नेकपा–कांग्रेस कार्यकर्ताको झडपमा प्रहरीसहित २१ घाइते

ओमप्रकाश ठाकुर

सर्लाही — सर्लाहीको धनकौलमा आइतबार साँझ नेकपा र कांग्रेसका कार्यकर्ताबीच भएको झडपमा गोली चल्दा १८ जना घाइते भएका छन् ।

झडप नियन्त्रणमा लिन गएका तीन प्रहरी पनि घाइते छन् । उनीहरूको अवस्था सामान्य छ । घाइते सबैको जिल्ला अस्पताल मलंगवामा उपचार भइरहेको छ ।

एक साताअघि सर्लाहीको रामनगरका रामजनम यादवको हत्या भएको भन्दै दोषीलाई कारबाही गर्नुपर्ने मागसहित नेकपाले आइतबार साँझ धनकौलमा जुलुस निकालेको थियो । ४०–५० जनाको समूहमा रहेका नेकपाका कार्यकर्ताले कांग्रेस कार्यकर्ताको घर अगाडि टायर बाल्ने क्रममा झडप भएको थियो । घर अगाडि टायर नबाल्न भन्दा आफ्ना कार्यकर्ता कुटिएको भन्दै कांग्रेसका कार्यकर्ताले पनि उनीहरूमाथि ढुंगामुढा गरेका थिए ।

झडप नियन्त्रणमा केही राउन्ड गोली चलाएको थियो । घाइते अधिकांशलाई गोलीको छर्रा लागेको छ । गोली कसले चलाएको भन्ने स्पष्ट भइनसकेको प्रहरीले जनाएको छ । जुलुस निकालेका बेला कांग्रेस कार्यकर्ताले एक्कासि ढुंगामुढा गरेको गोलीसमेत प्रहार गरेको आरोप नेकपाले लगाएको छ ।

प्रहरी उपरीक्षक विश्वमणि पोखरेलले स्थिति नियन्त्रणमा लिन प्रहरीले चार राउन्ड अश्रुग्यास प्रहार गरेको बताए । ‘आइतबार बिहान ट्र्याक्टरका विषयमा दुई जनाबीच कुटाकुट भएको थियो, त्यसलाई नै उनीहरूले दुई पक्ष र पार्टीको इस्यु बनाइदिए,’ प्रहरी उपरीक्षक पोखरेलले भने, ‘गोली कसले प्रहार गर्‍यो भनेर अनुसन्धान गरिरहेका छौं ।’ गोली प्रहारका विषयमा एक जनालाई नियन्त्रणमा लिएर प्रहरीले सोधपुछ गरिरहेको छ ।

प्रकाशित : असार १५, २०७७ २१:४४
प्रतिक्रिया
पठाउनुहोस्

कुलेश्‍वरबाट पक्राउ परेका फलफूल व्यापारीको नाममा दुई सहकारीमा साढे ४ करोड

मातृका दाहाल

काठमाडौँ — कुलेश्वरमा फलफूल व्यापार गर्दै आएका १ भारतीयसहित २ जनाले सहकारीमा राखेको ४ करोड ५० लाख रुपैयाँभन्दा बढी रकम शंकास्पद देखिएको छ ।

सोमबार दिउँसो कुलेश्वरबाट स्रोत नखुलेको ६५ लाख ८ हजार रुपैयाँ नगदसहित पक्राउ परेका गढीमाई नगरपालिका–३, बाराका रमेश सिंह र भारत बेतिया घर भई सिंहसँगै बस्दै आएका उनका साला रविकुमार सिंहले शुक्रपथ र सुमेरु सहकारीमा साढे ४ करोडभन्दा बढी रकम राखेको अनुसन्धानबाट खुलेको हो ।

दुवै जनालाई महानगरीय प्रहरी वृत्त कालीमाटीको हिरासतमा राखिएको छ । वृत्तका डीएसपी रुगम कुँवरका अनुसार रमेश सिंह र उनकी पत्नीका नाममा उक्त रकम भेटिएको हो । सुमेरुमा ३ करोड ५० लाखभन्दा बढी र शुक्रपथमा १ करोडभन्दा बढी रकम राखिएको कुँवरले बताए ।

पक्राउ परेका दुवैजना हुण्डी कारोबारमा संलग्न भएको आशंंकामा प्रहरीले अनुसन्धान गरिहेको छ ।

‘पक्राउ परेका दुवै जनाले ५/७ वर्षदेखि फलफूल पसल गर्दै आएको बताएका छन्, यसबारे अनुसन्धान भइरहेको छ,’ डीएसपी कुँवरले भने, ‘तर सहकारीमा भएको र बरामद रकमको स्रोत के हो, यसको खोजीमा लागेका छौं ।’

सहकारी सञ्चालकलाई रकम बचत गर्नेको शंकास्पद खाता बन्द गर्न भनिसकेको डीएसपी कुँवरले जानकारी दिए ।

सम्बन्धित समाचार

प्रकाशित : असार १५, २०७७ २१:२९
पूरा पढ्नुहोस्
प्रतिक्रिया
पठाउनुहोस्
×