कान्तिपुर वेबसाईट
AdvertisementAdvertisement

सडक पक्की, पुल छैन

कान्तिपुर संवाददाता

सर्लाही — जिल्लाको हरिवन–कौडेना क्षेत्रीय कृषि सडक खण्डमा पर्ने लखनदेही नदीमा पुल नबन्दा स्थानीयले सास्ती खेप्नुपरेको छ । पूर्व–पश्चिम राजमार्गदेखि हुलाकी सडक जोड्ने उक्त सडकमा साढे तीन वर्षअघि कालोपत्रेको काम सुरु भएको थियो । त्यसबेला कच्ची बाटो र नदी पार गरी राजमार्ग पुग्न स्थानीयले सास्ती खेप्नु नपर्ने सोचेर खुसी भएका थिए ।

पक्की सडक निर्माण गरी ठेकेदारले सडक हस्तान्तरण गर्ने अन्तिम चरणमा पुगेपछि स्थानीय भने निराश बनेका छन् । कच्ची सडक पक्की बने पनि बाह्रै महिना प्रयोग गर्ने हिसाबले बनेको छैन । उक्त सडक खण्डमा पर्ने लखनदेही नदीमा पुल छैन । विश्व बैंकको सहयोगमा १७ करोड ९२ लाख रुपैयाँको लागतमा यो सडकको कालोपत्रे सुरु भएको हो ।


पूर्व–पश्चिम राजमार्गको हरिवनबाट झन्डै ८ किलोमिटरको दूरीमा रहेको नदीमा पुल नहुँदा वर्षा मौसममा स्थानीय १६ किलोमिटरको दूरी पार गरेर घुमाउरो बाटो प्रयोग गर्ने गरेका छन् । जिल्लाको प्रमुख व्यापारिक केन्द्र बरहथवा पनि ८ किलोमिटरकै दूरीमा छ । तर वर्षाको मौसममा झन्डै ४० किलोमिटरको यात्रा गरेर जानुपरेको स्थानीयको दुखेसो छ ।


नदीकै कारण बरहथवासम्म पुग्न पैदलयात्रा गर्नुपर्छ, यातायातका साधन चल्दैनन् । वर्षा मौसममा पुलकै कारण ठप्प रहने यो सडकमा सुक्खा मौसममा नदीमा जोखिम मोलेर यातायातका साधन चल्ने गरेका छन् । यसभन्दा अघि सडक पनि कच्ची र नदीमा पुल नभएकाले स्थानीय पैदल तथा साइकलको यात्रा गर्थे । अहिले सडक पक्की बनेको छ ।


यातायातका सवारीसाधन पनि चल्न थालेका छन् । तर नदीमा समस्या हुने गरेको स्थानीय बताउँछन् । स्थानीयलाई सबैभन्दा छोटो बाटो भएकाले यो सडक प्रयोग गर्ने गरेका छन् । सडक पक्की भए पनि नदीमा पुल नहुँदा उक्त सडक उपयोगी बन्न नसकेको कविलासी नगरपालिका–१ का शिवकुमार रायले बताए ।


‘पहिला सडक कच्ची र नदीमा पुल नभएकाले वर्षाको मौसममा यो सडक प्रयोगमा आउँथेन, अहिले सडक पक्की बनेको छ तर पुल नभएकै कारण बाह्रै महिना हिँड्ने सडक बन्न सकेको छैन,’ उनले भने, ‘सडकमा करोडौं खर्च गर्दा पनि पुल नभएकाले हाम्रो दुःख कम भएन ।’


यस क्षेत्रका स्थानीयले पक्की सडकभन्दा पनि पहिले पुलको आवश्यकता रहेको बताए । पुल नहुँदा नदीमा यातायातका साधन फस्ने र भासिने गरेको स्थानीयले जानकारी दिए । साना सवारीसाधनले भने नदीको वारि र पारि यात्रुको पर्खाइमा बस्ने गरेका छन् । भासिने डरले साना सवारी नदीमा चलाउन मान्दैनन् । नदीकै कारण राति असुरक्षा बढेको पिडारी बजारका सञ्जीव साहले बताए । ‘पुल नहुँदा गाडीहरू नदीमै फस्ने गरेका छन्, त्यो डरले साना सवारी ओहोरदोहोर गर्दैन,’ उनले भने ।


पुल नहुँदा पक्की गरिएको सडक पनि चाँडै भत्किन सक्ने प्राविधिकले बताएका छन् । पूर्वाधार विकास सम्पर्क एकाइ कार्यालयका साइट इन्जिनियर अरुण महतोले क्षेत्रीय कृषि सडकमा पुल नहुँदा कालोपत्रे भए पनि बाह्रै महिना सडक सञ्चालनमा आउने अवस्था नरहेको जानकारी दिए ।


