लकडाउन उल्लंघन गर्नेलाई उठबसदेखि ‘पुसअप’ सम्म

शिव पुरी

रौतहट — कोरोना भाइरस (कोभीड–१९) को संक्रमण फैलिन नदिन सरकारले घोषणा गरेको लकडाउन उल्लंघन गर्नेहरुलाई प्रहरीले सडकमै कारबाही गर्न थालेको छ । बिना पास र जुनसुकै बेला पनि घरबाट बाहिरिन थालेपछि स्थानीय प्रशासनले आइतबारदेखि निषेधाज्ञा जारी गरेको थियो । निषेधाज्ञासमेत उल्लंघन भएको भन्दै प्रहरीले जाँचमा कडाइ गरेको हो ।सोमबार टिपर, जिप,मोटरसाइकल,साइकल र पैदलयात्रीहरु प्रहरीको यस्तो कारबाहीमा परे ।

पूर्वपश्चिम राजमार्गमा लकडाउन उल्लंघन गरी यात्रा गर्दै गरेकालाई प्रहरीले सडकमै सटअप, पुसअप, मुर्गा बनाउने तथा सुताउने काम गरेको थियो । लकडाउनको सुरुवाती दिनमा प्रहरीले सम्झाइबुझाइ घर फर्काउने गरेको थियो ।सर्वसाधरणले विभिन्न बाहानामा यसको अवज्ञा गरेपछिसोमबारबाट झनै कडाइ गरिएको हो ।चन्द्रनिगाहपुरस्थित इलाका प्रहरी कार्यालयबाट खटिएको टोलीले लकडाउन उल्लंघन गरेर सडकमा निस्किएकाहरुलाई उठबस र पुसअप गराउने अलावा सडकमै लामो समयसम्म उभ्याएरसमेत राखेको थियो । यस्तो कारबाहीमा स्थानीय तथा बाहिरी जिल्लाबाट बिना पास आउनेहरु पनि परेका छन् ।

एम्बुलेन्सलगायत अन्य अत्यावश्यक सावरी साधन,औषधि किन्न हिँडेकाबाहेकबिना काम सडकमा निस्कनेलाई कारबाही गरेको प्रहरीजनाएको छ । जिल्लाभर पास बाहेकका अन्य सवारी साधनलाई चल्न दिइएको छैन । बिना पास सडकमा गुड्ने केही सवारीलाई भने नियन्त्रण लिएको चन्द्रनिगाहपुर इलाका प्रहरीका डीएसपी हेमबहादुर शाहीले बताए । ‘मानिसहरु जतिभने पनि मान्दैनन् । प्रहरीले लाठी चार्ज गर्‍योभन्छन् । रोगले मान्छे चिन्दैन,’उनलेभने,‘निषेधाज्ञा जारी हुँदा पनि मानिसहरु बाहिर निस्कन छाडेनन् । त्यसैले कडाई गर्नु परेको हो ।’

स्थानीय प्रशासनले आइतबारबाट मेडिकल स्टोरबाहेक जिल्लाका सबै पसलहरु खोल्न निषेध गरेको छ । सोमबार इलाका प्रशासनमा बसेको बैठकपछि स्थानीय व्यापारीमार्फत घरघरमै खाद्यान्न पुर्‍याउने व्यवस्था मिलाएको छ ।पूर्वपश्चिम राजमार्ग र मुख्य चोकहरुमा ठूलो संख्यामा सुरक्षाकर्मी परिचालन गरिएको छ । ग्रामीण इलाकाहरुमा पनि सशस्त्र र नेपाल प्रहरीको टोलीले नियमित रुपमा मोबाइल गस्ती गर्ने गरेको छ ।

प्रकाशित : चैत्र १८, २०७६ ०७:४९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

लकडाउनले खाद्य संस्थानको चामल बिक्री उच्च

हरि गौतम

रुकुम पश्‍चिम — अरु बेला सरकारी स्वामित्वमा रहेको खाद्य व्यवस्था तथा व्यापार कम्पनीले बेच्ने चामलामा कसैको ध्यान जाँदैन । त्यसैले बजार मूल्यभन्दा सस्तो भए पनि चामल गोदाममै थन्‍किने गर्थ्यो । लकडाउनले भने त्यो चामलको बिक्री उच्च भएको छ ।

सदरमुकाम खलंगाको सल्लेस्थित खाद्य व्यवस्था तथा व्यापार कम्पनीको गोदामबाट सोमबारामात्र १ सय ७० क्विन्टल चामल बिक्री भयो । कार्यालयको रेकर्डअनुसार पछिल्लो १० वर्षमा एकै दिन यति धेरै चामल बिक्री भएको पहिलोपटक हो ।

