रौतहटमा शनिबारबाट निषेधाज्ञा- प्रदेश २ - कान्तिपुर समाचार

रौतहटमा शनिबारबाट निषेधाज्ञा

शिव पुरी

रौतहट — कोरोना संक्रमण बढ्दै गएपछि रौतहटको स्थानीय प्रशासनले शनिबार (साउन २४) गतेबाट निषेधाज्ञा जारीको आदेश गरेको छ । नियन्त्रणतर्फ उन्मुख रहेको यस जिल्लाका केही नगरपालिकामा संक्रमण देखिएपछि प्रशासनले यस्तो निर्णय गरेको हो ।  



कोभिड–१९ कै कारण रोजगारी गुमी भारतबाट घर फर्केर क्वारेन्टाइन बस्नेहरुमा मात्र कोरोना संक्रमण देखिएको थियो । पछिल्लो समय अन्यमा पनि कोरोना देखिन थालेको छ । जिल्लामा कोरोनाका ६ जना नयाँ संक्रमित पुष्टि भएको प्रमुख जिल्ला अधिकारी वासुदेव घिमिरले बताए । उनले भने, ‘समुदायमा पनि कोरोना देखिन थालेपछि नियन्त्रणका लागि निषेधाज्ञा जारी गर्ने निर्णय गरेका छौं । समुदायका मानिसहरुले स्वास्थ्य नियमको ख्याल गर्नु पर्छ ।’

जिल्ला प्रशासनमा बुधबार सुरक्षा समितिको बैठक बसी शनिबारबाट जिल्लामा निषेधाज्ञा जारी गर्ने निर्णय गरेको हो । प्रशासनले छिमेकी जिल्ला भारतमा कोरोना संक्रमण फैलिँदै गएको र यस जिल्लाको केही नगरपालिकामा संक्रमण देखिएकाले साउन २४ गतेबाट ३२ गतेसम्म निषेधाज्ञा जारी गरिएको जनाएको छ । जिल्लामा मानिसहरु संक्रमणबाट जोगिन समान्य स्वास्थ्य सुरक्षामापदण्ड पूरा नगर्ने, मास्क नलागाउने र समाजिक दूरी कायम नगर्ने जस्ता कार्य बढेको प्रशासनको ठम्याइ छ । उद्योग वाणिज्य संघको प्रतिनिधिलाई समेत राखेर प्रशासनले निषेधाज्ञाको निर्णय गरेको हो ।

संक्रमण बढ्दै गएपछि जिल्ला प्रशासनले एक विज्ञप्ती जारी गर्दै कोरोना संक्रमणको जोखिम बढिरहेकाले सर्वसाधारणलाई अति आवश्यक काम बाहेक घर बाहिर ननिस्कन आग्रह गरेको छ ।

प्रकाशित : श्रावण २२, २०७७ १५:२४
प्रतिक्रिया
पठाउनुहोस्

प्रयोगशालाका प्राविधिक भन्छन्– घर जान डर भयो, छुट्टै गासबासको व्यवस्था गरिदिनु पर्‍यो

जितेन्द्र साह

विराटनगर — कोरोना परीक्षणका लागि स्वाब संकलन गरेपछि घर जाँदा परिवारका सदस्य असुरक्षित हुने भन्दै मोरङको रंगेली अस्पतालको प्रयोगशालाका प्राविधिकहरुले छुट्टै गासबासको व्यवस्था गरिनुपर्ने माग राखेका छन् । प्रयोगशालाका चारैजना प्राविधिक काम सकिएपछि सोझै घरतिर लाग्छन् र परिवारसँगै बस्छन् । कार्यस्थलमा खानपिनको प्रबन्ध नहुँदा समेत स्वास्थ्यकर्मी तनावमा छन् ।

रंगेली नगरपालिकामा अहिलेसम्म तीन स्वास्थ्यकर्मीसहित ३२ जनामा कोरोना संक्रमणको पुष्टि भएको छ । रंगेली बजारका एकै परिवारका १४ जना, विद्युत प्राधिकरण वितरण शाखाका ५ र ३ स्वास्थ्यकर्मीसहित २२ जनामा सोमबार संक्रमण पुष्टि भएको थियो ।

‘घरमा भौतिक दूरीको पालन गर्दै बस्नु अव्यवहारिक हुने भएकाले हामीलाई छुट्टै स्थानीय धर्मशाला वा होटेलमा राख्न माग गरिरहेका छौं,’ अस्पतालका प्रयोगशाला इन्चार्ज ललित यादवले भने । पीपीई सेट लगाएर स्वाब संकलन गरे पनि जोखिमको सम्भावना रहिरहने उनले बताए ।

‘घरमै बस्दा परिवारजनलाई खतरा छ, उनीहरु पनि डराउँछन् समाजले अनेक खाले टिकाटिप्पणी गर्छन्,’ यादवले भने । नगरपालिकाले सहयोगी स्वास्थ्यकर्मीको समेत खानपीनको उचित प्रबन्ध नगरेको उनले दुखेसो पोखे ।

‘दुई महिनादेखि नगरपालिकाका जनप्रतिनिधिहरुसँग पटकपटक समस्या राख्दै आएका छौं, समस्या बढ्दै छ, अब पनि प्रयोगशालाकर्मीका लागि आइसोलेसन र दुई छाक भोजनको प्रबन्ध गरिएन भने काम गर्न अमसमर्थ हुन्छौं,’ यादवले भने, ‘यो तरिकाले कहिलेसम्म काम गर्ने ?’

