कान्तिपुर वेबसाईट
AdvertisementAdvertisement

सप्तरीका साढे ४ हजार किसानको ४ महिनाको ब्याज प्रदेश सरकारले तिरिदियो

अवधेशकुमार झा

राजविराज — सप्तरी जिल्लाका ४ हजार ४ सय ९४ किसानको चार महिनाको कृषि ऋणको ब्याज प्रदेश सरकारले तिरिदिएको छ ।

सोमबार राजविराजमा आयोजित एक कार्यक्रममा प्रदेशका भूमि व्यवस्था, कषि तथा सहकारीमन्त्री शैलेन्द्रप्रसाद साहले जिल्लामा विभिन्न बैंक वित्तिय संस्था र सहकारी संस्थाबाट ५ लाखसम्म कृषि ऋण लिएका कृषकहरुको चार महिनाको ब्याज बराबरको रकमको चेक सम्बन्धित बैंकलाई हस्तान्तरण गरे ।

कोभिड–१९महामारीका कारण लकडाउन हुँदा किसानहरु सबभन्दा बढी समस्यामा परेको भन्दै मन्त्री साहले चैत, वैशाख, जेठ र असार महिनाको कृषि ऋणको ब्याज तिर्ने मन्त्रालयको योजना अनुरुप उक्त चेक हस्तान्तरण गरेका हुन् । जिल्लामा ५ लाख रुपैयाँभन्दा बढी कृषि ऋण लिएका कृषकहरुको ब्याज अर्को चरणमा तिरिदिने बताए ।

जिल्लामा कुल ६ हजार ५ सय ७२ जना कृषकले ब्याज तिरिदिन मन्त्रालय अन्तर्गतको कषि ज्ञान केन्द्रमा आवेदन दिएकामा ५ लाख रुपैयाँभन्दा कम ऋण लिएका ४ हजार ४ सय ९४ जना कृषकको चार महिनाको ब्याज पहिलो चरणमा तिरिएको हो । ती कृषकहरुले विभिन्न ५० वटा बैंक, वित्तिय संस्था र सहकारी संस्थाबाट कृषि ऋण लिएका थिए ।

मन्त्री साहका अनुसार ती किसानहरुको ब्याज बापत ३ करोड, ३ लाख, ५५ हजार ९ सय ६३ रुपैयाँ ६७ पैसा मन्त्रालयले बैंकहरुमा बुझाइएको हो । यसैगरी लकडाउनका कारण कृषि बालीनाली क्षति भएकोमा पुर्नस्थापनातर्फ १ सय ४१ जना कृषकलाई २३ लाख २१ हजार २ सय ६९ रुपैयाँ र पशुपक्षीतर्फ क्षति भएका १ सय ६६ कृषकहरुलाई ९७ लाख ६० हजार ३ सय ४० रुपैयाँ अनुदानस्वरुप प्रदान गरिएको बताए । ५ लाख रुपैयाँभन्दा बढीको कृषि ऋण लिएका कृषकहरुको हकमा आगामी आर्थिक वर्षमा ब्याज व्यवस्थापन गरिने मन्त्रालयको तयारी रहेको मन्त्री साहले बताए ।

प्रदेश नम्बर २ मा ८० हजार कृषकले कृषि ब्याज तिरिदिनका लागि आवेदन गरेको बताउँदै मन्त्री साहले बारामा सबभन्दा बढी १९ हजार र सप्तरीमा सबभन्दा कम ६ हजार ५ सय ७२ जनाले आवेदन गरेको जानकारी दिए । उनले ८० हजारमध्ये पहिलो चरणमा प्रदेशभरिका ५० हजार कृषकको चार महिनाको ब्याज तिरिने बताए । उनले प्रदेशभरिमा कृषकहरुले विभिन्न बैंक र वित्तिय संस्थाबाट ८० अर्बभन्दा बढी ऋण लिएको भएतापनि त्यसको अपेक्षा उत्पादन निक्कै कम रहेकोमा दुख व्यक्त गरे । यसैगरि प्रदेश सरकारले लकडाउनका कारण तरकारी र फलफूलबालीमा क्षति भएका कृषकहरुलाई प्रतिकट्ठा ७ सय ५० रुपैयाँ र कुखुराफर्महरुलाई क्षति भएको कुखुराको हकमा १ हजारसम्म कुखुराको प्रतिगोटा १ सय तथा १ हजार भन्दा माथिको कुखुराको हकमा प्रतिगोटा ५० रुपैयाँका दरले अनुदान दिने बताए ।

