रौतहटमा संक्रमितको संख्या ४७ पुग्यो

शिव पुरी

रौतहट — सोमबार रौतहटको राजपुर र ईशनाथ नगरपालिकाका २६ जनामा कोरोना संक्रमणको पुष्टि भएसँगै जिल्लामा संक्रमितको संख्या ४७ पुगेको छ । उनीहरु सबै भारतबाट आएका नेपाली कामदारहरु हुन् ।

१८ जना संक्रमितको गौरस्थित गौर नर्सिङ इन्स्टिच्युटको आइसोलेसनमा उपचार भइरहेको छ ।

राजपुर नगरपालिकाका ९६ जनाको स्वाब टेष्टका लागि लगिएकोमा २४ जनामा संक्रमण पुष्टि भएको प्रमुख जिल्ला अधिकारी बासुदेव घिमिरेले बताए । ईशनाथमा २६ जनाको स्वाब लगिएकोमा २ जनामा संक्रमण देखिएको हो । संक्रमण पुष्टि भएका सबै भारतबाट फर्किएका नेपाली हुन् । उनीहरु फर्किएर सिधै स्थानीय तहको क्‍वारेन्टाइनमा बसेका थिए । गत मंगलबार परीक्षणका लागि राष्ट्रिय जनस्वास्थ्य प्रयोगशाला, काठमाडौंमा पठाइएकोमा २६ जनामा संक्रमण पुष्टि भएको हो ।

उनीहरुलाई राजपुरमै निर्माण भएको आइसोलेसनमा राखिने प्रजिअ घिमिरेले सुनाए । रोजगारीका लागि भारतको विभिन्‍न सहर गएकाहरु कोरोना संक्रमणका कारण धमाधम घर फर्कन थालेका छन् । पछिल्लो एक साताभित्र भारतका विभिन्‍न सहरमा रहेका २ हजार ६ सय ४० जना नेपाली कामदारहरु रौतहट भित्रिएका थिए । उनीहरु सबै स्थानीयतहको क्‍वारेन्टाइनमा छन् ।

भारतमा लकडाउन खुकुलो भएसँगै घर फर्कनेहरुको संख्या ह्वात्तै बढेको छ । कोरोना महामारीकाबीच भारतबाट कष्टसँगले फर्कनेहरु सीमामा पुगेपछि १४ दिन दिनको एकान्तबास बस्नुपर्ने बाध्यता छ । नेपाल भारत सीमा नाकाहरुमा नेपाल र सशस्त्र प्रहरीका चेकपोष्टहरु स्थापना गरिएको छ । गस्ती तथा निगरानीमा खटिएका सुरक्षाकर्मीले स्थानीय तहको सहयोगमा सीमाबाट आगन्तुकलाई सोझै क्वारेन्टाइनमा लैजाने गरेका छन् ।

प्रशासनले भारतबाट नेपाल फर्कनेको संख्या अर्झै बढ्न सक्ने अनुमान गरेको छ । सुरुमा दुवै देशमा लकडाउन जारी रहेको र सीमा सिल गरिएकाले चोरबाटो हुँदै जिल्ला प्रवेश गरेका थिए । संक्रमण फैलिन नदिन भारत सरकारले आहृवान गरेको लकडाउनका कारण ठूलो संख्यामा नेपाली कामदारहरु उतै फसकेका थिए । अहिले भारतको विभिन्‍न सहरबाट, एम्बुलेसन्स, ट्याक्टर, खाद्यान्न बोक्ने ट्रक र पैदलमा धमाधम नेपाल प्रवेश गर्न थालेका हुन् ।

छैनन् आइसोलेसन वार्ड :

राजपुर र ईशनाथ नगरपालिकामा संक्रमण देखिएका २६ जनालाई राख्ने आइसोलेसन वार्डको समस्या भएको छ । प्रजिअ घिमिरले संक्रमण भएका मध्ये राजपुर फरदहवाकालाई त्यहीँ राख्‍ने योजना रहेको बताए । ‘राजपुरस्थित प्राथमिक स्वास्थ्य केन्द्रमा राख्‍ने कुरा भएको छ,’ उनले भने । राजपुर स्वास्थ्य केन्द्र बर्थिङ सेन्टर हो । आइसोलेसन वार्ड बनाउँदा गर्भवति महिलाहरु प्रभावित हुने भन्दै त्यहाँ राख्‍न उचित नहुने स्थानीयले जनाएका छन् ।

