सिरहामा झन्डा मेला

कान्तिपुर संवाददाता

(सिरहा) — सिरहाको सखुवानन्कारकट्टी गाउँपालिकामा दोस्रो झन्डा महोत्सव आयोजना गरिएको छ । १० दिनसम्म चल्ने मेला माघ २३ गतेदेखि सुरु भएको हो । मेलामा हनुमानको प्रतिमामाथिको झन्डा मुख्य आकर्षण बनेको छ । १५ फिट अग्लो हनुमानको प्रतिमा माथि ८५ फिट अग्लो ध्वजासहित बनाइएको झण्डा महोत्सवको मुख्य आकर्षण बनेको हो । महोत्सवस्थल पुग्ने जोकोही आगन्तुक रामायणकालीन हनुमानसहित राम, लक्ष्मण र सीताको प्रतिमा दर्शनपछि झण्डाको अवलोकन गर्न पुग्छन् । 

ZenTravel

हनुमानको प्रतिमा र झण्डा सर्लाहीका ५ जना कालीगढले १५ दिन लगाएर बनाएका हुन । महोत्सव मूल आयोजक समितिका संयोजक एवं सखुवानन्कारकट्टी गाउँपालिकाका अध्यक्ष केदारनाथ यादवका अनुसार प्रतिमा र झण्डा निर्माण गर्न १ लाख ३५ हजार रुपैयाँ खर्च भएको छ । महोत्सवमा कृषि, इलेक्ट्रोनिक्स, खाद्यान्नसँग सम्बन्धित सयभन्दा बढी स्टल रहेको उनले जानकारी दिए । महोत्सव स्थलमा राखिएको ५ सय ५० कलश पनि आकर्षण बनेको छ । महोत्सव स्थलमा नेपालको चार सयभन्दा बढी राष्ट्रिय झण्डा समेत टाँगिएको छ ।

Meroghar

कृषि ज्ञान केन्द्रद्वारा प्रदर्शनीमा राखिएको आधुनिक कृषि उपकरणमा पनि कृषकले चासो दिएका छन् । महोत्सवमा हाते ट्र्याक्टर, धान रोप्ने र काट्ने मेसिनदेखि कृषि उपज ओसारपसारमा प्रयोग हुने आधुनिक उपकरणबारे जानकारी पाएको स्थानीय कृषक गेनाई यादवले सुनाए ।

‘माछापालन, आधुनिक कृषि खेती प्रणालीबारे जानकारी पाएँ,’ उनले भने । मेलामा २९ किलोग्राम तौलको फर्सीसमेत प्रदर्शनीमा राखिएको छ । साथै, बालविवाह, बहुविवाह, दाइजोप्रथा र लैंगिक हिंसासम्बन्धी दिनहुँ जनचेतनामूलक कार्यक्रमसमेत आयोजना गरिएको अध्यक्ष यादवले जानकारी दिए ।

प्रकाशित : फाल्गुन १, २०७६ ०९:४१
प्रतिक्रिया
पठाउनुहोस्

ग्रामीण सडकले मुख्य राजमार्गमा जोखिम

कान्तिपुर संवाददाता

दार्चुला — निर्माणाधीन ग्रामीण सडकले मुख्य राजमार्गमा क्षति पुर्‍याउँदा दुर्घटनाको जोखिम बढेको छ । ग्रामिण सडक निर्माणका क्रममा माथिबाट माटो, ढुंगा खस्दा महाकाली राजमार्गअन्तर्गत दार्चुला खण्ड पटक–पटक अवरुद्धसमेत हुने गरेको छ ।

शैल्यशिखर नगरपालिकाको गोकुलेश्वरदेखि सदरमुकाम खलंगासम्म निर्माण भइरहेका ग्रामिण सडकले मुख्य राजमार्गका विभिन्न स्थानमा क्षति पुर्‍याएको छ । माथिबाट ढुंगामाटो खस्ने, पहिरो जाने, सडक भासिनेजस्ता कारणले राजमार्ग क्षेत्रमा यात्रा गर्दा जोखिम बढेको यातायात व्यवसायी बताउँछन् । हिलाम्य र धुलाम्य हुने समस्याले समेत हैरानी बढाएको छ ।

