रौतहटमा धेरैजसो संक्रमित भारतबाटै आएका

सोमबार पुष्टि भएकामा पनि एक महिला मात्र भारत गएकी होइनन् । उनको परिवारका अरू सबैको रिपोर्ट नेगेटिभ छ ।
शिव पुरी

रौतहट — मजदुरीका लागि भारत जानुपर्ने बाध्यता नै यति बेला जिल्लावासीमा कोरोना संक्रमणको मुख्य कारण देखिएको छ । यहाँ अहिलेसम्म कोरोनाका २१ बिरामी फेला परेका छन् । तीमध्ये धेरैजसो भारतबाट फर्किएकाहरू नै छन् । 

आइतबार र सोमबार रौतहटमा १८ जना संक्रमित भेट्टिएका छन् । तीमध्ये १७ जना भारतबाटै आएका हुन् । सोमबार ईशनाथ नगरपालिकाका सात जनामा कोरोना पुष्टि भएको छ । संक्रमित अर्की महिला माधवनारायण नगरपालिकाकी हुन् । उनी भने भारत गएकी होइनन् ।

ईशनाथका संक्रमित तीन जना मुम्बईबाट, दुई जना दिल्ली तथा एक–एक हरियाणा र कानपुरबाट आएका हुन् । उनीहरू देश आइपुग्नासाथ सोझै क्वारेन्टाइनमा बसेका हुन् । संक्रमितहरू वैशाख २५, ३१ र जेठ १ गते क्वारेन्टाइनमा आएको ईशनाथ नगरपालिकाका स्वास्थ्य शाखा सहायक शशि पटेलले बताए ।

‘भारतबाट विभिन्न माध्यमबाट सीमाक्षेत्र आएर चोरबाटो नेपाल प्रवेश गरेका उनीहरू घर नगई सिधै क्वारेन्टाइन आएका थिए,’ उनले भने, ‘संक्रमितहरू समुदायमा गएका छैनन् । उनीहरूको स्वास्थ्य अवस्था सामान्य छ ।’ ईशनाथको जनता मावि क्वारेन्टाइनमा अहिले भारतबाट आएका ४८ जना छन् । तीमध्ये २७ जनाको शुक्रबार पीसीआर टेस्टका लागी स्वाब लगिएकोमा आइतबार १० जनामा कोरोना पुष्टि भएको थियो । .तीन जनालाई आइतबारै गौरस्थित अस्पतालको आइसोलेसन वार्डमा लगिएको छ । यो नगरमा संक्रमितको संख्या ११ पुगेको छ । सबैभन्दा पहिला भेटिएका एक जना वीरगन्जमा उपचार गराइरहेका छन् ।

सोमबार कोरोना पुष्टि भएकी माधवनारायण–२ की महिला पनि वैशाख २६ देखि क्वारेन्टाइनमा थिइन् ।भारतमा मजदुरी गर्न गएका उनका बहिनी ज्वाइँ वैशाख २५ गते ससुराली आएपछि उनीसहित परिवारका १३ सदस्यलाई क्वारेन्टाइनमा राखेर पीसीआर टेस्टका लागि स्वाब पठाइएको थियो । तर भारतबाट आएका पुरुष, उनकी पत्नी र दुईमहिने बालकको रिपोर्ट नेगेटिभ आएको छ ।

जेठीसासूमा भने संक्रमण देखिएको हो । उनको एक वर्षकी काखे छोरी र अर्की १० वर्षकी छोरी छिन् । दुवैको रिपोर्ट नेगेटिभ आएको स्वास्थ्य संयोजक प्रमोदकुमार साहले बताए । यहीँ बसेकी महिलालाई संक्रमण भएको देख्दा आफूहरू आश्चर्यमा परेको उनले सुनाए ।

जिल्लाका विभिन्न क्वारेन्टाइनमा अहिले पनि भारतबाट फर्केका ४ सयभन्दा बढी छन् । धान काट्ने र रोप्ने समयमा ठूलो संख्यामा जिल्लाबासी रोजगारीका लागि सीमापारि जाने गरेका छन् । उनीहरू ६–७ महिनापछि फर्कन्छन् । तर अहिले भारतमा पनि संक्रमण बढ्दै गएको र लकडाउनले रोजगारी गुमेपछि सबै जना देश फर्कन हतारिएका छन् ।

प्रकाशित : जेष्ठ ५, २०७७ १४:२५
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

भेरी नदीले बगाउँदा बालिका बेपत्ता 

कान्तिपुर संवाददाता

सल्यान — भेरी नदीले बगाउँदा  बन्गाड कुपिण्डे नगरपालिका–१ घाटगाउँ निवासी प्रेम विककीे १० वर्षीया छोरी लक्ष्मी विक बेपत्ता भएकी छिन् । आइतबार बेलुकी सात बजे साथीहरुसँग पानी लिन गएको समयमा चिप्लिँदा विकलाई भेरीले बगाएको थियो । 



आइतबार रातिको समयमा खोजी गर्न नसकेपछि बेपत्ता बालिकाको सोमबार बिहानैदेखि इलाका प्रहरी कार्यालय सल्लीबजारको टोली र स्थानीय द्वारा खोजी भइरहेको जिल्ला प्रहरी कार्यालय सल्यानले जनाएको छ । भेरी नदी धमिलो र पानीको सतह बढेकाले बालिकालाई बगाएको हुनसक्ने जिल्ला प्रहरी कार्यालय सल्यानका प्रमुख नायब उपरिक्षक ढकेन्द्र खतिवडाले बताए । नदी धमिलो भएकाले बेपत्ता भएकी बालिकाको खोजी गर्न कठिनाइ भएको उनको भनाइ छ ।

भेरी नदीको किनारमा रहेको बस्ती घाटगाउँमा मुहान तथा खानेपानीको सुविधा नभएपछि विगतदेखि सय बढी घरपरिवार रहेका स्थानीय भेरी नदिको प्रदुषित पानी खान बाध्य हुँदै आएका छन् । भेरी नदी गहिरो भएकाले जोखिम उठाएर पानी ल्याउनुपर्ने बाध्यता रहेको स्थानीयले बताएका छन् । खानेपानी तथा सरसफाइको लागि भेरी नदीमा जाने क्रममा वर्षैपिच्छे स्थानीय बालबालिका बगेर बेपत्ता हुँदै आएको स्थानीयले बताए ।

प्रकाशित : जेष्ठ ५, २०७७ १४:११
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×