स्थानीय तहमा बेथिति, विशेष गाउँसभामा झडप

स्थिति नियन्त्रणमा लिन प्रहरीद्वारा चार राउन्ड अश्रुग्यास प्रहार, विरोध प्रदर्शनका क्रममा गाउँपालिका वडा ६ का अध्यक्ष राजेश्वर साह सुडी घाइते
भरत जर्घामगर

सिरहा — गाउँपालिकाका अध्यक्ष र उपाध्यक्षले विकासका काममा दलीय आधारमा भेद्भाव गरेको र मनोमानी ढंगले विशेष गाउँसभा डाकेको भन्दै नेकपा र कांग्रेसबाट निर्वाचित जनप्रतिनिधि सहित कार्यकर्ताले विरोध जनाउँने क्रममा आइतबार सिरहाको लक्ष्मीपुर पतारीमा प्रहरीसँग झडप भएको छ ।

गाउँसभा चलिरहेको स्थलमा विरोधका क्रममा नेकपा र कांग्रेसका कार्यकर्ताले ढुंगामुढा थालेपछि प्रहरीसँग झडप भएको थियो । झडपका क्रममा स्थितिलाई नियन्त्रणमा लिन प्रहरीले चार राउन्ड अश्रुग्यास प्रहार गरेको थियो । विरोध प्रदर्शनका क्रममा वडा ६ का अध्यक्ष राजेश्वर साह सुडी घाइते भएका छन् । टाउकोमा चोट लागेका उनको स्थानीय क्लिनिकमा उपचार गरिएको छ ।


ढुंगामुढाबाट कार्यालयको तीनवटा कम्प्युटर, सीसी क्यामेरा, झ्यालका सिसा फुटेको गाउँपालिकाले जनाएको छ । ६ वडा रहेको गाउँपालिकाका कांग्रेसले जितेका ४ का वडाध्यक्ष विधानन्द साह सुडी, ५ का देवकुमार यादव र नेकपाले जितेको ६ वडाध्यक्ष राजेश्वर साह सुडीलगायत ती दलले संघर्ष समिति गठन गरी १० बुँदे माग र विरोधका कार्यक्रमसहित गाउँपालिकाका प्रमुख प्रशासकीय अधिकृत रवीन्द्रकुमार महतलाई गत मंसिर ११ मा ज्ञापनपत्र बुझाएका थिए ।


स्थानीय सरकार सञ्चालन ऐनविपरीतका गतिविधि नगर्न तीन वडाध्यक्ष सहित दुई दलले ज्ञापनपत्र बुझाए पनि गाउँपालिका अध्यक्ष रामवल्लभ साह र उपाध्यक्ष आशाकुमारी यादवले मनोमानी ढंगले विशेष गाउँसभा गरेपछि गाउँपालिका घेराउ गर्न बाध्य भएको संघर्ष समितिले जनाएको छ ।


संघर्ष समितिका संयोजक चतुरानन्द ठाकुरले पतारी पोखरी निर्माण, दुर्गा भगवतीको मूर्ति र शिवलिंग स्थापना, सडक योजनालगायतमा आर्थिक अनियमितता गरेको लगायतका माग राखी ज्ञापनपत्र बुझाएर सचेत गराए पनि गाउँपालिका अध्यक्ष साह मनोमानी ढंगेले चलेपछि घेराउ गर्न बाध्य भएको बताए ।


६ वडा रहेको लक्ष्मीपुर पतारी गाउँपालिकामा अध्यक्ष, उपाध्यक्ष र १, २, ३ वडामा समाजवादी पार्टी, ४ र ५ वडामा कांग्रेस र ६ नम्बर वडामा नेकपाले जितेको छ । कांग्रेस र एमालेबाट निर्वाचित वडाध्यक्षहरूले असार २५ मा सम्पन्न गाउँसभाले पारित गरेका नीति तथा कार्यक्रम पारित गरे पनि गाउँपालिका अध्यक्ष र उपाध्यक्षले वडास्तरीय बजेटमा दलीय आधारमा भेदभाव गर्नका लागि विशेष गाउँसभा गरेकाले विरोध जनाएको बताए ।


गाउँपालिका अध्यक्ष साहले कार्यालय भवन तोडफोडमा उत्रनेमाथि कारबाहीको माग गरे । ‘विरोध लोकतान्त्रिक विधिबाट हुनुपर्छ, तोडफोड गर्न कसैलाई छुट छैन,’ गाउँपालिका अध्यक्ष साहले भने, ‘तोडफोडमा उत्रनेलाई कारबाही हुनुपर्छ ।’ आफूमाथि झूटा आरोप लगाएको बताउँदै उनले विपक्षीले केही नपाएर नेकपा र कांग्रेसले विरोधका लागि विरोध गरेको प्रतिक्रिया दिए ।

प्रकाशित : मंसिर २३, २०७६ १२:२३
प्रतिक्रिया
पठाउनुहोस्

हातपातको विरोधमा नगरको काम ठप्प

ओमप्रकाश ठाकुर

सर्लाही — जनप्रतिनिधिबीचको विवादले आफैं थलिएको सर्लाहीको हरिपुर्वा नगरपालिकामा थप विवाद चुलिएको छ । प्रमुख प्रशासकीय अधिकृतमाथि कुटपिट भएको भन्दै हरिपुर्वा नगरपालिका कर्मचारीले आइतबार सम्पूर्ण कामकाज ठप्प पारेका छन् । उनीहरूले कुटपिटमा संलग्नलाई कारबाहीको माग गर्दै अनिश्चितकालीन कामकाज अवरोध गरेका हुन् । 

