प्रदेश सरकारले दैनिक ज्यालादारीमा काम गर्नेहरुलाई खानाको व्यवस्था गरिदिने

सन्तोष सिंह

धनुषा — कोरोना भाइरस (कोभिड-१९)को संक्रमण रोक्‍नका लागि जारी लकडाउन अवधिभर प्रदेश २ सरकारले प्रदेशभित्रका गरिब तथा दैनिक ज्यालादारीमा काम गर्ने मजदुरहरूको खानाको व्यवस्था गर्ने भएको छ ।

प्रदेश सरकार मन्त्रिपरिषद्को आइतबारको बैठकले उक्त निर्णय गरेको हो ।

मन्त्रिपरिषद् बैठकले लकडाउनका कारण समस्यामा परेका गरिब र मजदुरको जीवन रक्षाको लागि स्थानीय तहहरूको समन्वयमा खानाको व्यवस्था सरकारको तर्फबाट गर्ने निर्णय गरेको हो ।

उक्त व्यवस्थाका लागि तत्काल खर्च गर्ने गरी महानगरपालिकालाई २५ लाख, उपमहानगरपालिकालाई २० लाख, नगरपालिकालाई १५ लाख र गाँउपालिकालाई १० लाखको दरले रकम पठाउने निर्णय भएको प्रदेश २ सरकारका प्रवक्ता एवं आन्तरिक मामिला तथा कानुनमन्त्री ज्ञानेन्द्रकुमार यादवले जानकारी दिए । प्रदेश सरकारले दिएको रकम बराबर स्थानीय तहलाई पनि उक्त व्यवस्थाका लागि विनियोजन गर्न आग्रह गर्ने निर्णय भएको उनले बताए ।

खानाको लागी प्रत्येक स्थानीय तहमा स्थानीय तहका जनप्रतिनिधि, विभिन्न राजनीतिक दलका प्रतिनिधि, सुरक्षा निकायका प्रतिनिधि, स्थानीय समाजसेवी संस्था सम्मलित सर्वपक्षीय समिति गठनको कार्यविधि तयार पारिएको पनि यादवले जनाए ।

यसका साथै कोरोनाको उपचारमा खटिने चिकित्सकहरूको जीवन बीमाका साथै शतप्रतिशत प्रोत्साहन भत्तासमेत दिने प्रदेश सरकारले निर्णय गरेको छ ।

प्रदेश २ सरकारले कोरोना रोकथामका लागि हालसम्म गरेको प्रयास र अगामी दिनमा लिइने रणनीतिबारे जानकारी गराउन सर्वदलिय बैठकले समेत बोलाएको थियो ।

सर्वदलीय बैठकमा मुख्यमन्त्री लालबाबु राउतसहितका मन्त्रीहरू, कांग्रेस संसदीय दलका नेता रामसरोज यादव, नेकपाका सांसद शत्रुधन महतो, किशोरी साहलगायत सहाभागी थिए ।

प्रकाशित : चैत्र १६, २०७६ १३:१९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

भारतबाट प्रदेश ५ मा २ लाख भित्रिए, ९ सय मात्रै बसे क्‍वारेन्टाइनमा

कोरोना अस्पताल र परीक्षण प्रयोगशाला तयार
घनश्याम गौतम

रूपन्देही — प्रदेश ५ मा कोरोना भाइरस (कोभिड–१९) को संक्रमणबाट जोगिन भारतीय सीमा नाकामा हेल्थ डेस्क राखेर परीक्षण सुरु गरेपछि शनिबार साँझसम्ममा २ लाख १३९ जना नेपाल भित्रिएका छन् ।

खुल्ला सिमाना रहेको प्रदेश ५ का विभिन्न नाकाबाट भित्रिनेको संख्या अहिले पनि बढ्दो छ । सिमानामा राखिएका हेल्थ डेस्कमा सामान्य स्वास्थ्य परीक्षण गरेर घर जानेहरूलाई सम्बन्धित स्थानीय तहहरूले क्वारेन्टाइनमा राख्ने प्रयास गरे पनि अधिकांश सम्पर्कमा आएका छैनन् । कोरोनाको संक्रमण फैलिएको भारतबाट आएकाहरूलाई स्थानीय तहहरूले खोज्दा भेट्टाएका छैनन् ।

