संक्रमण रोकथाम गर्न ७८ लाखको स्वास्थ्य सामाग्री- प्रदेश २ - कान्तिपुर समाचार

संक्रमण रोकथाम गर्न ७८ लाखको स्वास्थ्य सामाग्री

लक्ष्मी साह

बारा — कारोना संक्रमण रोकथाम तथा नियन्त्रण गर्ने उदेश्यले दातृ निकाय युनिसेफले प्रदेश २ का अस्पतालहरुलाई ठुलो मात्रामा सरसफाई तथा स्वास्थ्य सामाग्री शुक्रबार उपलब्ध गराएको छ ।

कारोना नियन्त्रणको रोकथाममा अग्रभागमा सेवा दिइरहेका स्वास्थ्य तथा सरसफाईकर्मीहरुलाई बुटदेखि बेसिनसम्मको सहयोग उपलब्ध गराएको हो । अस्पतालहरुमा त्यस्ता सामाग्रीहरुको अभाव भइरहँदा अन्तर्राष्ट्रिय गैरसरकारी संस्थाले त्यस्ता सामाग्री दिएर सहयोग गरेका हुन् ।

सप्तरीदेखि पर्सासम्मका ८ जिल्लाका १३ वटा सरकारी तथा सामुदायिक अस्पताललाई स्थानीय सेवाप्रदायक संस्था मार्फत १३ प्रकारका स्वास्थ्य सामाग्री उपलब्ध गराइएको जनजागरण युवा संस्थाका अध्यक्ष भैयाराम यादवले जानकारी दिए । ‘अस्पतालमा स्वास्थ्यकर्मीलाई हात धुने व्यवस्थित बेसिन थिएन, बुट थिएन, अब यो सामान उपलब्ध भएपछि सहयोग मिलेको छ,’ कलैया अस्पतालका मेडिकल सुपरिटेन्डेड वीरेन्द्र मण्डलले भने ।

युनिसेफअन्तर्गत सञ्चालित खानेपानी तथा सरसफाई कार्यक्रम प्रदेश २ का प्रमुख बोधनारायण श्रेष्ठकाअनुसार भारतीय सीमासित जोडिएका प्रदेशका कोरोना जोखिम जिल्लाहरुमा एकातिर संक्रमण बढ्दै जानु र अर्कोतिर स्वास्थ्य सामाग्री अभाव रहेकोले त्यसको पुर्तिका लागि सहयोग गरिएको छ ।

‘यसले कोभिड–१९ रोगको उपचारमा मद्दत पुर्‍याउन र कोरोनासितको लडाईमा सहयोग मिल्ने विश्वास छ,’ उनले भने, ‘७८ लाख बराबरको संक्रमण रोकथाम तथा नियन्त्रण सामाग्री उपलब्ध गराइएको छ ।’

प्रकाशित : जेष्ठ २, २०७७ २०:२१
प्रतिक्रिया
पठाउनुहोस्

नीति तथा कार्यक्रम राम्रो तर कार्यान्वयनमा चुनौती : अध्यक्ष दाहाल

कान्तिपुर संवाददाता

काठमाडौँ — सत्तारुढ नेकपाका अध्यक्ष पुष्पकमल दाहालले सरकारले ल्याएको नीति तथा कार्यक्रम कार्यान्वयनमा चुनौती रहेको बताएका छन् । राष्ट्रपति विद्यादेवी भण्डारीले संघीय संसदको संयुक्त बैठकमा शुक्रबार नीति तथा कार्यक्रम प्रस्तुत गरेपछि अध्यक्ष दाहालले नीति तथा कार्यक्रम राम्रो भएको तर कार्यान्वयनमा चुनौती रहेको प्रतिक्रिया दिए ।

संघीय संसद भवनमा संचारकर्मीलाई संक्षिप्त प्रतिक्रिया दिँदै दाहालले नीति तथा कार्यक्रममा आफ्नो समर्थन रहेको तर कार्यक्रम कार्यान्वयनमा चुनौति रहेको बताएका हुन् । उनले भने, ‘चुनौती कार्यान्वयनको छ । मलाई लाग्छ यो कार्यान्वयन गर्न सकियो भने मुलुकले राम्रो गति लिन्छ ।'

नेकपाका सांसद जनार्दन शर्माले कोरोना भाइरसको महामारीले अर्थतन्त्रमा पार्ने प्रभावको मुल्यांकन भएपछि मात्रै नीति कार्यक्रमले कस्तो गति लिन्छ भन्ने अनुमान गर्न सकिने बताए । उनले अहिलेको अवस्थामा नीति कार्यक्रम राम्रो आएको तर कार्यान्वयनमा चुनौति रहेको बताए ।

‘कोरोनाको महामारीले विश्व अर्थतन्त्रमा पार्ने प्रभाव, त्यसबाट नेपालमा पर्ने प्रभाव अझै कस्तो हुन्छ भन्न सकिँदैन । त्यो प्रभावको समग्र मुल्यांकनपछि यो नीति तथा कार्यक्रमले कस्तो गति लिन्छ भन्ने कुराको अनुमान गर्न सकिन्छ,' नेता शर्माले भने, 'अहिलेलाई नीति कार्यक्रम हामीले सुन्यौं त्यो राम्रो छ । सबै क्षेत्रलाई समेटेको छ फेरि पनि कार्यान्वयनका चुनौतिहरू हाम्रा अगाडि छन् ।’

प्रकाशित : जेष्ठ २, २०७७ २०:१७
पूरा पढ्नुहोस्
प्रतिक्रिया
पठाउनुहोस्
×