मी लम्साल

बेइजिङ — चीनका लागि नेपाली राजदूत महेन्द्रबहादुर पाण्डेले वर्तमान चीनको शासन प्रणाली अनुकरणीय रहेको बताएका छन् ।

सन् २०१२ मा चिनियाँ कम्युनिष्ट पार्टीको १८औं जनकांग्रेसले खुलापन, राजनीतिक प्रगति, इकोलोजिकल (पारस्थितिक) संरक्षण, आर्थिक विकासबाट सामाजिक रूपान्तरणको कुरा उठाएको भन्दै राजदूत पाण्डेले राष्ट्रपति सी चिनफिङको शासनका पुस्तकहरूमा पनि यी कुरा उल्लेख रहेको चर्चा गरे ।

शनिबार बेइजिङस्थित नेपाली दूतावासमा भेला भएका नेपाली समुदायमाझ छैठौं संविधान एवं राष्ट्रिय दिवसको सन्दर्भमा उनले भने, ‘हरेक समाजको छुट्टै अर्थतन्त्र, छुट्टै संस्कृति, छुट्टै मूल्य मान्यता, छुट्टै सामाजिक संरचना हुने भएकाले त्यही हिसाबले जनतालाई बढी भन्दा बढी प्रजातान्त्रिक अधिकारको अभ्यास गर्न सक्ने बनाउनका निम्ति हामीले पनि सोच्नुपर्छ कि भन्ने मलाई लाग्छ।’

नेपालमा समयानुकूल संविधान परिमार्जन गर्दै अगाडि बढ्न सक्नुपर्ने विचार राख्दै राजदूत पाण्डेले ‘ग्रासरूट’को मान्छेलाई कसरी परिचालन गरेर राज्यशक्तिको अभ्यास गर्न सकिन्छ, कसरी छलफल र चुनावी प्रक्रियाबाट हरेकको सहभागितामार्फत् जनताका इच्छा, आवश्यकता, दृष्टिकोण बुझ्न सकिन्छ र समग्र जनता परिचालनको तरीका मार्फत् कुनै न कुनै रूपले राज्यशक्तिको अभ्यास गराउन सकिन्छ र समाजवादसम्म पुग्‍न सकिन्छ भन्ने कुरा चीनको शासन शैलीबाट बुझ्न सकिने बताए ।

नेपाल र चीनबीचको सम्बन्ध सुरूमा धार्मिक गुरूहरूको आदानप्रदान, त्यसपछि व्यापार, त्यसपछि कलाकारहरूको योगदान र हाल राजनीतिक वैचारिक आदानप्रदानले विकसित हुँदै गएको उनले औंल्याए । नेपाल र चीन सम्बन्ध पारस्परिक हित, समानता, समझदारी र सम्मानमा आधारित भएर चलिरहेको बताउँदै उनले भुइँचालो जाँदा चीनको निःस्वार्थ सहयोग जस्तै नेपालले पनि चीनमा कोरोना देखिँदा गच्छेअनुसार १ लाख मास्क पठाएको स्मरण गरे । हाल चीनले गरेको मेडिकल सामग्री सहायता नेपाल पठाउन दूतावासले सहजीकरण गरिरहेको उनले सुनाए ।

चिनियाँ राष्ट्रपति सी चिनफिङको नेपाल भ्रमण र नेपालका राष्ट्रपति, प्रधानमन्त्री लगायतबाट भएको चीन भ्रमणले आपसी सम्बन्ध अझै प्रगाढ हुँदै गएको भन्दै उनले कूटनीतिक संस्थाहरूको स्तरोन्नति गर्न लागिएको बताए । नेपाल सरकारले चीन, भारत र अमेरिकाका राजदूतावासमा मन्त्रीस्तरको हैसियतमा कूटनीतिज्ञ पठाएकाले त्यही हिसाबले चीनस्थित नेपाली दूतावासलाई अघि बढाउनुपर्ने, सबैले असल अनुशासन कायम गर्न सचेत हुनुपर्ने पनि उनको ठहर थियो ।

अर्को प्रसंगमा उनले नेपालमा राणाशासनदेखि गणतान्त्रिक आन्दोलनसम्म आइपुग्दा प्राप्त भएका उपलब्धीहरू कार्यान्वयन तथा शासन पद्धित उचित तरिकाले हुन नसकेमा परिणाम हात नलाग्ने बताए । उनले नेपलामा मौलिक अधिकार प्राप्त रहेपनि सफल अभ्यास नभएबाट उत्पन्न हुने परिणतिबारे विश्वका इतिहासका घटनाबाट सिक्नु उपयुक्त हुने सुझाए ।

उनले भने, 'शासन पद्धति ठिक तरिकाले चलेन भने कुनै न कुनै तानाशाह जन्मिन्छ भन्ने उदाहरण फ्रान्सका एक सिपाहीबाट सुरू भएका नेपोलियन बोनापार्टको उदयले देखाउँछ । विश्वका विभिन्न देशको घटनाहरूबाट पनि यो चाल पाउन सकिन्छ।’

प्रकाशित : आश्विन ४, २०७७ १४:४८
पूरा पढ्नुहोस्
प्रतिक्रिया
पठाउनुहोस्
×