नौगाड, मार्मा, दुहु, मालिकार्जुन र लेकम गाउँपालिका र शैल्यशिखर नगरपालिकाले डोजर खरिद गरेर धमाधम सडक निर्माण गरिरहेका छन् । वातावरणीय प्रभाव मूल्यांकन नगरीकनै प्रदेश तथा संघ सरकारको विशेष र समपुरक अनुदानबाट उनीहरूले सडक योजना अघि बढाइरहेका हुन् । महाकाली लोकमार्ग भएर शैल्यशिखर नगरपालिका–७ पनेबाजदेखि बन्तोली जाने सडक र मालिकार्जुन गाउँपालिका–४ ऐरिछानादेखि हुनैनाथ हुँदै वडा नम्बर ५ डाँडाकोट जाने सडकले सबैभन्दा बढी समस्या निम्त्याएको मालिकार्जुन गाउँपालिका–४ का जमनसिंह धामीले बताए । ‘पनेबाजदेखि ऐरिछानासम्म धेरै ठाउँमा राजमार्गमा क्षति पुगेको छ,’ उनले भने, ‘राजमार्गको माथिल्लो भागबाट शाखा सडक निर्माण भइरहेकोले त्यहाँबाट खस्ने ढुंगा, माटोले गर्दा यात्रा गर्दा अप्ठेरो भएको छ ।’

लामो समयदेखि महाकाली राजमार्गमा गाडी चलाउँदै आएका दिलानन्द जोशीले ग्रामीण सडक बनाउँदा खसेका ढुंगा र माटोका ढिस्काले मुख्य राजमार्गमा यातायात अवरुद्ध हुने गरेको बताए । उनले भने, ‘पहिला यस्तो समस्या थिएन । अहिले त माथिबाट खसेका ढुंगा, माटोले सडक भास्सिएर दुर्घटनाको जोखिम बढाएको छ ।’ ऐरिछानाबाट–डाँडाकोट सडक निर्माणका क्रममा खसेको माटोले ऐरिछानास्थित महाकाली राजमार्गको नाली बन्द भएको छ । गत वर्षदेखि मालिकार्जुन गाउँपालिकाले ठेक्कामा निर्माण सुरु गराएको सो सडक अझै बन्न सकेको छैन । ‘सडकको ट्र्याकसम्म खोलिएको छ । तर, ग्रेड नमिलाउँदा सवारी चल्ने अवस्था छैन,’ स्थानीय जोग्रेन्द्र धामीले भने, ‘सडकको सुविधा पुग्ने ठाउँमा समेत मुख्य सडकबिग्रेको छ ।’ गाउँमा सडक लैजाने नाममा राजमार्ग बिग्रेकोमा धामीले गुनासो गरे । ‘गाउँतिर पनि सडक पुग्नुपर्छ तर मुख्य राजमार्गमा क्षति नहुनेगरी काम गर्नुपर्छ,’ उनले भने ।

करकले–देथला–दल्लेक–खलंगा सडक खण्डमा पनि आधा दर्जन ठाउँमा सहायक मार्ग बनिरहेका छन् । महाकाली नगरपालिका–३, मालबेला पुग्न उक्त सडक बनिरहेको हो । प्रदेश सरकारको बजेटमा बन्न लागेको सो सडकको ट्र्याक गत असारमै खोलिएको हो । ग्रामीण सडकहरू प्राविधिक योजनाबिनै निर्माण भइरहेका लास्कुका स्थानीय बताउँछन् । दल्लेक–नागु–सीना सडक निर्माणका कारण नौगाड गाउँपालिका–३, चौड आसपासको खोला किनार क्षेत्रमा वर्षातमा मुख्य राजमार्ग क्षेत्र नै अवरुद्ध हुने गरेको नौगाड–२ का गोविन्दसिंह ठगुन्नाले बताए । ‘यस सडकले दल्लेक गाउँका केही घरमा जोखिम बढाएको छ,’ उनले भने, ‘गाउँपालिकाले सडक बनाउनुअघि सम्भावित जोखिमका बारेमा कहिल्यै सोचेन, जसका कारण यस्तो अवस्था आएको हो ।’

प्रकाशित : फाल्गुन १, २०७६ ०९:३०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×