महोत्तरीमा निषेधाज्ञा हप्ता दिन बढाइयो
महोत्तरी — कोरोना भाइरसको संक्रमण बढ्दै गएपछि महोत्तरीमा एक हप्ता निषेधाज्ञा थप गरिएको छ । जिल्लाको जलेश्वर नगरपालिका र महोत्तरी गाउँपालिकाका ३ र ५ वडाको सम्पूर्ण क्षेत्रमा आइतबार राति १२ बजेबाट भाद्र १ गते राति १२ बजेसम्म निषेधाज्ञा थप गरिएको महोत्तरीका प्रमुख जिल्ला अधिकारी कृष्णबहादुर कटुवालले जानकारी दिए ।
जिल्लामा कोरोना संक्रमितको संख्या बढ्दै गएपछि रोकथामका लागि निषेधाज्ञा अपरिहार्य भएकाले कोभिड १९ संकट व्यवस्थापन केन्द्र महोत्तरीको आइतबारको निर्णयअनुसार निषेधाज्ञा थप गरिएको कटुवालले बताए । जिल्ला प्रशासनले जिल्लामा साउन १५ गतेदेखि निषेधाज्ञा जारी राखेको छ ।
पछिल्लो पटक साउन २१ गतेबाट २५ गतेसम्म निषेधाज्ञा थप गरेको थियो । आइतबार जिल्लामा १८ जनामा संक्रमण पुष्टि भएसँगै जिल्लामा संक्रमितको संख्या ९ सय ६३ पुगेको जिल्ला स्वास्थय कार्यालय महोत्तरीका फोकल पर्सन गिरेन्द्र झाले जानकारी दिए ।
प्रकाशित : श्रावण २५, २०७७ १९:०५
