भारतीय टेम्पो नेपाल आउन रोक- प्रदेश २ - कान्तिपुर समाचार

भारतीय टेम्पो नेपाल आउन रोक

शिव पुरी

(रौतहट) — सदरमुकाम गौरमा दशकदेखि सञ्चालनमा रहेका भारतीय नम्बर प्लेटका टेम्पोलाई उच्च अदालत वीरगन्जले रोक लगाएको छ । सीमावर्ती बजार बैरगनियाबाट निर्बाध आउने गरेका टेम्पो रोक्न परमादेश जारी भएपछि नेपाली चालक खुसी छन् । 

भारतीय टेम्पोहरू यात्रु बोकेर भन्सार नतिरीकनै गौर आउँथे । राति यतै पार्किङ गर्थे । यसविरुद्ध नेपाली व्यवसायीले उच्च अदालत बिरंगजमा निवेदन दिएका थिए । न्यायधिश सत्यमोहन जोशी थारु र बिरबहादुर डांगीको संयुक्त इजलासले भारतीय टेम्पो नेपालमा चलाउन नदिन अन्तरिम आदेश दिएको अदालतका श्रेस्तेदार ठाकुर खरेलले बताए ।


भन्सार राजस्व नतिरी दैनिक नेपाली बजारमा चलाइँदै आएका ती टेम्पोलाई स्थानिय प्रशासन, ट्राफिक प्रहरी, भन्सार कार्यालयले समेत कारबाही गर्न सकेको थिएन । नेपाली व्यवसायीका तर्फबाट वीरगन्ज महानगरपालिका–१६ स्थित लक्ष्मी मोटर्स प्रालिका प्रोपराइटर अरुण कुशबाहाले जिल्ला प्रशासन कार्यालय रौतहटलाई समेत विपक्षी बनाई रिट दायर गरेका थिए ।


अदालतको आदेश बारे प्रमुख जिल्ला अधिकारी किरण थापाले अनभिज्ञता प्रकट गरे । ‘अदालतबाट के आदेश भएको हो भन्नेबारे मलाई कुनै जानकारी छैन,’ उनले भने, ‘हामीलाई समेत विपक्षी बनाई मुद्दा दिएका थिए । यस विषयमा थप बुझ्छु ।’ रौतहटमा यातायात नियमावली उल्लंघन गरी टेम्पु, इ–रिक्सा र भारतीय सवारीसाधन चलिरहेको जानकारीमा भए पनि केही प्राविधिक कठिनाइ रहेको उनले सुनाए ।


महँगो नेपाली नम्बरको टेम्पो खरिद गरेर आफ्नै भूमिमा व्यवसाय गर्न खोज्दा भारतीय टेम्पोले विस्थापित हुने अवस्था आएको व्यवसायी सुखल साहका गुनासो छ । ‘अदालतको आदेशले हामि खुसी छौं,’ उनले भने, ‘भारतीय टेम्पोको दादागिरि बढेको थियो । बल्ल ठिक भयो । अव प्रशासनले आदेश कार्यान्वयन गर्नु पर्छ ।’


पाच वर्षअघि भारतीय टेम्पो रोक्न खोज्दा सीमा क्षेत्रमा नाराबाजी गर्दै उनिहरूले केही समय आवागमन बन्द गराएका थिए । त्यसपछि प्रशासनले बेवास्ता गर्दै आएको हो । भारतीय सिमादेखी ४२ किलोमिटर नेपाली भूमिमा भारतीय नम्बर प्लेटका गाडी र मोटरसाइकल निर्बाध कुदिरहेका छन् । ती चन्द्रनिगाहपुरसम्म पनि आइपुग्छन् । एक दिनको भन्सार तिरिहाले पनि त्यसपछि महिनौं तिर्दैनन् । भन्सार अधिकृत आशुतोष राईले भारतीय नम्बर प्लेटको टेम्पो नेपाल प्रवेश गर्दा ४ सयका दरले राजस्व तिर्नुपर्ने बताए । त्यस्तै मोटरसाईकलले १ सय ५० रुपैया तिर्नु पर्छ । अहिले गौरमा भारतीय टेम्पोको संख्या ६० हाराहारी छ । नेपाली टेम्पो पनि उतिकै संख्यामा रहेको ट्राफिक प्रहरीले जनायो ।


