प्रदेश २ को प्रदेशसभा बैठक विद्युतीय माध्यमबाट

अजित तिवारी

जनकपुर — एकैपटक ५ जना मर्यादापालकलाई कोरोना संक्रमण भएपछि प्रदेश २ को प्रदेशसभा बैठक विद्युतीय माध्यमबाट सञ्चालन गर्न प्रदेशसभा कार्य सञ्चालन नियमावली संशोधन गरिने भएको छ ।

प्रदेश २ को प्रदेशसभाको शुक्रबार बसेको बैठकमा संसदको बैठक र संसदीय समितिको बैठक विद्युतीय माध्यमबाट गरिने प्रस्ताव सर्वसम्मतीले स्वीकृत भएको छ ।

बिहीबार प्रदेशसभा सचिवालयमा कार्यरत ५ जना मर्यादापालक र एकजना राज्यमन्त्रीको स्वकीय सचिव कोरोना भाइरस संक्रमित भएको पुष्टि भएपछि उक्त दिनको बैठक स्थगित गरिएको थियो ।

शुक्रबार बसेको बैठकमा सत्तारुढ दल समाजवादी पार्टीका सचेतक शैलेन्द्र यादवले कोरोना भाइरसको महामारी फैलिरहेको बेला प्रदेशसभाको बैठक सूचना तथा सञ्चार माध्यमबाट गर्नुपर्ने आवश्यकता रहेकाको बताउँदै प्रदेशसभा कार्य सञ्चालन नियमावली संशोधन गर्न प्रस्ताव गरेका हुन् ।

प्रदेशसभाको बैठक र संसदीय समितिको बैठक सूचना तथा सञ्चार माध्यमबाट सञ्चालन गरिने संशोधन प्रस्तावमा पेश गरिएको छ । नियमावलीको नियम २ सय २३ संशोधन गरेर त्यसमा विद्युतीय माध्यमबाट हुने संसदको बैठकमा सहभागी सदस्यको सहभागितालाई मान्यता दिइने, बैठकमा पक्ष वा विपक्षमा हुने मतदान प्रकृयामा सांसदलाई सहभागी गराइने र त्यो मतदानलाई मान्यता दिइने प्रस्ताव गरिएको छ । विद्युतीय माध्यमबाट हुने संसदको बैठकको विद्युतीय अभिलेख राख्‍न पनि संशोधनमा प्रस्ताव गरिएको छ ।

‘लकडाउनले अन्तरजिल्ला आवागमनमा रोक लगाइएको छ । तर प्रदेशसभाको बैठक सञ्चालन गर्नुपर्ने बाध्यता पनि छ,’ संशोधन प्रस्ताव प्रस्तुत गर्दै सांसद यादवले भने,‘संसद बैठकमा उपस्थित हुने सांसदको अधिकारलाई सुनिश्चित गर्न कानुनी व्यवस्था गर्न वाञ्छनीय छ ।’ सत्तारुढ दल समाजवादी पार्टीले गरेको उक्त संशोधन प्रस्तावलाई सत्ता गठबन्धन दल राष्ट्रिय जनता पार्टीका सचेतक प्रमेश्वर साह, प्रमुख प्रतिपक्षी नेकपाकी सांसद ज्वालाकुमारी साह र प्रतिपक्ष दल कांग्रेसका सांसद शोभाकुमारी लामाले समर्थन गरेका थिए ।

सभामुख सरोज यादवले संशोधन प्रस्तावमा छलफल गर्न आह्यन गरेपनि शुक्रबारको बैठकमा उपस्थित कोही पनि सांसदले बोल्न नचाहेपछि निर्णायार्थ प्रस्तुत गरिएको थियो । प्रदेशसभा सचिवालयमै कार्यरत ६ जनामा कोरोना भाइरसको संक्रमण देखिएपछि शुक्रबार बसेको बैठकमा सांसदहरुको न्यून उपस्थिति थियो ।

प्रकाशित : जेष्ठ २३, २०७७ १४:३६
ADVERTISEMENT
प्रतिक्रिया
पठाउनुहोस्

जुम्लाका गाउँमा चिकित्सक पुगे

एलपी देवकोटा

जुम्ला — कर्णाली स्वास्थ्य विज्ञान प्रतिष्ठानले कोरोना भाइरसको संक्रमण फैलन नदिन र क्वारेन्टाइनमा बसेकाहरुलाई स्वास्थ्य सेवा दिनका लागि जिल्लाका ८ वटै स्थानीय तहमा विशेषज्ञ चिकित्सक पठाएको छ ।

वरिष्ठ प्रशासकीय अधिकृत द्वन्द्वबहादुर शाहीका अनुसार कनकासुन्दरी गाउँपालिकामा एक जना र चन्दननाथ नगरपालिकासहित स्थानीय तहमा दुई–दुई जना चिकित्सक खटाइएका छन् । सबै गरेर १५ जना चिकित्सक गाउँ पुगेका शाहीले बताए । गाउँमा खटिएको चिकित्सकको टोलीले क्वारेन्टाइनको निगरानी गर्नुका साथै गाउँमा हुने सबै प्रकारका बिरामीको जाँच गर्नेछन् ।

गुठीचौर गाउँपालिकामा कमलराज शर्मा र रामप्रसाद उप्रेती, तातोपानी गाउँपालिकामा सुनिल बुढाथोकी र सुश्मा काफ्ले, पातारासी गाउँपालिका कपिल अमगाई र भुमेश काफ्ले, तिला गाउँपालिकामा सञ्जीव पण्डित र आशा शर्मा, सिञ्‍जा गाउँपालिकामा विशाल पोखरेल र दृष्टिराज जोशी, कनकासुन्दरी गाउँपालिकामा शम्भु यादव, चन्दननाथ नगरपालिकामा प्रविण गिरी र अर्जुन तिवारी, हिमा गाउँपालिकामा अजीत मिश्र र महिमा थापालाई खटाइएको छ । प्रतिष्ठानका रजिष्ट्रार विश्वराज काफ्लेले समग्रमा मनोवैज्ञानिक त्रास हटाउनको लागि चिकित्सक परिचालन गरिएको बताए ।

जिल्ला विपद् व्यवस्थापन समितिको बैठकमा स्थानीय तहले क्वारेन्टाइनमा स्वास्थ्य र सुरक्षाको ग्यारेन्टी गर्न माग गरेपछि स्थानीय प्रशासनले सुरक्षा र कर्णाली स्वास्थ्य विज्ञान प्रतिष्ठान शिक्षण अस्पतालले सबै स्थानीय तहमा चिकित्सक खटाएको उनको भनाइ छ । उनका अनुसार प्रतिष्ठानले यसअघि पनि हुम्ला, मुगु र कालीकोटमा एक महिनासम्म चिकित्सक खटाएको थियो ।

जुम्लामा हालसम्म २१ जनामा कोरोना संक्रमण पुष्टि भएको छ ।

प्रकाशित : जेष्ठ २३, २०७७ १४:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×