नगरपालिकाका प्रमुख प्रशासकीय अधिकृत बैजु ठाकुरले स्वास्थ्य केन्द्रमा संक्रमितहरुलाई राख्दा सिल गर्नुपर्ने हुनाले बर्थिङ सेन्टर आउने महिलालाई समस्या पर्ने बताए । ‘अन्य विकल्प खोज्दै छौ,’उनले भने,‘पायक पर्ने र संक्रमितहरुलाई राख्‍न उचित हुने स्थानमा आईसोलेसन वार्डको रुपमा प्रयोग गर्छौँ ।’

प्रकाशित : जेष्ठ १२, २०७७ १५:२७
प्रतिक्रिया
पठाउनुहोस्

मृत्युपछि कोरोना पुष्टि भएका वृद्धको गाउँ सिल, आफन्त भन्छन्- 'अस्पतालको लापर्बाही'

मृतकका छोराका अनुसार चिकित्सकले कोरोना जाँचको विषयमा केही भनेका थिएनन् । स्वाब लिए/नलिएको बारे पनि जानकारी गराइएको थिएन ।
लक्ष्मी साह

बारा — दाहसंस्कार गरिसकिएका ७० वर्षीय वृद्धमा कोरोना संक्रमण पुष्टि भएपछि प्रहरीले बाराको करैयामाई गाउँपालिका–७ उम्जन गाउँ सोमबार सिल गरेको छ । नेसनल मेडिकल कलेज वीरगन्जमा जेठ २ गते उपचारका लागि भर्ना गरिएकै दिन वृद्धको स्वाब परीक्षणका लागि लगिएको थियो ।

आईसीयूमा उपचाररत उनको जेठ ४ गते मृत्यु भयो । त्यही दिन अस्पतालले मृतकलाई परिवारको जिम्मा लगाएपछि एम्बुलेन्सबाट लगेर दाहसंस्कार गरिएको थियो ।

दाहसंस्कारमा ७० भन्दा बढी मानिस सहभागी थिए । मृत्युअघि नै निकालिएको स्वाबको रिपोर्ट भने सोमबार (आज) आएको जिल्ला प्रहरी कार्यालयका प्रवक्ता डीएसपी गौतम मिश्रले बताए । उनका अनुसार मृतकको कोरोना रिपोर्ट पोजिटिभ आएको छ । 'रिपोर्टअघि नै दाहसंस्कार गरिएको रहेछ,’ उनले भने, 'त्यसैले मृतकको गाउँ वरिपरि तारबार गरी सिल गरेका हौं ।’

गाउँ नजिकैको खोला गरिएको दाहसंस्कारमा सहभागी मलामी, मृतकका परिवार लगायतका गाउँलेलाई घरमै बस्न निर्देशन दिइएको उनले बताए । प्रहरीले कसैलाई बाहिर आउजाउ गर्न दिएको छैन । उनका अनुसार मृतकको सम्पर्कमा रहेकाहरुको ‘कन्ट्याक्ट ट्रेसिङ’ भइरहेको छ ।

ज्वरोले सिकिस्त भएपछि परिवारले उनलाई कोल्हवी बजारबाट एम्बुलेन्समार्फत जेठ २ गते नेसनल मेडिकल कलेज लगेका थिए । ‘चिकित्सकले कोरोना जाँचको विषयमा केही भनेनन्,’ मृतकका छोराले भने, ‘अस्पतालले दाहिने ‘लङ्ग्स डिस्ट्रोए’ (फोक्सोमा खराबी) भएर निमोनिया भएको भन्दै उपचार गर्न थाले, उपचारकै क्रममा बुवाको मृत्यु भएपछि हामीलाई जिम्म्मा लगाए ।’

स्वाब लिए/नलिएको पनि आफूहरुलाई जानकारी नदिइएको छोराको भनाइ छ । अस्पतालको लापरबाहीले परिवारले दुःख भोग्नु परिरहेको उनले बताए । ‘बुवा गाउँकै स्वास्थ्यचौकीबाट धेरै वर्षपहिले रिटायर्ड स्वास्थ्यकर्मी हुनुहुन्थ्यो, अहिले पनि हट्टाकट्टा नै हुनुहुन्थ्यो,’ उनले भने, ‘घरको भर्‍याङबाट लड्दा घुँडामा चोट लाग्यो, त्यसपछि ज्वरो र खोकी आएको थियो ।'

सम्बन्धित समाचार

८ दिनअघि मृत्यु भएका बाराका एक व्यक्तिमा कोरोना पोजिटिभ

प्रकाशित : जेष्ठ १२, २०७७ १५:२४
पूरा पढ्नुहोस्
प्रतिक्रिया
पठाउनुहोस्
×