तस्करीको चौपाया नियन्त्रण

कान्तिपुर संवाददाता

पर्सा — पर्साको पश्चिमी नाका हुँदै तस्करी गर्न लागिएको भैंसी तथा पाडापाडी नियन्त्रण लिइएको छ । सोमबार राति इलाका प्रहरी कार्यालय पटेर्वा सुगौलीले भारतबाट तस्करी गरी ल्याउँदै गरेको ५० वटा भैंसी तथा पाँडापाडी जगरनाथपुर गाउँपालिका–१ सुपौलीबाट नियन्त्रणमा लिएको हो ।

यसअघि जानकीटोला नाकासम्म मात्र फैलिएको चौपाया तस्करीको जालो हाल त्यसभन्दा पश्चिमतर्फ पुगेको यस घटनाक्रमले देखाएको छ । बरामद भएका चौपायामध्ये १३ वटा थारो भैंसी र ३७ राँगा पाडापाडी छन् । ती चौपाया वीरगन्ज भन्सार कार्यालयले मंगलबार पटेर्वासुगौली गाउँपालिकामा पुगेर लीलामी गरेको थियो । ५० वटा भैंसी रपाडापाडी १२ लाख रुपैयाँमा लीलाम भएको भन्सार कार्यालय स्रोतले जानकारी दिएको छ । हाल भैंसी बरामद भएको नाकाभन्दा पश्चिम ठोरी गाउँपालिका क्षेत्रबाट पनि पछिल्लो समय यस्ता तस्करीका चौपाया नियन्त्रणमा लिने गरिएको थियो । पशु क्वारेन्टाइन कार्यालय वीरगन्जका पशु चिकित्सकहरूको टोली मंगलबार स्थलगत रुपमै पुगेर बरामद भएका चौपायाको स्वास्थ्य परीक्षण गरेर फर्केको थियो । पशु चिकित्सक अरुण कुमार सिन्हाले यति धेरै परिमाणमा भैंसी र पाडापाडी बरामद भएको यो पहिलो पटक रहेको बताए । यसअघि एकै साथ ४४ वटासम्म भैंसी यसरी बरामद भएको र ती हालको भन्दा आकारमा साना रहेको उनले बताए ।


भारतबाट नेपालतर्फ वैधानिक रुपमा पशु निर्यात गर्न भारतीय निर्याकर्ताले त्यहाँस्थित पशु क्वारेन्टाइन कार्यालयको प्रमाणपत्र लिनु आवश्यक हुन्छ । परम्परागत रुपले भारतबाट यस्ता चौपाया नेपाल ल्याउने गरेका चौपाया तस्कर गिरोहले भारतीय क्वारेन्टाइन कार्यालयको प्रमाणपत्र बिनै चौपाया नेपाल भित्र्याउने गर्छन् । यसो गर्दा क्वारेन्टाइन कार्यालयमा बुझाउने राजस्व र नेपालको भन्सार कार्यालयमा लाग्ने भन्सार शुल्क पनि तिर्नु पर्दैन ।


विभिन्न नाकाबाट भित्रिने यस्ता भैंसी र पाडापाडी बाराको परवानीपुर तथा जीतपुरमा लाग्ने भैंसी बजार सम्म पुग्ने गरेका छन् । त्यहाँबाट सोझै राजधानी लग्ने गरिएका छन् । राजधानीमा भैंसीको मासुको माग अत्यधिक छ । त्यहाँको ९० प्रतिशत माग यी दुई भैंसी बजारले धानिरहेका छन् । अधिकांश भारतबाट अवैध रुपमा भित्रिने गरेको छ । प्रकाशित : फाल्गुन ८, २०७६ ०९:१७

प्रतिक्रिया
पठाउनुहोस्

सताक्षी गोल्डकप : मछिन्द्र अन्तिम चारमा

अर्जुन राजवंशी

बिर्तामोड — लिग च्याम्पियन क्लब मछिन्द्र क्लब झिलझिलेमा भइरहेको तेस्रो सताक्षी गोल्डकप फुटबल प्रतियोगिताको सेमिफाइनलमा पुगेको छ । 

मछिन्द्रले बुधबार अन्तिम क्वाटरफाइनल खेलमा रूपन्देहीको गोर्खा ब्वाइज स्पोर्ट्स क्लबलाई २–१ ले पराजित गरेको थियो । शिवसताक्षी नगरपालिका–११ स्थित गणेशमान सिंह अध्ययन प्रतिष्ठानको मैदानमा बुधबारको खेलपछि सेमिफाइनल समीकरण पूरा भएको छ । मछिन्द्रको जितमा विमल घर्तीमगर र विदेशी खेलाडी एन्ड्रेस नियाले गोल गरे । गोर्खा ब्वाइजबाट एक गोल विदेशी खेलाडी काजिमले फर्काए ।

खेलमा अग्रता भने गोर्खा ब्वाइजले लिएको हो । १६ औं मिनेटमा काजिमले आकर्षक गोल गरे । मध्यभागबाट शक्ति राईले विदेशी खेलाडी ओलाकेजीलाई बल दिए । उनले गोलका लागि काजिमलाई पास मिलाइदिएका थिए । गोर्खाको अग्रता १० मिनेट पनि टिकेन । २५ औं मिनेटमा मछिन्द्रले खेल बराबरीमा ल्यायो । रन्जित धिमालको कर्नरमा विदेशी खेलाडी एन्ड्रेसले गोल गरेका थिए । मछिन्द्रले ३२ औं मिनेटमा पेनाल्टीमार्फत गोल थप्यो । मैदानको बायाँ साइडबाट रन्जितले प्रहार गरेको बल बक्सभित्र रहेका गोर्खा ब्वाइजका सरोज योन्जनको हातमा लाग्दा मछिन्द्रले पेनाल्टी पाएको हो । पेनाल्टीमा विमल घर्तीमगरले गोल गरे ।

बराबरी गोल भएपछि गोर्खा ब्वाइजका खेलाडीले तालमेल गुमाए । २४ औं मिनेटमा ब्वाइजका ओलाकेजीले बक्स नजिकैबाट गरेको प्रहार पोस्टको थोरै माथिबाट बाहिरियो । ४० औं मिनेटमा गोर्खा ब्वाइजका काजिमले गरेको प्रहार फितलो बन्यो । लगत्तै ओलाकेजीको सशक्त प्रहार आकासिएको थियो । ४९ औं मिनेटमा गोर्खा ब्वाइजका ओलाकेजीको पासलाई निराज बस्नेतले हेड गर्न भ्याएनन् ।

५१ औं मिनेटमा मछिन्द्रका विमलको प्रहार गोर्खा ब्वाइजका गोलकिपर सोजित गुरुङले नियन्त्रणमा लिए । चार मिनेटपछि रन्जित धिमालको कर्नरमा एडेलाजा सोमिडेले गरेको हेड गोलकिपर सोजितले आकर्षक ढंगमा बचाए । ६३ औं मिनेटमा गोर्खाका निराज बस्नेतको फ्रिकिक प्रहारमा काजिमको हेड खेर गयो । मछिन्द्रका दीपक राईको कडा प्रहार ७८ औं मिनेटमा गोर्खाका गोलकिपर सोजितले पन्च गरे । फर्किएको बललाई विमल घर्तीमगरले सशक्त प्रहार गरे पनि पोस्ट माथिबाट बाहिरिएको थियो । मछिन्द्रका गोलकर्ता विमल घर्तीमगर म्यान अफ द म्याच घोषित भए ।

प्रकाशित : फाल्गुन ८, २०७६ ०९:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×