उनले पछिल्लो समय व्यस्त बनेको यो सडकमा रहेको नदीमा पुलका लागि विभिन्न निकायमा पहल भइरहेको जानकारी दिए । ‘पूर्व–पश्चिम राजमार्गदेखि हुलाकी सडक जोड्ने लिंक रोड हो तर नदीकै कारण ब्रेक भएको छ,’ उनले भने, ‘कालोपत्रे अन्तिम चरणमा रहेको यो सडकअन्तर्गतको नदीमा पुलका लागि विभिन्न ठाउँमा पहल भइरहेको छ ।’


प्रकाशित : मंसिर २४, २०७६ ११:५१

प्रतिक्रिया
पठाउनुहोस्

प्रवेशद्वारको मुहार फेरिँदै

कान्तिपुर संवाददाता

पर्सा — नेपालको प्रवेशद्वार भनेर चिनिने वीरगन्जस्थित नेपाल–भारत सीमामा रहेको शंकराचार्य प्रवेशद्वार क्षेत्र प्रदूषित, दुर्गन्धित रहेको गुनासो सुनिन्थ्यो । यो क्षेत्रको सरसफाइमा कसैको ध्यान गएको थिएन । सबै गाली गरेर मात्रै पन्छिन्थे । एक महिनायता भने दृश्य फेरिएको छ । प्रवेशद्वार धोइपखाली गरी टल्काइएको छ ।

त्यसमा उम्रिएका झारपात हटाइएका छन् । द्वारमुनि रहेको मिनी बगैंचा पनि गोडमेल गरेर चिरीच्याँट्ट पारिएको छ । वरपरको धूलो घटेको छ । वीरगन्ज महानगरपालिकले सीमामा फोहोर फाल्न बन्द गरेको छ । बटुवालाई यो बाटो भएर सीमावर्ती भारतीय सहर रक्सौलसम्म आउजाउ गर्न नाक थुन्नुपर्ने अवस्था हटेको छ ।

यसअघि नेपाल प्रवेशद्वार मानिए पनि यो क्षेत्रलाई सफा राख्ने कामको थालनी भएको थिएन । यस्तो बिजोग अवस्थामा अघि सरे वीरगन्जेली युवा । भोलुन्टियर्स टिम वीरगन्ज नामक संस्थामा आबद्ध डेढ दर्जन तन्नेरीको प्रयासले नेपालको प्रवेशद्वारा क्षेत्र अचेल सफासुग्घर बन्न पुगेको छ । पर्यटकको अगाडि आफ्नै दुरवस्था र बेथितिले शिर निहुराउनुपर्ने अवस्थाको अन्त्य भएको छ ।

यसै शनिबारसमेत गरी यो टिमले लगातार चौथोपटक नेपाल प्रवेशद्वार क्षेत्रको सरसफाइ गरेको छ ।यो काममा उनीहरू आफैं मात्र हातमा झाडु लिएर सडक बढार्न लागिपरेनन् वीरगन्ज महानगरका मेयर विजयकुमार सरावगीलाई पनि यो अभियानमा साथ दिन आग्रह गरे । मेयर सरावगीले पनि सफाइ अभियानमा साथ दिए । अहिले महानगरपालिकाले फोहोर फाल्न रोक्नुका साथै थुप्रिएका फोहोर माटोले पुर्न थालेको छ । दुर्गन्ध आउन छाडेको छ ।

टिमका संयोजक राजन श्रीवास्तव अभियानमा पछिल्लो समय स्वतःस्फूर्त रूपमा वीरगन्जका सरोकारवालाको सहभागिता बढ्दो क्रममा रहेको दाबी गर्छन् । ‘सुरुमा हामीले यो पहलकदमी गर्दा न्यून सहभागिता थियो,’ उनले भने, ‘अहिले व्यापक जनसमर्थन जुटिरहेको छ, महानगरपालिकाको कार्यालयले दमकल दिएर सहयोग गरेको छ ।

वीरगन्जका संघसंस्था, विद्यालय, कलेजका विद्यार्थी, शिक्षक, कर्मचारी सबैलाई यस अभियानमा जोड्ने योजना रहेको टिमका महासचिव श्याम सर्राफले बताए । ‘वीरगन्जको सरसफाइमा सबैको अपनत्व हुनुपर्छ,’ उनी भन्छन्, ‘हामी स्वयम्सेवी पनि दैनिक आआफ्नो पेसा र रोजगारीमा व्यस्त रहन्छौं तर साताको एक दिन हामी स्वयंसेवामा जुट्छौं, अब सबैले हामीसँग हातेमालो गरेर हौस्याउनु जरुरी छ ।’

प्रकाशित : मंसिर २४, २०७६ ११:४९
पूरा पढ्नुहोस्
प्रतिक्रिया
पठाउनुहोस्
×