जिल्लाका मुख्य बजार, स्थानीय तहका केन्द्र तथा स्थानीय तहका बजारहरु लकडाउनका कारण बन्द छन् । दाङबाट खाद्यान्न ढुवानी नभएको डेढ हप्ता भयो । अन्यत्र चामल नपाइने भएपछि कम्पनीको चामल बिक्री ह्वात्तै बढेको हो । बाँफिकोट र त्रिवेणी गाउँपालिका तथा मुसीकोट नगरपालिकाका तीन सहकारीले गाउँभर पुग्ने गरी उक्त चामल लिएका हुन् । बाँफिकोट गाउँपालिकाको झारमारे कृषि सहकारी, त्रिवेणी गाउँपालिकाको पेउघा साना किसान सहकारी तथा मुसीकोट नगरपालिकाको संरक्षण बहुद्देश्यीय सहकारी संस्थाले चामल लगेका छन् । त्यसैगरी व्यक्तिगत रुपमा आएका उपभोक्ताले पनि २० क्विन्टलसम्म चामल लगेका छन् ।

सरकारले लकडाउन लम्ब्याएपछि गाउँलेलाई वितरण गर्न सजिलो हुने भन्दै सहकारीहरुमार्फत एकमुष्ट चामल गाउँ लगिएको हो । यी तीनवटै सहकारीले यसअघि खाद्य व्यवस्था तथा व्यापार कम्पनीसँग चामल बिक्री वितरणको सम्झौता गरेका थिए । यो चामल गाउँमा पनि कम्पनीले तोकेकै मूल्यमा बिक्री हुन्छ । त्यसैले पनि सर्वसाधारणले एकमुष्ट चामल सहकारीलाई ल्याउन अनुरोध गरेर पठाएका बाँफीकोट गाउँपालिका उपाध्यक्ष मनकला पुनले बताइन् । ‘यसअघि पनि खाद्यको चामल सहकारीले सस्तो मूल्यमा सर्वसाधारणलाई बिक्री गर्ने गरेको थियो,’ उनले भनिन्, ‘लकडाउनका बेला अन्यत्र चामल नपाइने र सस्तो पनि हुने भएकाले सहकारीमार्फत चामल ल्याउन भनिएको हो ।’


खाद्य व्यवस्था तथा व्यापार कम्पनीले बेच्ने चामलको मूल्य पनि घटेको छ । हरेक चामलमा प्रति क्विइन्टल १ सय देखि ३ सय रुपैयाँ घटेर चामल बिक्री भइरहेको कम्पनीको शाखा कार्यालयका निमित्त प्रमुख चन्द्रबहादुर खड्काले जानकारी दिए । उनका अनुसार यसअघि प्रतिक्विन्टल ४ हजार २ सयमा बिक्री हुने अरुवा मोटा चामल हाल ४ हजार, ४ हजार ६ सयमा बिक्री हुने अरुवा मन्सुली ४ हजार ४ सय र ५ हजार ७ सयमा प्रतिक्विन्टल बिक्री हुने जिरा मसिनो चामल हाल ५ हजार ६ सयमा बिक्री भइरहेको छ ।

चालु आर्थिक वर्षका लागि शाखा कार्यालयको कोटा एक हजार क्विन्टल हो । हालसम्म ७ सय १० क्विन्टल आएर पनि बिक्री भएको छ । चामलको कोटा सकिए पनि अरु थप्न सकिने निमित्त प्रमुख खड्काले बताए । सामान्य अवस्थामा समेत चामलको कोटा थपिने गरेकामा यस अवस्थामा चामलको अभाव हुन नदिने उनको भनाइ छ ।

कोरोना भाइरसबाट बच्न सतर्कता अपनाउनुपर्ने भएकाले गोदाममा काम गर्नेलाई पनि व्यक्तिगत सुरक्षा सामग्रीको अभाव रहेको खड्काले बताए । विशेष गरी मास्क, ग्लोब्सको जरुरत भएको उनले बताए । मास्क र ग्लोब्स बजारमा सजिलै नपाएपछि समस्या भइरहेको उनले बताए । दैनिकजसो मान्छेको भीड हुने तथा नगद गणना गर्नुपर्ने भएकाले सुरक्षा सामग्रीको आवश्यक्ता देखिएको उनको भनाइ छ । सकेसम्म कम भीडभाड गराएर काम गरिरहेको खड्काले बताए ।

प्रकाशित : चैत्र १८, २०७६ ०७:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×