जोखिम भत्ता नपाएको भन्दै स्वास्थ्य सेवा ठप्प

सुनिता बराल

महोत्तरी — महोत्तरीको सम्सी गाउँपालिकाभित्र काम गर्ने स्वास्थ्यकर्मीले जोखिम भत्ता नपाएको भन्दै स्वास्थ्य सेवा ठप्प बनाएका छन् । कोरोना भाइरस(कोभिड–१९) को प्रभाव जिल्लामै सबैभन्दा बढी परेको सम्सीमा अहिले एक हप्तादेखि सबै स्वास्थ्य सेवा ठप्प भएको छ ।

कोरोनाको माहामारीका बस्च जोखिम मोलेर काम गरेको ४ महिना बित्दासम्म भत्ता नपाएको भन्दै आन्दोलनमा गर्नुपरेको स्वास्थ्यकर्मीले बताएका छन् ।

जिल्लामा ७ सय ५५ जनामा कोरोना संक्रमण पुष्टि भएकोमा सम्सी गाउँपालिकामा मात्रै २ सय ७३ जनामा संक्रमण पुष्टि भएको छ । तत्काल भत्ता उपलब्ध गराउनुपर्ने मागसहित आन्दोलनस्वरुप गाउँपालिका र स्वास्थ्य संस्थामा तालाबन्दी गरेको सम्सी स्वास्थ्य चौकीका प्रमुख रविन मण्डलले बताए ।

असार १४ गतेबाटै गाउँपालिकाभित्र प्रसूति सेवा, इमर्जेन्सी सेवालगायत सबै स्वास्थ्य सेवा बन्द छ । एक हप्तादेखि स्वास्थ्य सेवा ठप्प हुँदा सम्सीमा दैनिक स्वास्थ्यचौकीमा पुग्ने ४ सय बिरामीले समस्या भोगिरहेका छन् । प्रमुख जिल्ला अधिकारीलाई समेत पत्र बुझाएको र ३ दिनसम्म धर्नामा बस्दा समेत पालिकाका प्रमुख प्रशासकीय अधिकृत रामजी जोशीले पैसा छैन भन्दै आफूहरुको माग सुनुवाइ नगरेपछि गाउँपालिकामा समेत तालाबन्दी गरेको पर्सा देवार्ड स्वास्थ्य चौकीका प्रमुख सुखचन्द्र यादवले बताए ।

महोत्तरीका प्रमुख जिल्ला अधिकारी कृष्णबहादुर कटुवालले स्वास्थ्यकर्मीले थप सुविधा माग गर्नु जायज भएको तर स्वास्थ्य सेवा ठप्प बनाउनु गलत भएको बताए । तलब सुविधा पाहिरहेका स्वास्थ्यकर्मीले भत्ता नपाएको भन्दै स्वास्थ्य सेवा ठप्प बनाउँदा आम मानिसले पाउनुपर्ने सेवाबाट वञ्चित भएकाले तत्काल स्वास्थ्यकर्मी काममा फर्किनुपर्ने कटुवाल बताउँछन् । स्वास्थ्य सेवा नै ठप्प बनाएर आन्दोलनमा उत्रिएका स्वास्थ्यकर्मी तत्काल काममा नफर्किए कारबाही गर्ने कटुवालले बताए ।

प्रकाशित : असार २२, २०७७ १३:५६
प्रतिक्रिया
पठाउनुहोस्

रसुवागढी नाकाबाट आयात पुनः सञ्चालन

चिनियाँ पक्षले सोमबार बिहान केरुङबाट ४ कन्टेनर सामान मितेरी पुलसम्म ल्याइदिएको छ
बलराम घिमिरे

रसुवा — साढे पाँच महिनादेखि आयात–निर्यात ठप्प भएको रसुवागढी नाका सोमबार पुनः सञ्चालनमा आएको छ । कोभिड–१९ का कारण माघ १५ देखि नै रसुवागढी नाकाबाट आयात–निर्यात तथा आवतजावत ठप्प थियो ।

तस्बिर सौजन्य :  पुण्यविक्रम खड्का 

त्यसअघि पनि ल्होसार पर्व, पहिरो र हिमपातका कारण केही दिन आयात–निर्यात रोकिएको थियो । नाका सोमबार बिहान सञ्चालनमा आएको रसुवा भन्सार कार्यालयका प्रमुख भन्सार अधिकृत पुण्यविक्रम खड्काले बताए । ‘चिनियाँ पक्षले सोमबार बिहान केरुङबाट ४ कन्टेनर सामान मितेरी पुलसम्म ल्याइदिएको छ,’ उनले भने । उताबाट आएका सामान यता १० देखि १२ कन्टेनरमा राखिनेछन् । चीनबाट आएका सामानमा जुत्ता, चप्पल, लत्ताकपडालगायत रहेको र तिनलाई मितेरी पुलमा नेपाली कन्टेनरमा लोड गर्ने काम भइरहेको खड्काले बताए ।

उनका अनुसार चीनबाट अब दैनिक ४ कन्टेनर सामान आउनेछ । सामान लोड तथा अनलोड गर्न १५ कामदार र ढुवानी गर्न १५ जना चालक गरी ३० जना नाकामा खटिएका छन् । चालक र कामदारको दैनिक स्वास्थ्य परीक्षण गरिनेछ ।

मितेरी पुलसम्म आइपुगेको सामान १५ जना कन्टेनर चालकले पालैपालो पुनः ढुवानी गरेर भन्सार यार्डसम्म पुर्‍याउने काम गर्छन् । भन्सार यार्डबाटै सामानको जाँचपास हुने रसुवा भन्सार कार्यालयले जनाएको छ । सामानको जाँचपासपछि अन्य चालकले सामान सम्बन्धित ठाउँसम्म लैजानेछन् । टिमुरेभन्दा माथि कन्टेनर चालक, कामदार, सुरक्षाकर्मी र कर्मचारीबाहेक अन्यलाई जान रोक लगाइएको छ ।

सुरक्षित तरिकाले सामान आयात गर्ने विषयमा दुवै देशका सीमामा जोडिएका जिल्लाका समकक्षीहरूबीच असार १० गते मितेरी पुलमा छलफल भएको थियो । रसुवागढी नाकाबाट केरुङसम्मको दुरी २४ किलोमिटर छ । आयात–निर्यात ठप्प हुँदा राजस्व संकलन प्रभावित भएको प्रमुख भन्सार अधिकृत खड्काले बताए । ‘दैनिक करोडौं राजस्व संकलन हुने रसुवा भन्सार कार्यालयको चैत, वैशाख र जेठ महिनाको राजस्व संकलन शून्य भएको छ,’ उनले भने । यो नाकाबाट मुख्य गरी ५ वटा मालवस्तु पैठारी भइरहेको कार्यालयले जनाएको छ ।

प्रकाशित : असार २२, २०७७ १३:४३
पूरा पढ्नुहोस्
प्रतिक्रिया
पठाउनुहोस्
×