बाराका अधिकांश ठाउँमा आइतबारदेखि निषेधाज्ञा- प्रदेश २ - कान्तिपुर समाचार

बाराका अधिकांश ठाउँमा आइतबारदेखि निषेधाज्ञा

लक्ष्मी साह

बारा — जिल्ला प्रशासन कार्यालय बाराले जिल्लाको अधिकांश ठाउँमा आइतबार विहान ५ बजेदेखि अनिश्चितकालका लागि निषेधाज्ञा जारी गर्ने भएको छ । जिल्ला र छिमेकी जिल्ला पर्साको वीरगन्जमा कोरोना संक्रमित बढेसँगै सतर्कता अपनाउन निषेधाज्ञा जारी गरिएको जिल्ला प्रशासन कार्यालयले जनाएको छ ।

वीरगन्जदेखि पथलैयासम्मको औद्योगिक क्षेत्र, पथलैयादेखि निजगढसम्मको पूर्व–पश्चिम राजमार्ग, वीरगन्जदेखि रौतहटको सिमानासम्म जोडिने हुलाकी मार्ग छेउछाउका स्थानीय तहहरुलगायत कलैया र जीतपुरसिमरा उपमहानगरपालिका क्षेत्रमा निषेधाज्ञा जारी गरिएको हो ।

यस्तै सिम्रौनगढ, कोल्हवी र महागढीमाई नगरपालिकाभित्र स्थानीय प्रशासन ऐन २०२८ को दफा ६ को ३ र संक्रामक रोग नियन्त्रण २०२० को दफा २ बमोजिम निषेधाज्ञा जारी गरिएको हो । ‘जिल्ला र छिमेकी जिल्लामा दैनिक संक्रमितहरु भेटिन थालेपछि संक्रमण नियन्त्रणका लागि निश्चित ठाउँहरुमा निषेधाज्ञा जारी गरिएको छ,’ प्रमुख जिल्ला अधिकारी रुद्रप्रसाद पण्डितले भने, ‘खाद्यान्न र औषधि उपचार, औषधि तथा खाद्यन्न पसलबाहेक सबै बन्द रहने छ ।’

सेवाग्रहीलाई सरकारी कार्यालयबाट दिइने सेवाको हकमा अत्यावश्यक सेवाबाहेक सबै बन्द रहने उनले बताए । यसैगरी हाटबजार तथा नेपाल–भारत आउजाउ बन्द रहने उनले बताए । निषेधित क्षेत्रमा भोजभतेर, धार्मिक, साँस्कृतिक, सामाजिक क्रियाकलाप र विवाह व्रतबन्धमा रोक लगाइएको छ ।

उद्योगभित्रका होस्टेल तथा उद्योग सञ्चालन गर्न स्वास्थ्य सुरक्षा मापदण्ड अपनाएर काम गर्न गराउन भनिएको छ । प्रमुख जिल्ला अधिकारी पण्डितका अनुसार उद्योगहरुमा कोरोना संक्रमित भेटिएकाले जगदम्बा इन्टरप्राइजेज र मारुती फर्मास्युटिकल उद्योग सिल गरिएको छ । ‘अरु पनि उद्योगहरुमा अनुगमन थालिएको छ,’ उनले भने, ‘स्वास्थ्य मापदण्ड नअपनाउनेलाई सिल गरिनेछ,’ उनले भने ।

प्रकाशित : श्रावण १७, २०७७ १५:०७
प्रतिक्रिया
पठाउनुहोस्

वर्षाले बाराको जनजीवन अस्तव्यस्त 

लक्ष्मी साह

बारा — चार दिनदेखिको अविरल वर्षा र डुबानले जिल्लाको जनजीवन अस्तव्यस्त बनेको छ । कतिपय विपन्न परिवारको घर भत्केको छ । पूर्व–पश्चिम महेन्द्र राजमार्गअन्तर्गत अमलेखगन्जको १ र २ नम्बर पुलको बीचमा २५ मिटर राजमार्ग भत्केपछि मंगलबार साँझदेखि आवतजावतमा कठिनाई भएको छ । प्रहरीका अनुसार उक्त सडक खण्डमा एकतर्फी सवारी सञ्‍चालन भइरहेको छ ।

बाराको प्रसौनी गाउँपालिका ५ मा वर्षाले मंगलबार भत्किएको स्थानीयको घर ।

यस्तै पिलुवा र पथलैयाबीचको दुधौरा खोला नजिक रहेको ११ हजारको भोल्ट भएको विद्युत ट्रान्सफर्मर नजिक जमिन भासिएर पोल ढलेपछि दुई दिनदेखि विद्युत् अवरुद्ध छ । विद्युत् र राजमार्ग बनाउने कार्य सुरु भइसकेको जिल्ला प्रहरी कार्यालयका प्रवक्ता प्रहरी नायब उपरीक्षक गौतम मिश्रले बताए ।

सदरमुकाम कलैयासहित जिल्लाका आधा दर्जन गाउँपालिकामा खोलाको पानी पसेपछि स्थानीय समस्यामा परेका छन् । प्रसौनी गाउँपालिका–५ गोईंठही टोलको जादोलाल कुसवाहाको घर भत्केको छ । एक महिला घाइते भएकी स्थानीय सामाजिक अगुवा सुमेश्वर कुसवाहाले बताए ।

यसैगरी महागढीमाई नगरपालिका–१० गन्जभवानीपुर र वडा ४ को दहियारमा दुई घर भत्किएको प्रहरी प्रवक्ता मिश्रले बताए । उनले देवताल गाउँपालिका–६ रामपुर्वा र फेटा गाउँपालिका–१ त्रिवेणी गाउँमा डुबानमा परेकालाई सशस्त्र र नेपाल प्रहरीले उद्धार गरेको छ ।

बालगंगा खोलाको धार परिवर्तन भएर किसानको सयौं बिघा धानबाली कटानमा परेको स्थानीय सीता बरालले बताइन् । अनावृष्टिले कतिपय खेत रोपाइँसमेत हुन सकेको छैन् । ‘अत्यधिक वर्षाले रोपाइँ हुन सकेको छैन,’ सिम्रौनगढ नगरपालिका–८ का किसान वीरेन्द्रप्रसाद साह सोनारले बताए ।

प्रकाशित : श्रावण ७, २०७७ १८:२७
पूरा पढ्नुहोस्
प्रतिक्रिया
पठाउनुहोस्
×