प्रदेश २ मा शनिबार थपिए ५७ जना संक्रमित

अजित तिवारी

जनकपुर — प्रदेश २ मा शनिबार कोरोना भाइरस (कोभिड–१९) को संक्रमितको संख्या ५७ थपिएको छ । शनिबार प्रदेश २ का ८ वटै जिल्लामा नयाँ संक्रमित थपिएका हुन् । योसँगै प्रदेश २ मा कोरोना भाइरसको कुल संक्रमितको संख्या ५ सय ५० पुगेको छ ।

सामाजिक विकास मन्त्रालयका अनुसार शनिबार धनुषामा ७, महोत्तरीमा ४, सिरहामा ११, रौतहटमा ६, सर्लाहीमा १७, सप्तरीमा ९, बारामा १ र पर्सामा २ जना नयाँ संक्रमित थपिएका छन् । मन्त्रालयका सचिव रामप्रसाद घिमिरेले नयाँ संक्रमितहरुको स्वाब परीक्षण टेकुस्थित राष्ट्रिय प्रयोगशाला, नारायणी अस्पताल वीरगन्ज र धरानस्थित बीपी कोइराला विज्ञान प्रतिष्ठानमा गरिएको बताए । शनिबार सर्लाहीमा सबभन्दा बढी संक्रमित थपिएका हुन् ।

भारतमा रहेका नेपालीहरु फर्किएसँगै प्रदेश २ मा कोरोना संक्रमितको संख्या अन्य प्रदेशको तुलनामा उच्च रहेको छ । शुक्रबार प्रदेश २ मा ९६ र बिहीबार ९३ जना नयाँ संक्रमित थपिएको थियो । लकडाउनयता भारतबाट मात्रै प्रदेश २ मा २० हजार मानिस भित्रिएका छन् ।

सर्लाहीमा १६ देखि ४० वर्षसम्मका सबै संक्रमित १७ जना पुरुष हुन् । सप्तरीमा भने एक महिलासहित थप ९ जनामा कोरोना संक्रमण पुष्टि भएको छ ।

प्रकाशित : जेष्ठ १७, २०७७ १६:१५
प्रतिक्रिया
पठाउनुहोस्

प्यूठानको क्‍वारेन्टाइनमा मृत्यु भएकी महिलामा कोरोना देखिएन

गिरुप्रसाद भण्डारी

प्यूठान — प्यूठानको ऐरावती गाउँपालिका–६ स्थित जनता मावि बिजुलीको क्‍वारेन्टाइनमा मृत्यु भएकी महिलाको कोरोना परीक्षणको रिपोर्ट नेगेटिभ आएको छ । स्वास्थ्य कार्यालय प्यूठानका प्रमुख विशाल सुवेदीले ती महिलाको पीसीआर रिपोर्ट नेगेटिभ आएको जानकारी दिए ।

मृतक २६ वर्षीय पार्वती थापा ब्रेन ट्युमरको समस्याबाट पीडित थिइन् । मृत्युपछि उनको स्वाब परीक्षणका लागि प्रादेशिक जनस्वास्थ्य प्रयोगशाला भैरहवा पठाइएको थियो ।

उनी भारतको लुधियानाबाट जेठ ८ गते प्यूठान आएकी थिइन् । श्रीमान्, आमा, भाइ, छोरा/छोसीसँगै क्‍वारेन्टाइनमा बसेको अवस्थामा उनको जेठ १३ गते मृत्यु भएको थियो ।

प्रकाशित : जेष्ठ १७, २०७७ १६:०९
पूरा पढ्नुहोस्
प्रतिक्रिया
पठाउनुहोस्
×