हरिपुर्वा नगरपालिका–५ स्थित केश्वर गरिब जनता माध्यमिक विद्यालयका विद्यार्थीले शुक्रबार साँझ नगरपालिकाको कार्यालयमा तोडफोड गर्नुको साथै प्रमुख प्रशासकीय अधिकृत सकलदेव रायमाथि हातपात गरेको विरोधमा कर्मचारी आन्दोलित बनेका हुन् ।

नगरपालिकाका कर्मचारीले जारी गरेको विज्ञप्तिमा भनिएको छ, ‘शिक्षक माग गर्ने बहानामा विद्यार्थीहरूले कार्यालय तोडफोड र प्रमुखमाथि हातपात गरेकाले घटनाको भर्त्सना गर्दै दोषीलाई कारबाही नहुन्जेल अनिश्चित कालका लागि नगरको सम्पूर्ण कामकाज ठप्प रहनेछ ।’ कर्मचारी आन्दोलनका कारण कार्यालयबाट पाउने सेवा सर्वसाधारणले पाउन सकेका छैनन् । स्थानीयले वडाबाट सामान्य सिफारिससमेत नपाएको गुनासो गरे ।

विद्यालयका विद्यार्थीहरू शिक्षकको माग गर्दै शुक्रबार विद्यालयमा तालाबन्दी गर्दै नगरपालिकको कार्यालय पुगेका थिए । कार्यालयका प्रमुख प्रशासकीय अधिकृत रायलाई विद्यार्थीहरूले गुनासो राखेपछि उनले प्रधानाध्यापक रामपृत महतोलाई बोलाउन लगाए ।

छलफलकै क्रममा प्रमुख रायले प्रधानाध्यापक महतोलाई कार्यालयबाहिर निकालेपछि विद्यार्थीहरू होहल्ला गर्न थालेका थिए । यसै क्रममा अधिकृत रायका नजिकका एक व्यक्तिले मोटरसाइकलको हेलमेटले विद्यार्थीलाई कुट्न खोजेपछि विवाद बल्झिएको स्थानीयले बताए । त्यसलगत्तै आक्रोशित विद्यार्थीहरूले कार्यालयमा तोडफोड गर्नुको साथै प्रमुखलाई पनि हातपात गरेका थिए ।

प्राविधिकतर्फ पढाइ हुने सिभिल इन्जिनियरङ संकायका विद्यार्थीले विद्यालयमा प्राविधिकतर्फको शिक्षकको व्यवस्था मिलाउन पटक–पटक माग गरे पनि नगरपालिकाले बेवास्ता गर्दै आएको आरोप लगाए । शिक्षक अभावमा ८ महिनादेखि प्राविधिकतर्फ कुनै विषयमा पढाइ हुन सकेको छैन । पढाइ नभएपछि विद्यार्थीहरू रुष्ट छन् ।

विद्यालयमा लामो समयदेखि सिभिल इन्जिनियरिङ पठनपाठनका लागि नियुक्त गरिएका दुई जना ओभरसियर र एक जना इन्जिनियरको विषयमा विवाद चल्दै आएको छ । विद्यालयले मनोमानी किसिमले शिक्षक नियुक्त गरेको आरोप लगाउँदै अख्तियारमा मुद्दा परेपछि तीनै जना शिक्षकले अध्यापन गराउन पाएका छैनन् ।

यता प्रधानाध्यापक महतोले आफू नगरपालिका कार्यालय जाँदा प्रमुख प्रशासकीय अधिकृत तनावमा रहेको देखेपछि खासै कुरा नभएको बताए । अधिकृत रायले आफूले नै विद्यार्थीलाई उचालेर नगरपालिका कार्यालय पठाएको जस्तो बुझेको भन्दै प्रधानाध्यापक महतोको गुनासो छ ।

प्रमुख प्रशासकीय अधिकृत रायले भने आफूले प्रधानाध्यापकमाथि नराम्रो किसिमको कुनै व्यवहार नगरेको दाबी गरे । उनले नगरपालिका कार्यालय रहेको दोस्रो तल्लाबाट विद्यार्थीलाई तल झर्न आग्रह मात्रै गरेको जानकारी दिए । पछिल्लो समय विभिन्न बहानामा उक्त विद्यालयमा राजनीतिक किचलो हुँदा पठनपाठनमा असर परिरहेको छ ।

केही समयअघि मात्र प्रधानाध्यापकको सरुवाको विषयमा विवाद हुँदा सो विद्यालयमा धेरै दिनसम्म पढाइ नै ठप्प भएको थियो । विद्यालयमा बढ्दो विवादका कारण बालबालिका पढाइबाट वञ्चित हुनुपरेको अभिभावकहरूले चिन्ता व्यक्त गर्दै आएका छन् । जारी विवादका कारण यसअघिको परीक्षा पनि रोकिएको थियो ।

विद्यार्थीहरूले गरेको तोडफोडबाट कार्यालयको कम्प्युटर, विद्युतीय उपकरण तथा अन्य फर्निचरका सरसामानमा क्षति पुगेको छ । निर्वाचित भएर आएका जनप्रतिनिधिबीचको किचलोले माथि उठ्न नसकेको नगरपालिका पुनः अर्को झमेलामा फसेको हो । नगर प्रमुख सियाराम रायले नगरपालिकामा भइरहेको विवाद समाधानका लागि पहल भइरहेको जानकारी दिए ।

प्रकाशित : मंसिर २३, २०७६ १२:१२
पूरा पढ्नुहोस्
प्रतिक्रिया
पठाउनुहोस्
×