दुई सातामा दस जना फरार अभियुक्त पक्राउ- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

दुई सातामा दस जना फरार अभियुक्त पक्राउ

कोरोना संक्रमणबाट जोगिन घर आएकाे मौकामा प्रहरीले धमाधम पक्राउ गर्दै
शिव पुरी

रौतहट — रौतहटका विभिन्न स्थानमा भएका घटनामा संलग्न फरार अभियुक्तहरु कोभिड–१९ को संक्रमणबाट जोगिन घर आएको मौका पारेर प्रहरीले धमाधम पक्रन थालेको छ ।

जिल्ला अदालत गौरबाट विभिन्न घटनामा दण्ड सजाय पाइ फरार प्रतिवादीहरुलाई इलाका प्रहरी चन्द्रनिगाहपुरको टोलीले पक्राउ गरेर अदालतमा बुझाएको छ । प्रहरीले दुई साताभित्रमा १० जना फरारलाई पक्राउ गरेको हो ।

जिल्ला अदालतको फैसला कार्यान्वयनको सिलसिलामा विभिन्न घटनामा संलग्न रहेका अभियुक्तविरुद्ध कैद, जरिवाना तोकिएको र हालसम्म फरारहरु धमाधम पक्राउ पर्न थालेका हुन् । घटनापछि फरार विरुद्ध कसुर अनुसारको ऐनमा मुद्दा चलि अदालतको आदेश, फैसला भइसकेको छ । इलाकाका डीएसपी हेमबहादुर शाहीले लामो समय फरार भएकाहरु विरुद्ध खोजतलास गर्ने क्रममा पक्राउ गरिएको बताए ।

‘अदालतको आदेश र विशेष टोली परिचालन गरी फरार पक्रन सफल भएका छौं,’उनले भने,‘अपराध गर्नेहरु भागेर कहिले पनि उन्मुक्ति पाउँदैनन् ।’

पक्राउ परेकाहरुको पीसीआर परीक्षण गरेर अदालत बुझाइएको छ । यसअघि जिल्ला प्रहरी गौरको अपराध अनुसन्धानको टोलीले ‘कोभर्ट अपरेसन’को माध्यमबाट लामो समयदेखि फरार ३३ जना फरार पक्राउ गरेको थियो ।

प्रकाशित : श्रावण २०, २०७७ १५:४२
प्रतिक्रिया
पठाउनुहोस्

बाँकेमा चार दिन निषेधाज्ञा थपियो

रुपा गहतराज

नेपालगन्ज — बाँके प्रशासनले गत शनिबार रातिदेखि जारी निषेधाज्ञा थप चार दिनका लागि बढाएको छ ।



मंगलबार बसेको जिल्लास्तरीय कोभिड–१९ संकट व्यवस्थापन केन्द्र बाँकेको बैठकले चार दिन निषेधाज्ञा थप बढाएर लैजाने निर्णय गरेको हो ।

कोरोना संक्रमण बढदै गएकोले मंगलबार बसेको बैठकमा आइतबारदेखि जारी निषेधाज्ञा आउने शनिबार राति १२ बजेसम्म जारी रहने निर्णय भएको बाँकेका प्रमुख जिल्ला अधिकारी रामबहादुर कुरुम्बाङले बताए ।

कोरोना संक्रमण बढेपछि जिल्ला प्रशासन कार्यालय बाँकेले जिल्लाभरि तेस्रोपटक आइतबारदेखि तीन दिनसम्म पुनः निषेधाज्ञा लगाएको थियो ।

तथापि जिल्लाका सम्पूर्ण पसल, व्यवसाय तथा होटल बन्द रहेपनि निजी यातायातका साधन चलिरहेका छन् । ठाउँठाउँमा प्रहरी सेना परिचालित भएपनि जाँच भने गरेको देखिँदैन ।

थपिएको निषेधाज्ञा शनिबार राति १२ बजेसम्म लागू रहने प्रशासनले जनाएको छ ।

जिल्लामा कोरोना भाइरसको संक्रमण व्यापक बन्दै गएको देखिएकाले संक्रमण थप फैलन नदिन तथा यसको रोकथाम, नियन्त्रण उपचार तथा व्यवस्थापनलाई प्रभावकारी बनाउन थप चार दिन जिल्लाभर निषेधाज्ञा थपिएको प्रमुख जिल्ला अधिकारी कुरुम्बाङले बताए ।

स्वास्थ्य, खानेपानी, दूध, विद्युत, दमकल, सञ्चार, फोहरमैला व्यवस्थापन, इन्धन, एम्बुलेन्स, औषधिजस्ता अति आवश्यक सेवाबाहेक अन्य सम्पूर्ण पसल, उद्योग, व्यवसाय, सेवा सञ्चालन बन्द गर्ने निर्णय भएको छ ।

यसअघि बाँकेमा पहिलोपटक वैशाख २२ गतेदेखि २५ गतेसम्म निषेधित क्षेत्र घोषणा गरिएको थियो ।

प्रकाशित : श्रावण २०, २०७७ १५:१८
पूरा पढ्नुहोस्
प्रतिक्रिया
पठाउनुहोस्
×