पर्सामा थप ५ जनामा कोरोना संक्रमण

भूषण यादव

वीरगन्ज — पर्साको पटेर्वासुगौली गाउँपालिकाको क्‍वारेन्टाइनमा रहेका ५ जनामा कोरोना संक्रमण पुष्टि भएको छ । 

नारायणी अस्पतालको पीसीर परीक्षणमा शनिबार साँझ पटेर्वासुगौलीको एक महिलासहित ५ जनामा कोरोना संक्रमण पुष्टि भएको हो । उनीहरु केही दिनअघि मात्र भारतबाट आएका थिए । गत बिहीबार परीक्षणका लागि थ्रोट स्वाब संकलन गरिएको थियो ।

पर्साका सहायक प्रमुख जिल्ला अधिकारी ललितकुमार बस्नेतले पटेर्वासुगौली गाउँपालिकाका ५ जनामा कोरोना संक्रमण पुष्टि भएको बताए । स्वास्थ्य निरीक्षक जयमुद ठाकुरका अनुसार संक्रमण हुनेहरुमा पटेर्वासुगौली गाउँपालिका ५ निचुटाका २२ र २५ वर्षका तीन पुरुष, वडा २ लक्ष्मीपुरका ३६ वर्षीय पुरुष र वडा ४ फरहदवाकी २५ वर्षीय महिला छिन् ।

पटेर्वासुगौली गाउँपालिकाका स्वास्थ्य संयोजक जगरनाथ साहका अनुसार गाउँपालिकाको तीनवटा क्‍वारेन्टाइनमा भारतबाट फर्किएका कूल ५५ जनालाई राखिएको छ । ‘गत बिहीबार सबैको थ्रोट स्वाब संकलन गरिएको थियो,’ उनले भने, ‘जसमध्ये ५ जनामा कोरोना संक्रमण पुष्टि भएको जानकारी आएको छ ।’ शनिबार संक्रमित भएका ५ जनामध्ये निचुटा क्‍वारेन्टाइनका दुई युवालाई पहिले देखिनै ज्वरो आएको उनले जनाए । ‘गत मंगलबार भारतबाट फर्किएर क्‍वारेन्टाइनमा आउँदा नै दुई जनाको स्वास्थ्य खराब थियो,’ स्वास्थ्य प्रमुख साहले भने, चेकजाचका लागि वीरगन्ज पठाएका थियौ, ‘तर, फेरि गाउँमै फर्काइयो ।’

संक्रमितलाई आइसोलेसन वार्डमा लैजाने तयारी भइरहेको उनले बताए । यसअघि बिहान पर्साकै सखुवाप्रसौनी गाउँपालिकाको क्‍वारेन्टाइनमा रहेका २ जनामा कोरोना संक्रमण पुष्टि भएको थियो ।

प्रकाशित : जेष्ठ १७, २०७७ २०:२४
प्रतिक्रिया
पठाउनुहोस्

प्रदेश १ का ९ जिल्लामा संक्रमित पुष्टि

माधव घिमिरे

विराटनगर — प्रदेश १ मा संक्रमितको संख्या १ सय ६० पुगेको छ । १४ जिल्लामध्ये ९ वटामा संक्रमण पुष्टि भएको छ । शनिबार संखुवासभाका दुई र झापाका एकजनामा संक्रमण पुष्टि भएको हो ।

भारतबाट आएका उनीहरुको स्वाब नमुना धरानस्थित बीपी कोइराला स्वास्थ्य विज्ञान प्रतिष्ठानमा गरिएको थियो ।

प्रदेशका तीन स्थानमा परीक्षण गरिँदै आएको छ । धरानस्थित बीपी कोइराला स्वास्थ्य विज्ञान प्रतिष्ठानमा हालसम्म ३ हजार ३ सय १ जनाको परीक्षण गरिएको छ ।

यसैगरी, विराटनगरस्थित कोसी अस्पतालमा ९ सय ८ जनाको एवं प्रादेशिक प्रयोगशालामा १ सय १३ जनाको नमुना परीक्षण गरिएको प्रदेश सरकारले जनाएको छ । प्रदेश १ मा पुष्टि भएका संक्रमितमध्ये ३० जना उपचारपछि निको भएर डिस्चार्ज गरिएका छन् । आइसोलेसनमा बस्नेको संख्या १ सय ३० छ ।

प्रदेशभरका विभिन्न स्थानीय तहमा रहेका क्‍वारेन्टाइनमा बस्नेको संख्या ३ हजार ६ सय ६१ पुगेको छ । दिनहुँजसो जोगबनी लगायत नाका हुँदै भारतबाट मानिसहरु भित्रिरहेका छन् । भारतबाट आउनेक्रम शनिबार पनि जारी रह्यो । मोरङ प्रहरीका अनुसार जोगबनी नाकाबाट १ सय ७८ जनालाई प्रवेश गराइएको छ ।

यसैगरी १ सय ८२ जना भारतीयलाई जोगबनी नाका हुँदै भारततिर पठाइएको छ । प्रदेश १ मा संक्रमित भेटिएका जिल्लाहरुमा झापा, उदयपुर, धनकुटा, मोरङ, सुनसरी, संखुवासभा, भोजपुर, खोटाङ र सोलुखुम्बु हुन् ।

प्रकाशित : जेष्ठ १७, २०७७ २०:१७
पूरा पढ्नुहोस्
प्रतिक्रिया
पठाउनुहोस्
×