बारामा एक पत्रकारमा कोरोना संक्रमण

लक्ष्मी साह

बारा — बाराको कलैयामा रहेको एक एफएम रेडियोमा कार्यरत ३८ बर्षीय पुरुष पत्रकारमा सोमबार कोरोना पोजेटिभ देखिएको छ । बाराकै करैयामाई गाउँपालिका–५ तेतरीया निवासी पत्रकारले आफूलाई एकसाता अघि ज्वरो र सुख्खा खोकी लागेपछि तातोपानी खाँदै घरमै एक्लै बस्दै आएको बताए । 

‘परिवारबाट अलग्गै बस्थें, घरेलु औषधिसहित नजिकैको करैयामाई स्वास्थ्य चौकीबाट एन्टिबायोटिक र एलर्जीको औषधि खाएको थिएँ,’ उनले भने, ‘कमजोरी महसुस हुँदै जाँदा स्वास्थ्यकर्मीको सल्लाहमा चिनी जाँचसमेत गराएँ, सोमबार कोरोना पोजेटिभको रिपोर्ट आयो । यो सिलसिला दुई सातादेखि चल्दै आएको थियो । रिपोर्ट आउनुअघि नै कोरोना लागेको महसुस भइसकेको थियो ।’ तातो पानी र घरेलु औषधि खाँदा राहत महसुस हुँदै आइरहेको उनले बताए । उनलाई स्थानीय प्रशासनले सम्पर्कमा ल्याएर कलैया अस्पतालको आइसोलेसनमा राखेको छ ।

उनको परिवारलाई भने गाउँकै क्वारेन्टाइन लगिएको छ । अस्वस्थ्य हुनुअघि आफ्नो परिवारलाई गाउँका छिमेकीले घरेलु विवादमा कुटपिट गरेपछि जिल्ला प्रहरी कार्यालय कलैयाको मुद्दा फाँटमा आफू बैशाख १८ देखि ३१ गतेसम्म पटकपटक गएको संक्रमित पत्रकारले टेलिफोनमा बताए । गत शनिबार ती प्रहरी कार्यालयका एक प्रहरी जवानमा कोरानो पोजेटिभ देखिएको थियो । पत्रकारको गत शुक्रबार कलैया अस्पतालमा स्वाबको नमुना संकलन गरिएको थियो । उनीसितै ४२ जना पत्रकारकोसमेत स्वाब संकलन गरिएकोमा टेकु अस्पतालमा परिक्षणपछि एक जनाबाहेक सबैको निगेटिभ देखाएको छ । जिल्लामा एक प्रहरी, एक पत्रकार र तीन जना सर्वसाधारण गरी पाँचजनामा कोरोना पोजेटिभ देखिएको छ ।

प्रकाशित : जेष्ठ ५, २०७७ १९:२९
ADVERTISEMENT
प्रतिक्रिया
पठाउनुहोस्

अतिक्रमित भूमि समेटिएको नेपालको नक्सा मन्त्रिपरिषद्‍द्वारा स्वीकृत

बिनु सुवेदी

काठमाडौँ — मन्त्रिपरिषद्‍ले भूमि व्यवस्था मन्त्रालयले तयार पारेको भारतद्वारा अतिक्रमित भूमि समेटिएको नेपालको नयाँ नक्सालाई स्वीकृत गरेको छ । आइतबारको मन्त्रिपरिषद्‍मा भूमि व्यवस्था मन्त्री पद्मा अर्यालले यो नक्सा प्रस्तुत गरेकी थिइन् ।

सोमबार बसेको मन्त्रिपरिषद् बैठकले लिपुलेक, लिम्पियाधुरा र कालापानी समेटिएको नक्सा स्वीकृत गरेको हो ।

मन्त्रिपरिषद् बैठकका निर्णय सार्वजनिक गर्न आयोजना गरिएको पत्रकार सम्मेलनमा सरकारका प्रवक्ता युवराज खतिवडाले भूमि, व्यवस्था, सहकारी तथा गरिबी निवारण मन्त्रालयले प्रस्ताव गरेको नेपालको अद्यावधिक नक्सा स्वीकृत गरिएको जानकारी दिए । नयाँ नक्सामा नेपाली भूमि लिपुलेक, कालापानी र लिम्पियाधुरा समेटिएको र अन्य अन्तर्राष्ट्रिय सीमाहरु यथावत रहेको उनले बताए । उनले भने, ‘लिम्पियाधुरा, लिपुलेक र कालापानी क्षेत्र समेटिएको छ । संघीयता अनुरुपका प्रदेश र स्थानीय तहहरु समेटिएका छन् । अन्य अन्तर्राष्ट्रिय सीमाहरु यथावत रहेका छन् ।’ उनले निशान छाप, सरकारी कामकाज र विद्यालय लगायत सम्पूर्ण क्षेत्रमा अद्यावधिक नक्सा नै प्रयोग हुने बताए ।

भारतले गत नोभेम्बरमा जारी गरेको आफ्नो नयाँ राजनीतिक नक्सामा नेपाली भूमि लिम्पियाधुरा समेटेको थियो । पछिल्लो समय नेपाली भूमि हुँदै चीनको मानसरोबरसम्म जाने सडक निर्माण गरेपछि त्यसको चर्को विरोध भएको थियो ।

अर्थमन्त्री रहेका प्रवक्ता खतिवडाले निश्चित समयमै आगामी आर्थिक वर्षको बजेट आउने बताए । एक महिनाअघि गरिएको आर्थिक क्षेत्रको अनुमान फरक पर्दै गएको उल्लेख गर्दै उनले एक/दुई दिनभित्रै बजेटको आकार तयार हुने र अर्थतन्त्रलाई कसरी उकास्न सकिन्छ भन्ने कुरा पनि टुंगो लाग्ने बताए ।

प्रकाशित : जेष्ठ ५, २०७७ १९:२३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×