प्रदेश सरकारले लकडाउनका कारण बेरोजगार भएका युवाहरुको हकमा नव परवर्तन कृषि प्रवर्द्धन कार्यक्रम र एक दिनमा दिनको एक हजार रुपैयाँ कार्यक्रम ल्याएको बताउँदै कृषक र युवाहरुलाई सरकारसँग जोडने कार्यक्रम सञ्चालन गर्न लागिएको बताए । उनले पछिल्लो समय बाढी र अन्य विपत्तिका कारण प्रदेशमा कृषि क्षेत्र नराम्ररी प्रभावित हुँदै आएकोले कृषि विकास कोषको स्थापना गरी कृषकहरुलाई पुर्नस्थापन गर्ने तयारी गरिएको बताए ।

यस्तै कृषकहरुका उत्पादन बजारसम्म पुर्‍याउन बिचौलियाहरुको भर पर्नुपर्ने अवस्थालाई अन्त गर्न प्रदेशका हरेक प्रमुख सहरहरुमा नमुना पसल सञ्चालन गरी कृषकहरुका उत्पादन सो पसलबाट सिधै बिक्रीको व्यवस्थापन मिलाउन लागिएको बताए ।

प्रकाशित : असार २९, २०७७ १८:०७
प्रतिक्रिया
पठाउनुहोस्

जुम्ला पुग्यो सलह

१ किलो छोप्नेलाई २ सय 
एलपी देवकोटा

जुम्ला — हिमाली जिल्ला जुम्लामा सलह देखिएको छ । पातारासी र गुठिचौर गाउँपालिकाका विभिन्‍न क्षेत्रमा सलह देखिएपछि किसान चिन्तित बनेका छन् ।

छिमेकी जिल्ला जाजरकोट हुँदै सलह जुम्ला प्रवेश गरेको कृषि प्राविधिकको अनुमान छ । स्थानीयका अनुसार पातारासी गाउँपालिका– १ र २ मा धेरै संख्यामा सलह देखिएको हो ।

सलहले मकै र आलु बारीमा क्षति पुर्‍याउन थालेको किसान हर्ष रावतले बताए । उनका अनुसार बारीमा सलहको झुन्ड देखिएपछि थाल ठटाउँदै धपाउन थालिएको छ । ‘घोगा लागिसकेको मकै सलहको झुण्डले सखाप पार्न थाल्यो,’ उनले भने, ‘समयमै नियन्त्रण गर्न नसकिए ठूलो क्षति पुर्‍याउने देखियो ।’

चन्दननाथ नगरपालिकाको तलिचौरमा पनि सलह देखिएको कृषि विकास कार्यालयले जनाएको छ । सलह देखिएसँगै क्षतिको विवरण संकलन गर्न थालिएको कृषि विकास प्रमुख बालकराम देवकोटाले बताए । ‘सलहको झुण्ड भगाउन किसानलाई बाजा बजाउन, ठूलो स्वरमा कराउन र थाल ठटाउन अनुरोध गरेका छौं,’ उनले भने, ‘जुम्ला हुँदै सलहको केही झुण्ड मुगु गएको छ ।’

सलह छोपेर ल्याउनेलाई पातारासी गाउँपालिकाले प्रतिकिलो २ सय रुपैयाँ दिने घोषणा गरेको छ । किसानले सलह छोपेर कृषि शाखामा बुझाएपछि रकम प्राप्त गर्नेछन् ।

प्रकाशित : असार २९, २०७७ १७:५३
पूरा पढ्नुहोस्
प्रतिक्रिया
पठाउनुहोस्
×