कोरोना संक्रमितको उपचार गौरमै

शिव पुरी

रौतहट — रौतहटको राजपुर र इशनाथ नगरपालिकाको दश जना कोरोना संक्रमितलाई जिल्लामै उपचारको व्यवस्था मिलाइएको छ । उनीहरुलाई आइतबार राति जिल्लाको गौर नगरपालिकास्थित गौर नर्सिङ इन्स्टिच्युटको आइसोलेसन वार्डमा ल्याइएको छ  ।

जिल्लामा कोरोना संक्रमतिको संख्या २१ पुगेको छ । सोमबार बिहान मात्रै ईशनाथ र माधवनारायण नगरपालिकामा ८ जनामा सक्रमण देखिएको छ ।

राजपुर नगरपालिका–९ का १८, ३२, ३६, ३९, ३९, ४२, ४८ वर्षीय पुरुषहरुमा कोरोनाको संक्रमण देखिएपछि उनीहरुलाई जिल्लामै उपचार सुरु गरिएको हो । त्यस्तै ईशनाथ नगरपालिका ३ र ५ नम्बर वडाका २८, ३० र ३३ वर्षीय पुरुषलाई पनि नर्सिङ इन्स्टिच्युटको आइसोलेसन वार्डमा राखिएको छ ।

संक्रमितहरु पाँच दिनअघि मात्र भारतको मुम्बई र केरलाबाट घर आएका थिए । प्रमुख जिल्ला अधिकारी बासुदेव घिमिरेले संक्रमण देखिएका सबैलाई जनकपुर वा वीरगन्ज पठाइने भन्ने छलफल भए पनि पछि आफ्नै जिल्लामा राख्ने निर्णय भएको बताए ।

‘हामीले जिल्लाकै गौर नर्सिङ इन्स्टिच्युटको आइसोलेसन वार्डमा दशै जनालाई उपचारका लागि ल्याएका छौं,’ उनले भने, ‘यही चिकित्सकको निगरानीमा उपचार गराइने छ । अहिले सबैको स्वास्थ्य अवस्था समान्य छ । प्रक्रियातिर लाग्दा ल्याउन ढिला भएको हो ।’ स्थानीय प्रशासनले नर्सिङ इन्स्टिच्युटमा २५ बेडको आइसोलेसन वार्ड तयारी हालतमा राखेको थियो । सुरुमा यसलाई क्वारेन्टाइनको रुपमा सञ्चालनमा ल्याइएको थियो । त्यहाँ रहेका केहीलाई अन्यन्त्र सारेर आइसोलेसन वार्ड बनाइएको हो ।

संक्रमित सबै पाँच दिनअघि मात्र भारतको मुम्बई, गुजरात र केरलाबाट घर फर्केका थिए । रोजगारीका लागि गएका उनीहरु कोभिड–१९ को संक्रमण बढ्न थालेपछि दैनिक जीवन कष्टकर बनेकाले घर फर्केका हुन् । जिल्लाका विभिन्न स्थानमा रहेको क्वारेन्टाइनमा अहिले भारतबाट फर्केका ४ सय ३९ जनालाई राखिएको जिल्ला प्रशासन गौरले जानकारी दिएको छ । यसअघि वृन्दावन र देबाही र ईशनाथका ३ जना संक्रमितलाई वीरंगन्जस्थित नारायणी अस्पतालको आइसोलेसनमा लगिएको थियो । सोमबार थप ८ संक्रमितलाई कहाँ राख्ने भन्ने निर्णय भइनसकेको प्रजिअ घिमिरेले सुनाए ।

प्रकाशित : जेष्ठ ५, २०७७ १०:०६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

कोरोनाबाट मृत्यु भएकी महिलाकाे शिशुसहित परिवारकाे रिपोर्ट नेगेटिभ

४८ घण्टामा बल्ल नतिजा, १४ दिन क्वारेन्टाइनमा राखिने 
नगेन्द्र अधिकारी

काभ्रे — कोरोना संक्रमणका कारण मृत्यु भएकी २९ वर्षीया सुत्केरी महिलाको १३ दिने शिशु र परिवारका अन्य सदस्यको पीसीआर रिपोर्ट नेगेटिभ आएको छ । मृतक सिन्धुपाल्चोक–९ की २९ वर्षीया महिलामा कोरोना संक्रमण पुष्टि भएपछि शिशुसहित मृतकको श्रीमान, माइतीतर्फको आमा र बहिनीको पनि नमुना संकलन भएको थियो । 

सामान्यता ४ घण्टा आउने परीक्षणको नतिजा आउन ढिलाइ हुँदा आइसोलेसनमा रहेका उनीहरु ४८ घण्टादेखि तनावमा थिए । रिपोर्ट ढिला हुँदा कुनै उपचारसमेत सुरु नगरिएको मृतकको बहिनीले टेलिफोनमा जानकारी दिइन् । शिशुलाई ल्याक्टोजिन खुवाएर राखिएको छ ।

नतिजा नेगेटिभ आएपछि १४ दिन क्वारेन्टाइनमा राख्ने गरी सिन्धुपाल्चोकको प्रशासन र स्वास्थ्य कार्यलयको समन्वयमा पठाउन लागिएको जिल्ला कमाण्ड पोस्टका सदस्यसमेत रहेका वरिष्ठ स्वास्थ्य प्रशासक डाक्टर नरेन्द्रकुमार झाले जानकारी दिए ।

श्वासप्रस्वासमा समस्या आएपछि धुलिखेल अस्पताल ल्याउँदै गर्दा बाह्रबिसे–९ निवासी ती सुत्केरीको मृत्यु भएको थियो । कोरोना संक्रमणको आशंकामा गरिएका आरडीटी र पीसीआर परीक्षणका रिपोर्ट शनिबार पोजिटिभ आएको थियो । त्यसपछि बिहीबारदेखि अस्पतालको गार्ड रुममा अलग्गै राखिएका शिशुसहित परिवारका सदस्यलाई धुलिखेलस्थित क्वारेन्टाइनमा राख्न लागिएकोमा प्रशासनले आइसोलेसनमा राख्न निर्देशन दिएको थियो ।

धुलिखेल अस्पतालका प्रशासकीय निर्देशक डाक्टर रमेश माकजूले शिशुसहित परिवारका सदस्यको रिपोर्ट आउन केही ढिलाइ भएको स्विकारे । ‘टेकुबाट ५ सयभन्दा बढी नमुना आएको थियो, ल्याबका साथीहरुले पहिला त्यसलाई प्रोसेस गर्नुभएछ, दोस्रो लटमा परेका कारण केही ढिलाइ भएको हो,’ गल्ती भएको स्विकार्दै उनले भने, ‘बच्चाको केसलाई प्राथमिकता दिनुपर्ने हो, दोस्रो लटमा हालेका कारण केही ढिलाई पक्कै भयो ।’ एक पटकमा ९० नमुना परीक्षण गर्न सक्ने मेसिनले ४ घण्टामा नतिजा दिन सक्छ ।

प्रकाशित : जेष्ठ ५, २०७७ १०:०३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×