वीरगन्जमा गरिएको परीक्षणमा बारा र रौतहटका २६ जनामा कोरोना

अस्पतालका प्रवक्ता डा.अतुलेश चौरसियाका अनुसार २ जना महिलासहित २६ जनामा संक्रमण पुष्टि भएको हो । उनका अनुसार गरुडास्थित राष्ट्रिय वाणिज्य बैंकका चार जनामा कोरोना पोजिटिभ देखिएको छ । यसैगरी गुरुडाकै सिभिल बैंकका पनि ४ जनामा कोरोना पुष्टि भएको छ ।

सशस्त्र प्रहरी हजमिनियाका दुई जना र गरुडा इलाका प्रहरी कार्यालयमा एक जना संक्रमित थपिएका छन् । माधवनारायण नगरपालिका– ३ र वडा ४ मा एक/एक जनामा कोरोना देखिएको छ । गरुडा नगरपालिकाको विभिन्न वडामा ९ जना संक्रमित थपिएका छन् ।

चन्द्रपुर नगरपालिका– ६ मा एक जनामा कोरोना पुष्टि भएको छ । प्रवक्ता डा.चौरसियाका अनुसार सोमबारको परीक्षणमा वाराको परसौनी गाउँपालिका– २ मा एक जना, जितपुर सिमरा उपमहानगरपालिका– ४ र वडा १२ मा एक/एकजना संक्रमित थपिएका छन् ।