अस्पतालको यो प्राविधिक टोलीले अहिले सम्म क्वारेन्टाइनभित्रका २ सय २२ जनाको आरडीटी एवं १ हजार ३ सय ४८ जनाको स्वाब संकलन गरेको छ । संकलित स्वाबमा क्वारेन्टाइनभित्र ७ सय ८३, समुदायको १ सय ४२ र कन्ट्याक्ट ट्ेरसिङका ४ सय २३ जना रहेको इन्चार्ज यादवले बताए ।

रंगेली–८ दर्वेशामा बुधबार कोरोना संक्रमणबाट एक पुरुषको मृत्यु भएकोले उनीसँग सम्बन्धितहरुको कन्ट्रयाक्ट ट्ेरसिङको सूची तयार भइरहेको नगरपालिकाको जनस्वास्थ्य प्रमुख भूपेन मण्डलले बताए । उनले ती व्यक्तिहरुको शुक्रबार स्वाब संकलन गरिने जनाए । नगरपालिकाको जनस्वास्थ्य प्रमुख हुँदै संकलित स्वाब परीक्षणका लागि विराटनगरस्थित कोसी अस्पताल एवं प्रादेशिक प्रयोगशालामा पुग्छ ।

स्वाब संकलनमा संलग्न स्वास्थ्यकर्मीहरुकालागि अस्पतालभित्रै बस्ने प्रबन्ध गर्ने सोचमा रहेको रंगेली अस्पतालका मेडिकल सुपरिन्टेन्डेन्ट डा. रोहेन्द्र पाण्डेले बताए । ‘बाहिर अन्यत्र बस्दा वरिपरिका समाजले समस्या खडा गर्लान्, आफ्नै ठाउँ भयो भने राम्रो हुन्छ भनेर सोच बनाउँदैछु,’उनले भने । अस्पतालको स्वास्थ्यकर्मीको ज्यानको सुरक्षाको हकमा कुनै सम्झौता नगर्ने डा.पाण्डेले बताए ।

स्वाब संकलन जस्तो संवेदनशील कार्यमा संलग्न स्वास्थ्यकर्मी छुट्टै बस्नु पर्ने र सामाजिक दूरी बनाएर राख्नु पर्ने प्रदेश १ सामाजिक विकास मन्त्रालयको स्वास्थ्य महाशाखाका प्रमुख डा.सुरेशप्रसाद मेहताले बताए । ‘यी स्वास्थ्यकर्मी घरै गए पनि एक्लै बस्नु पर्छ र परिवारजनसँग दूरी राख्नु पर्छ,’ उनले भने, ‘सबैको घर वा डेरामा पर्याप्त ठाउँ नहुने हुनाले उनीहरुका लागि छुट्टै गासबासको प्रबन्ध उत्तम उपाय हो ।’

सुरक्षाकाका सबै विधि अपनाएर स्वाब संकलन गरिएपनि जोखिम लिन नसकिने हुनाले छुट्टै कोठामा खानु–बस्नु नै उचित हुने डा.मेहताले बताए ।

आफू र सम्पूर्ण स्वास्थ्यकर्मी उच्च जोखिममा रहेर काम गरिरहको नगरपालिकाका स्वास्थ्य शाखा प्रमुख मण्डलले बताए । उनले प्रयोगशालाकर्मीसँगै सबै स्वास्थ्यकर्मीको माग जायज रहेको र यस बारेमा सोचिरहेको बताए ।

‘हामीसँग स्वाब संकलनका लागि सिमित जनशक्ति रहेकोले १४ दिनसम्म क्वारेन्टाइनमा पठाउन सकिन्न तर उनीहरु तथा उनीहरुका परिवारको स्वास्थ्य सुरक्षालाई प्राथमिकतामा राख्नु पर्छ,’ उनले भने, ‘नगरका जनप्रतिनिधिहरुसँग सल्लाह गरेर प्रयोगशालाका कर्मचारी एवं स्वास्थ्यकर्मीहरुका लागि चाडै छुट्टै बास र भोजनको प्रबन्ध गर्छौं ।’

प्रकाशित : श्रावण २२, २०७७ १५:०१
पूरा पढ्नुहोस्
प्रतिक्रिया
पठाउनुहोस्
×