वीरगन्जमा कोरोनाबाट थप एकको मृत्यु

भूषण यादव

वीरगन्ज — नारायणी अस्थायी कोरोना अस्पतालमा भर्ना भइ उपचार गराइरहेकी वीरगन्ज महानगरपालिका– ११ निवासी ८५ वर्षीया महिलाको मृत्यु भएको छ । चिकित्सकका अनुसार ती वृद्ध महिला मुटु रोगी थिइन् । हाल निमोनिया भएर अस्पताल आएकी थिइन् । 

कोरोना अस्पतालका इन्चार्ज डा. निरज सिंहका अनुसार शुक्रबार कोरोना अस्पतालमा मृत्यु भएकी महिला वीरगन्जकै एडभान्स मेडिकेयर हस्पिटलबाट बिहीबार रिफर भएर कोरोना अस्पताल आएको थिइन् । ‘ती वृद्ध महिला मंगलबार एडभान्स मेडिकेयर हस्पिटलमा निमोनिया जाँच गराउन आएकी थिइन्,’ डा. सिंहले भने, ‘मुटु रोगकी पुरानो बिरामी महिलामा निमोनियासँगै कोरोनाको लक्षण देखिएपछि कोरोना अस्पताल रिफर गरिएको थियो ।’ ती महिलामा बुधबार कोरोना संक्रमण पुष्टि भएको थियो ।

कोरोना अस्पतलाको आइसियु कक्षमा उपचार गर्दागर्दै शुक्रबार बिहान पौने ७ बजे उनको मृत्यु भएको नारायणी अस्पतालका मेडिकल सुपरिटेन्डेन्ट डा. मदनकुमार उपाध्यायले बताए ।

गत मंगलबार कोरोना अस्पतालमै उपचार गराइरहेका वीरगन्ज– ६ माईस्थानका ७० वर्षीय वृद्धको मृत्यु भएको थियो । बुधबार साँझ कोरोना संक्रमण पुष्टि भएपछि ७० वर्षीय वृद्धको बिहीबार नेपाली सेनाले अन्तिम संस्कार गरेको थियो ।

प्रकाशित : श्रावण ९, २०७७ १४:३०
प्रतिक्रिया
पठाउनुहोस्

स्विस दूतावासद्वारा सरकारलाई ४० हजार पीसीआर किट सहयोग

कान्तिपुर संवाददाता

काठमाडौँ — नेपालस्थित स्विस दूतावासले सरकारलाई ४० हजार पीसीआर किट र  २ वटा रियल टाइम पीसीआर मेसिन हस्तान्तरण गरेको छ । नेपालका लागि स्विजरल्यान्डकी राजदूत एलिजाबेथ भो क्यापलरले शुक्रबार उक्त सामग्री स्वास्थ्य तथा जनसंख्यामन्त्री भानुभक्त ढकाललाई हस्तान्तरण गरेकी हुन् ।

स्विस कम्पनी रोशले निर्माण गरेको उक्त किटमध्ये २० हजार किट अर्को लटमा दिइने कम्पनीका नेपाल प्रतिनिधि सुशील थापाले बताए । दूतावासले पीसीआर मेसिन भने प्रदेश एकलाई दिएको हो । बाटोको अवस्था ठीक भए ती मेसिन आइतबारदेखि नै सञ्चालनमा आउन सक्ने गरी बायोमेडिकल इन्जिनियर खटाइसकिएको थापाले जानकारी दिए ।

राजदूत क्यापलरले रोशले निर्माण गरेको उक्त गुणस्तरीय भएको उल्लेख गर्दै पीसीआर परीक्षण बढाउन नेपाल सरकारलाई सहयोग पुग्ने बताइन् ।

यसअघि स्विस दूतावासले मे ७ मा नेपाललाई ३० हजार पीसीआर परीक्षण किट तथा ३० हजार आरएनए एक्स्ट्रयाक्सन किट उपलब्ध गराएको थियो ।

प्रकाशित : श्रावण ९, २०७७ १४:०७
पूरा पढ्नुहोस्
प्रतिक्रिया
पठाउनुहोस्
×