कुखुराको खोरमा १ सय ८० किलो गाँजा !
महोत्तरी — कुखुराको खोरमा लुकाएर राखिएको ठूलो परिमाणको गाँजा महोत्तरी प्रहरीले बरामद गरेको छ । जिल्लाको एकडारा गाउँपालिका–९ गेनाबथनाहाबाट एक लागूऔषध कारोबारीले खोरमा लुकाएको गाँजा प्रहरीले बुधबार बरामद गरेको हो ।
कुखुराको खोरमा पोका बनाएर राखेको अवस्थामा झण्डै दुई क्विन्टल गाँजा फेला पारिएको जिल्ला प्रहरी कार्यालय महोत्तरीले जनाएको छ ।
सो बस्तीका लक्ष्मी चौधरी गाँजा ओसारपसार र कारोबारमा संलग्न रहेको सूचनाका आधारमा प्रहरीले उनको खोजी गरिरहेको थियो । प्रहरी निरीक्षक केदार बस्नेत नेतृत्वको प्रहरी टोलीले कुखुराको खोरमा चौधरीले भण्डारण गरी राखेको गाँजा पत्ता लगाएको हो । चौधरीलाई खोज्ने क्रममा उनले कुखुराको खोरमा भण्डारण गरेर राखेको १ सय ८० किलो गाँजा बरामद गरेको जिल्लाप्रहरी कार्यालय महोत्तरीका प्रहरी उपरीषक श्यामकृष्ण अधिकारीले जानकारी दिए ।
कारोबारमा संलग्न ५२ वर्षीय चौधरी भने फरार भएका छन् । जिल्लामा पछिल्ला तीन वर्षयता यति धेरै परिमाणको गाँजा फेला पारिएको प्रहरीले जनाएको छ ।
भारतसँग सीमा जोडिएको एकडारा गाउँपालिकाबाट अत्याधिक मात्रामा लागूऔषध गाँजाको ओसारपसार हुने गरेको छ । गाँजा खेती र कारोबार नियन्त्रणमा प्रहरी सक्रिय भएपछि कारोबारीले चलाखी गर्दै कुखराको खोरमासमेत गाँजा लुकाएको अवस्थामा प्रहरीले बरामद गरेको हो ।
प्रकाशित : जेष्ठ २२, २०७७ १२:२१