प्रदेशको स्वास्थ्य निर्देशनालयको रेकर्ड अनुसार भारतका विभिन्न सहरबाट फर्किएका उनीहरू मध्ये अहिलेसम्म प्रदेश ५ का विभिन्न स्थानीय तहमा झण्डै ५ सय ५० जना मात्र क्वारेन्टाइनमा छन् । बिहीबार र शुक्रबार बेलहिया नाकाबाट भित्रिएका २८ नेपालीलाई तिलोत्तमाको दुर्गादत्त माविको क्वारेन्टाइनमा राखिएको छ ।

प्रदेश ५ का निमित्त प्रहरी प्रमुख नरबहादुर खत्रीले अहिलेसम्म सबै जिल्लामा गरेर १ सय ९० क्वारेन्टाइन स्थापना भएको जानकारी दिए । स्थानीय तहसँगको सहकार्यमा प्रहरीले २ हजार २ सय ९९ बेडका क्वारेन्टाइन स्थापना गरेको छ । ‘अहिले प्रहरी र जनप्रतिनिधिको सहकार्यमा वडास्तरमा बाहिरबाट आएकाको खोजी गर्दै छौं,’ उनले भने, ‘कतिपय स्थानमा बाहिरबाट आएकाहरू घरमै क्वारेन्टाइनमा बसेको भन्ने पनि छ ।’ प्रशासन र स्थानीय तहको सम्पर्कमा आएका र खोजीका क्रममा भेटिएकालाई क्वारेन्टाइनमा राख्ने काम भइरहेको उनले बताए ।
प्रदेशका विभिन्न ४० नाकामा सुरक्षाकर्मीसहितका हेल्थ डेक्स राखिएको छ । सुरक्षाकर्मीको सहयोगमा स्वास्थ्यकर्मीले नाकामा परीक्षण गर्ने गरेको भएपनि ठुलोसंख्यामा भित्रिएका सर्वसाधरण अहिले क्वारेन्टाइन भन्दा घरमै बसिरहेका छन् ।

प्रदेश ५ का स्वास्थ्य निर्देशक डा. विनोद गिरीका अनुसार अहिलेसम्म प्रदेश ५ मा ७७ जना कोभिड–१९ को संक्रमणको आशंकामा अस्पताल पुगेका छन् । ती मध्ये ५२ जनाको स्वाब संकलन गरिएको र २५ जनाको नेगेटिभ रिपोर्ट आएको उनले जानकारी दिए । ‘अझै २७ जनाको रिपोर्ट आउन बाँकी छ,’ उनले भने, ‘हवाई यातायात बन्द भएपछि स्वाब परीक्षणका लागि पठाउन समस्या भएकाले रिपोर्ट आउन पनि ढिलाई हुने गरेको छ ।’

सरकारले प्रदेशका विभिन्न चार स्थानमा स्थापना गरेका कोरोना विशेष अस्थायी अस्पतालमा उपचार गराइरहेका दुई दर्जन बढी शंस्कास्पद बिरामी भएपनि जोखिम नभएको उनले बताए ।

प्रदेश सरकारले प्रदेशमै कोरोना उपचार केन्द्र र प्रयोगशाला स्थापना गरेको छ । भैरहवास्थित भीम अस्पताललाई संक्रमण उपचार अस्पताल र भैरहवाकै गहुँ बाली अनुसन्धान केन्द्रमा प्रदेशस्तरीय प्रयोगशाला स्थापना गरिएको छ ।

अस्पताल संचालमा आइसकेको र प्रयोगशाला आइतबार बेलुका देखि नै संचालनमा आउने सामाजिक विकास मन्त्रालयले जनाएको छ । प्रदेशका सामाजिक विकासमन्त्री सुदर्शन बरालले प्रयोगशालाका सामग्री आइसकेको र अहिले जोड्ने काम जारी रहेकाले आजै साँझ वा सोमबार बिहानदेखि परीक्षण सुरु गरिने बताए ।

‘प्रयोगशाला सञ्‍चालनमा आएपछि तत्कालका लागि कोरोना मात्र परीक्षण भएपनि भविष्यमा अन्य संक्रामक रोगको पनि परीक्षण गर्न सकिनेछ,’ उनले भने, ‘अन्तर्राष्ट्रिय मापदण्ड अनुसारको सुविधासम्पन्न प्रयोगशाला स्थापना हुनेछ ।’ भीम अस्पतालमा भने कोभिड–१९ ‘पोजिटिभ’ बिरामीलाई मात्र उपचार गर्ने गरी ३० बेड तयारी अवस्थामा राखिएको उनले बताए ।

प्रकाशित : चैत्र १६, २०७६ १३:१५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×