चोरबाटोबाट नेपाल प्रवेश गर्नेलाई रोक्न सीमाक्षेत्रमा थपियो सुरक्षा पोस्ट

नेपाल प्रहरी र सशस्त्रले संयुक्त रुपमा नेपाल-भारत सीमाक्षेत्रमा गस्ती गरिरहेका छन्
शिव पुरी

रौतहट — भारतका विभिन्न सहरबाट फर्केकाहरु सीमाक्षेत्रको चोरबाटो हुँदै छिर्न थालेपछि सशस्त्र प्रहरी ११ नम्बर हेडक्वार्टर गण रौतहटले अस्थायी सुरक्षा पोस्ट थपेर निगरानी बढाएको छ। लकडाउनकै बीच सीमाक्षेत्रबाट मानिसहरु प्रवेश गर्न थालेको सूचनापछि पोस्ट थपिएको हो।

भारतमा पनि लकडाउन कायमै रहेको अवस्थामा रोजगारीका लागि गएकाहरु हिँडेर सीमा प्रवेश गरेका थिए। ‘भारतबाट पैदल आएर चोरबाटो हुँदै नेपाल प्रवेश गर्नेलाई तत्कालै नियन्त्रणमा लिन चौबीसै घन्टा गस्ती बढाएका छौं,’ प्रदेश २ का सशस्त्र प्रहरी प्रमुख डीआईजी राजु अर्यालले भने, ‘पोस्ट थपेर सुरक्षाकर्मीलाई तैनाथ गरिएको छ।’


रौतहटमा भारतसँग सीमा जोडिएको ३२ किलोमिटर खुला क्षेत्र छ। भारतबाट फर्कनेहरु यहीँबाट छिर्ने गरेका थिए। बौधीमाई नगरपालिको छोटी भन्सार, ईश्नाथको मावि मठिया भवन, घिउरा कान्ति आधारभूत भवन, राजदेवीको सामुदायिक भवन, गौरको माहादेवपट्टि र कानुपट्टिमा अस्थायी सुरक्षा पोस्ट स्थापना गरिएको सशस्त्र प्रहरी बल नेपाल ११ नम्बर गण हेडक्वार्टर प्रमुख एसपी रवीनराज कर्णिकारले बताए।




प्रदेश २ का विभिन्न जिल्लाका खुला नाका प्रयोग गरेर भारतबाट आउने क्रम नरोकिएपछि नेपाल प्रहरीले पनि सीमा नाकामा थप चेकपोस्ट खडा गरेको छ। यसअघि प्रदेशका नाकामा १ सयको हाराहारीमा चेकपोस्ट रहेकोमा त्यसलाई बढाएर ३ सय २९ पुर्‍याइएको प्रदेश प्रहरी प्रमुख डीआईजी प्रधुम्न कार्कीले बताए। ‘नेपाल प्रहरी र सशस्त्रले संयुक्त रुपमा सीमाक्षेत्रमा गस्ती गरिरहेका छन्। अब चोरबाटो प्रयोग गरेर प्रवेश गर्छु भनेर नसोचे हुन्छ,’ उनले भने।

प्रकाशित : चैत्र २५, २०७६ १८:१४
ADVERTISEMENT
प्रतिक्रिया
पठाउनुहोस्
ADVERTISEMENT

कोभिड–१९ विरुद्धको प्रतिकार्यका लागि विश्‍व बैंकको ३ अर्ब बढी सहयोग

रासस

काठमाडौँ — विश्व बैंकले कोभिड–१९ आपत्कालीन प्रतिकार्य स्वास्थ्य प्रणाली तयारी परियोजनाका लागि नेपाल सरकारलाई ३ अर्ब ४८ करोड सहुलियतपूर्ण ऋण उपलब्ध गराउने भएको छ । ऋण सहयोगसम्बन्धी समझदारीपत्रमा मंगलबार विश्व बैंकका देशीय प्रबन्धक फारिस हदाद जेर्भोस र अर्थसचिव शिशिरकुमार ढुङ्गानाले हस्ताक्षर गरे ।  

विश्व स्वास्थ्य सङ्गठनको मापदण्डअनुसारका स्वास्थ्य सामग्री र उपकरण खरिद, सघन उपचार कक्ष र ‘आइसोलेसन वार्ड’स्थापना, देशका विभिन्न भागमा अवस्थित अस्पताल, प्रयोगशाला तथा स्वास्थ्य संस्थाको स्तरोन्नतिमा उक्त रकम खर्च गरिनेछ । परियोजना स्वास्थ्य तथा जनसङ्ख्या मन्त्रालयले कार्यान्वयन गर्नेछ । आजैदेखि उक्त परियोजना लागू हुनेछ । तीन साताको अवधिमा परियोजनामा लगानी गर्नेसम्बन्धी सम्पूर्ण काम पूरा भएको अर्थ मन्त्रालयले जनाएको छ ।

सचिव ढुङ्गानाले कोरोना भाइरसका कारण उत्पन्न अकल्पनीय परिस्थितिमा अन्तर्राष्ट्रिय विकास सङ्गठन (आइडीए)बाट बैंकले सहुलियतपूर्ण ऋण उपलब्ध गराएकामा हार्दिक आभार व्यक्त गर्दै स्वास्थ्य क्षेत्रमा केन्द्रित रहेर भविष्यमा पनि बैंकले सहायतालाई निरन्तरता दिने विश्वास व्यक्त गरे ।

यसैबीच, भिडियो कन्फ्रेन्सिङको माध्यमबाट आजै केही आर्थिक पत्रकारहरूसँग कुरा गर्दै देशीय प्रबन्धक हदादले कोभिडविरुद्ध नेपाल सरकारले समयमै चालेका सुरक्षात्मक कदमको सराहना गरे । नेपालका विकासका साझेदारसँगको समन्वयमा बैंकले कोभिड–१९ बाट नेपालको अर्थतन्त्रमा पर्ने प्रभावको अल्प, मध्य र दीर्घकालीन मूल्याङ्कन गर्ने जानकारी दिँदै उनले पर्यटन, विप्रेषण, श्रम, व्यापार एव रोजगारीका क्षेत्रलाई गतिशील तुल्याउन बैंकले थप सहयोग गर्ने बताए ।

आगामी शुक्रबार अर्थमन्त्री, नेपाल राष्ट्र बैंकका गभर्नर, एशियाली विकास बैंक, एशियाली पूर्वाधार विकास बैंक, अन्तर्राष्ट्रिय मुद्राकोष र विश्व बैंकका उपाध्यक्षले सामूहिकरुपमा स्थितिको विश्लेषण गरी भावी सहयोगको रुपरेखा तयार पार्ने जानकारी उनले दिए । उनले नेपालको आर्थिक विकासको संवाहक निजी क्षेत्र र साना तथा मझौला उद्योगलाई पनि बैंकले सघाउने बताए ।

प्रकाशित : चैत्र २५, २०७६ १८:११
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×