प्रकाशित : मंसिर १०, २०७६ १२:१२
प्रतिक्रिया
पठाउनुहोस्

सशस्त्र क्याम्पबाटै काठ बिक्री

बरामद गरिएका काठ वन कार्यालयलाई बुझाउनुपर्नेमा क्याम्पप्रमुखले नै रातिराति समिल सञ्चालकलाई बेच्ने गरेका छन् 
भूषण यादव

(वीरगन्ज) — सशस्त्र प्रहरीले तस्करबाट बरामद गरिएको काठ वन कार्यालयलाई नबुझाई फर्निचर उद्योगलाई बेचेको पाइएको छ । पर्साको बागेश्वरी, तित्रौनास्थित सशस्त्र प्रहरी सुरक्षा बेसक्याम्पका सुरक्षाकर्मीले नै यस्तो खुलासा गरेका हुन् ।

फर्निचर उद्योगका सञ्चालकले बेसक्याम्पमा राति काठ लोड गर्ने क्रममा एक प्रहरीले मोबाइलमा तस्बिर लिएका थिए । उनका अनुसार उक्त काठ बहुदरमाई नगरपालिका–४ डोकैलास्थित गरिब फर्निचर उद्योगमा लगिँदै थियो । ‘मोटरसाइकलमा दुई थान कचरा लोड गरे,’ ती प्रहरीले भने, ‘ठूला गोलाईका करिब ५० क्युफिट काठ बिक्री भइसकेको छ ।’

स्रोतका अनुसार पर्सागढी नगरपालिका–७ फुलवरिया टोलमा बरामद गरिएको साढे १७ क्युफिट साल, पर्सागढीकै बनकुअरी टोलबाट २० क्युफिट साल र साइकलमा दाउराभित्र लुकाएर ल्याउने क्रममा बरामद भएको ७ थान काठ बेसक्याम्प प्रमुखले विभिन्न चिरान मिललाई बिक्री गरेका छन् । ‘साना गोलाई कारोबारीले मोटरसाइकलमै लोड गरी लैजान्छन्,’ स्रोतले भन्यो, ‘ठूलो गोलाई बेसक्याम्पको कम्पाउन्ड बाहिरबाट ट्याक्टरमा लोड गर्छन् ।’

सखुवाप्रसौनी गाउँपालिका–१ औराहाबाट करिब २ महिनाअगाडि बरामद गरिएका २ थान गोलिया शनिबार राति बिक्री गरिएको छ । फर्निचर उद्योगमा काठ पुगेपछि स्थानीयले होहल्ला गरेका थिए । तित्रौना बेसक्याम्पका प्रमुख सशस्त्र प्रहरी निरीक्षक रामकुमार महत क्षेत्रीले टोली बढनिहार सब डिभिजन वन कार्यालयतर्फ गस्तीमा गइरहेकाले शनिबार राति नै काठ पठाउन लगाएको बताए । बरामद गरिएको २ महिनापछि रातको समयमा काठ पठाएको प्रश्नमा भने उनी मौन बसे ।

२ थान गोलिया बेचेको खुलेपछि क्षेत्रीले शनिबार राति नै तीन थान फेन्टा र साइकल बढनिहार सब डिभिजनमा पठाएका थिए । डिभिजन प्रमुख शशिकान्त तिवारीले कुन ठाउँबाट कहिले बरामद गरिएको भन्ने विवरण नखुलाईकनै बेसक्याम्पले काठ पठाएको बताए । ‘३/४ दिनदेखि खोजिरहेका छौँ, हालसम्म प्राप्त कागजातमा फुलबरिया र बनकुअरीको काठ सशस्त्र प्रहरीले बुझाएको भेटिएको छैन्,’ उनले भने । तिवारीका अनुसार केहीअघि डिभिजन कार्यालयनजिकैबाट बरामद गरेको ठूलो परिमाणको काठ पनि प्रहरीले तत्काल बुझाएन । ‘वनलाई बुझाउलान् भनेर बसेको थिएँ, एक साता सम्म नबुझाएपछि आफैले ताकेता गरें । त्यसपछि मात्रै ल्याए,’ उनले भने ।

