९४ वर्षमा गढिमाई दर्शन

पाँच वर्षमा लागेको मेलामा यसपालि उनी लौरोको सहारामा गढिमाईको दर्शन गर्न आइपुगेकी हुन् । गढिमाईको महिमा र शक्तिभावले आफूलाई यो उमेरमा पनि तानेर ल्याएको उनले सुनाइन् । यो उमेरमा पनि मेलाको अवसरमा दर्शन पाउँदा आफू खुसी भएको उनले बताइन् ।

मंसिर १ देखी सुरु भएको मेलामा आउने दर्शनार्थी बिस्तारै बढ्न थालेका छन् । मेला भर्न आएका अहिलेसम्मकै दर्शनार्थीमध्येकै सबभन्दा बढी उमेरकी दर्शनार्थी ढुंगाना रहेकी गढिमाई मेला मिडिया व्यवस्थापन समितिका संयोजक मुकेश यादवले बताए । ‘मेलामा दर्शनार्थीको चहलपहल बढ्न थालेको छ,’ उनले भने, ‘भीडभाड बिस्तारै बढ्दै छ ।’ मेला व्यवस्थापन गर्न महागढिमाई नगरपालिका र मेला मूल व्यवस्थापन समिति सक्रिय रहेको उनले जानकारी दिए ।

प्रत्येक ५ वर्षमा एकपटक लाग्ने मेलामा लाखौंको संख्यामा नेपाल र भारतबाट श्रद्धालु आउने गरेको महागढिमाई नगरपालिकाका प्रमुख उपेन्द्रप्रसाद यादवले जानकारी दिए । ‘यसपालिको मेलालाई व्यवस्थित गर्न ७२ सदस्यीय मूल व्यवस्थापन समिति र १४ उपसमिति गठन गरिएका छन्,’ उनले भने, ‘मेलालाई शान्ति र सौहार्दपूर्ण वातावरणमा सम्पन्न गर्न हामी अहोरात्र खटेका छौं ।’ मेलाको सुरक्षा, सडक व्यवस्थापन, मनोरञ्जनका लागि खेल तमासा, श्रद्धालु भक्तजनको रात्रिवासका लागि धर्मशालालगायतको व्यवस्थापन गरिएको गढिमाई पञ्चवर्षीय मेला मूल व्यवस्थापन समितिका महासचिव मोतीलाल कुशवाहाले बताए । एक महिनासम्म लाग्ने मेलामा मंसिर १७ मा राँगा बलि र १८ मा बोका बलि दिने कार्यक्रम रहेको गढिमाई मन्दिरका पुजारी मंगल चौधरीले जानकारी दिए ।

मेला क्षेत्रमा ५ सय शौचालय र एक सय ५० भन्दा बढी चापाकलको व्यवस्था गरिएको महागढिमाई नगरपालिकाले जनाएको छ ।

एकमहिने मेलामा ७० लाखभन्दा बढी श्रद्धालुले मन्दिरको दर्शन गर्ने विश्वास आयोजक समितिले लिएको छ । मेला भर्न आउने श्रद्धालुलाई बासका लागि नि:शुल्क टेन्टको व्यवस्था गरिएको आयोजकले जनाएको छ । नि:शुल्क सेवा दिने उद्देश्यले निर्माण गरिएको टेन्टमा एकपटकमा ८० हजारदेखि एक लाख जनाले बास बस्न सक्ने व्यवस्था गरिएको आयोजकको दाबी छ ।

गढिमाई मेलालाई व्यवस्थित र सुरक्षित बनाउन जिल्ला सुरक्षा समितिले विशेष सुरक्षारण नीति अपनाएको बाराका प्रमुख जिल्ला अधिकारी फरिन्द्रमणि पोखरेलले बताए । मेलामा भक्तालुको भीड बढ्दै गएपछि आवश्यकताअनुसार एक हजारभन्दा बढी सुरक्षाकर्मी परिचालन गर्ने तयारी गरिएको उनले जानकारी दिए ।

मुख्य भीड हुने समयलाई ध्यानमा राख्दै नेपाल प्रहरी, सशस्त्र प्रहरी र राष्ट्रिय अनुसन्धानका गरी एक हजारभन्दा बढी सुरक्षाकर्मी परिचालन गरिने र मेलालाई शान्तिपूर्ण सम्पन्न गर्नका लागि सीसीटीभी क्यामरासमेत जडान गरिने योजना रहेको प्रजिअ पोखरेलले बताए ।

मेला अवधिभर उक्त क्षेत्रमा मदिराजन्य पदार्थ बिक्रीमा रोक लगाउने निर्णयसमेत गरिएको उनले बताए । ‘मदिराजन्य पदार्थ सेवन गरेपछि मेलामा आएका श्रद्धालुलाई असर पुर्‍याउन सक्ने भएकाले मदिराजन्य पदार्थलाई बिक्री वितरणमा प्रतिबन्ध लगाइएको छ,’ उनले भने, ‘यसले सुरक्षा व्यवस्थालाई पनि प्रभावित पार्ने अवस्थालाई मध्यनजर गरेका छौं ।’ स्थानीय प्रशासनको आग्रहलाई बेवास्ता गर्नेलाई कानुनी दायरामा ल्याउने उनले बताए ।