खाद्य गोदाम ७ वर्षदेखि अलपत्र

कान्तिपुर संवाददाता

(पर्सा) — ठेकेदारले बीचमै काम छोडेपछि खाद्य व्यवस्था तथा व्यापार कम्पनी लिमिटेड वीरगन्ज शाखा परिसरमा निर्माणाधीन गोदाम ७ वर्षदेखि अलपत्र परेको छ । 

ZenTravel

शाखा परिसरको पश्चिम उत्तरी कुनामा १ हजार मेट्रिक टन अन्न भण्डारण क्षमताको ३० मिटर लामो २० मिटर चौडा गोदाम भवन निर्माणाधीन थियो । भवनको ठेक्का श्री स्वस्तिक र श्री विनायक कन्स्ट्रक्सनले पाएका थिए । २०६९ फागुनमा निर्माण बीचमै छाडेर ठेकेदार कम्पनी सम्पर्कविहीन भएको हो ।

Meroghar

स्थानीय ठेकेदार मोहन यादवले पेटी कन्ट्र्याक्टमा निर्माण गरिरहेको उक्त गोदामको चारै तिरबाट पर्खाल उठाइसकिएको थियो । छानो हालेर प्लास्टर गर्ने काम बाँकी थियो । तर ठेकेदार कम्पनीले काम छोडेर त्यसपछि साइटमै नआएको शाखा प्रमुख नरनाथ अधिकारीले बताए । उनका अनुसार कम्पनी केन्द्रीय कार्यालयबाटै २०६७ फागुन २० मा टेन्डर आह्वान भई उक्त ठेक्का लागेको थियो । ‘ठेक्काको सबै प्राविधिक तथा आर्थिक कारोबार केन्द्रबाटै भएको हो,’ उनले भने, ‘ठेकेदारले बैंक ज्ञारेन्टीबापत राखेको १२ लाख रुपैयाँ पनि झिकिसकेको सुनेको छुँ ।’ शाखामा हाल आधा दर्जन गोदाम रहेकोमा तीमध्ये २ मात्र वर्षभरि प्रयोग गर्नलायक छ । बाँकी ४ गोदाम पानी चुहिने र वर्षायाममा पानी पसेर भण्डारण गरिराखेको अन्न बिग्रन सक्ने भइसकेको अधिकारीले बताए । ‘आउँदो वर्षायाममा यी ४ वटै गोदाममा पानी पस्ने प्रबल सम्भावना छ,’ उनले भने, ‘त्यसैले पनि हामी शाखामा धान र चामलको मौज्दात बढी राख्दैनौं, गोदाममा पानी पसेर अन्न बिग्रिने, कुहिने जोखिम रहेकाले सकेसम्म वर्षायाम अघि चामल र धान परिचालन गरी सक्छौं ।’

नयाँ गोदाम नबन्दा समस्या भइरहेको उनले बताए । गोदामको निर्माणका लागि २० लाख रुपैयाँ बजेट आएको तर त्यति रकमले गोदाम नबन्ने उनको भनाइ छ ।

शाखाको गोदाममा हाल २ सय ३५ क्विन्टल सोना मन्सुली चामल मौज्दात रहेको र केही चामल कुटानी भएर आउन बाँकी रहेको छ । यसका साथै ३२ क्विन्टल जिरा मसिनो धान पनि मौज्दात छ । १९ हजार ९ सय ९९ क्विन्टल २६ किलो सोना मन्सुली धानमध्ये ५ हजार ७६ क्विन्टल २० किलो धान कुटानीका लागि मिलमा पठाइएको र बाँकी धान मौज्दातमा रहेको अधिकारीले जानकारी दिए ।

प्रकाशित : फाल्गुन २, २०७६ ०९:३८
ADVERTISEMENT
प्रतिक्रिया
पठाउनुहोस्
ADVERTISEMENT

९० विद्यालयमा वाटर फिल्टर

कान्तिपुर संवाददाता

(पर्सा) — वीरगन्ज महानगरपालिका अन्तर्गतका ९० सामुदायिक विद्यालयमा स्वचालित ‘वाटर फिल्टर प्लान्ट’ जडान गरिने भएको छ । ‘सबैका लागि सरसफाइ तथा खानेपानीमा तीव्रता’ कार्यक्रम अन्तर्गत यो अभियान चलाएको महानगरका वातावरण तथा हरियाली प्रवर्द्धन शाखा प्रमुख सुनिल कुमार कर्णले जानकारी दिए । 

‘५४ विद्यालयमा वाटर फिल्टर प्लान्ट जडानका लागि टेन्डर आह्वान गरिएको छ,’ उनले भने, ‘बाँकी ३६ विद्यालयको हकमा युनिसेफलाई आग्रह गरेका छौं ।’ प्रत्येक वाटर फिल्टर प्लान्टको लागत २ लाख ५० हजार रुपैयाँ पर्नेछ । विद्यार्थी तथा शिक्षकलाई स्वच्छ पिउने पानी उपलब्ध गराउने योजनाअन्तर्गत जडान गर्न लागिएका फिल्टरले प्रशोधित पानी दिनुका साथै जाडोमा तातो र गर्मीमा चिसो पानी दिनेछ । यो प्लान्ट मोटरमा जोडिएको हुनेछ ।

यसै वर्षको भदौ २८ गते पर्सा खुला दिसामुक्त जिल्ला घोषित भएसँगै हाल महानगर पूर्ण सरसफाइ कार्यक्रममा केन्द्रित भएको उनले बताए । ‘पूर्ण सरसफाइका लागि विद्यालयबाट जनचेतनामूलक कार्यक्रम सुरु गरेर स्वास्थ्य संस्थासम्म पुग्ने योजना छ,’ उनले भने, ‘शुद्ध पिउने पानीमा स्थानीयको पहुँच बढाउँदै खाना खानुअघि र शौचालय प्रयोग गरेपछि साबुन पानीले हात धुने बानी बसाल्नु कार्यक्रमको मुख्य उद्देश्य हो ।’

कार्यक्रमअन्तर्गत छात्रालाई सेनिटरी प्याड विसर्जन गर्ने तरिका सिकाउनुका साथै अस्पतालबाट निस्कने फोहोरलाई पनि सुरक्षित रुपमा विसर्जन गर्ने योजना छ । यसका लागि हाल निर्माणाधीन ल्यान्डफिल साइटमै एउटा प्लान्ट जडान गर्ने तयारी भइरहेको कर्णले बताए । महानगरका सबै वडामा गरी १० लाख बिरुवा रोप्ने योजना पनि रहेको उनले बताए । यसका लागि वडा नं. ३१ बेल्वामा महानगरले आफ्नै नर्सरी बनाउन लागेको छ । कार्यक्रमअन्तर्गत नै महानगरमा रहेका ३/४ वटा पोखरीलाई यस वर्ष संरक्षण गर्ने योजना पनि रहेको कर्णले बताए ।

प्रकाशित : फाल्गुन २, २०७६ ०९:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×