बेसक्याम्प प्रमुख क्षेत्रीले भने कार्यालयकै टेबुलकुर्सी मर्मतका लागि चिरान मिलमा काठ पठाएको तस्बिर सार्वजनिक भएको दाबी गरेका छन् । ‘फुलवरिया र बनकुअरीको काठ वनलाई पठाएका छौँ,’ उनले भने, ‘बिक्री गरेका छैनौँ ।’

समिललाई उन्मुक्ति
गत कात्तिक १५ मा वन सुरक्षा गस्ती टोलीले सखुवाप्रसौनी–३ स्थित सुदामा समिलमा छापामारी १२ थान (४५ क्यू फिट) सालका गोलाइ बरामद गर्‍यो । ती गोलाइ पराल तथा भुस भित्र लुकाएर राखिएका थिए । टोलीले समिल सञ्चालक जंगलाल साहलाई नियन्त्रणमा लिएको थियो ।

वीरगन्जस्थित डिभिजन वन कार्यालय पठाइएका साहलाई राजनीतिक दबाब र आर्थिक मिलेमतोमा त्यही दिन एक वडाध्यक्षको रोहबरमा छाडियो । पक्राउ परेकालाई बिना कारवाही छाड्दा काठ तस्करहरूको मनोबल झन् उँचो भएको स्थानीयले गुनासो गरेका छन् । वन ऐन अनुसार २ लाख रुपैयाँभित्रको मुद्दा डिभिजन वन कार्यालयको मातहात आउँछ । त्यसभन्दा बढीको मुद्दा जिल्ला अदालतमा लगिन्छ ।

डिभिजन वन पर्साका प्रमुख राजेश्वरमान श्रेष्ठ समिल सञ्चालकलाई जिम्मा जमानीमा छाडिएको बताउँछन् । ‘४५ क्यू फिट काठ बरामद भएको समिलका सञ्चालकको मुद्दा अनुसन्धान प्रक्रियामै छ,’ उनले भने, ‘जिम्मा जमानीमा मात्र छाडिएको हो ।’ एक वन अधिकृतले विगतमा उक्त परिमाणका साथ व्यक्ति पक्राउ पर्दा कम्तीमा ६ महिनादेखि दुई वर्षसम्म कैद हुने गरेको खुलाए ।

वनस्रोतका अनुसार साढे दुई फिट अवैध काठसहित पक्राउ पर्दा एक महिनासम्म थुनामा राखेर अनुसन्धान गरिएको थुप्रै मुद्दा छन् । ‘उनीहरूसँग प्रभावशाली व्यक्ति वा आर्थिक हैसियत बलियो नहुँदा जिम्मा जमानीमा छुट्न सकेनन्,’ स्रोत भन्छ, ‘सानालाई ऐन ठूलालाई चैन चरितार्थ भएको छ ।’

समिलका कामदार राजकिशोर साहले रातको समयमा साहुले काठ तस्करसँग सालको गोलाई खरिद गरेको बयान वनलाई दिएका छन् । उक्त क्षेत्रमा दर्जनभन्दा बढी फर्निचर उद्योग सञ्चालनमा छन् । गत मंसिर २ मा वनबाट काठ ल्याउने क्रममा तस्कर र सुरक्षा गस्तीबीच भिडन्त भएको थियो ।

मनवा गाउँदेखि उत्तरपट्टिको गस्ती टोली देखेपछि तस्करले फायरिङ गरेका थिए । जवाफमा गस्ती टोलीले पनि ३ राउन्ड फायरिङ्ग गरेको थियो । उक्त स्थानबाट प्रहरीले ४ वटा साइकलमा लोड गरिएका सालका ४ थान गोलिया बरामद गरेको थियो ।


प्रकाशित : मंसिर १०, २०७६ १२:१०
पूरा पढ्नुहोस्
प्रतिक्रिया
पठाउनुहोस्
×