बारामा स्थानीय र प्रहरीबीच झडप
(बारा) — कलैया उपमहानगरपालिका–१५, बकुलहर गाउँमा स्थानीयबासिन्दा र प्रहरीबीच बुधवार राति झडप भएको छ । झडपले उग्ररुप लिएपछि त्यसलाई नियन्त्रणमा लिन प्रहरीले सात राउन्ड अश्रु ग्यास प्रहार गरेको छ । झडपमा दुवैतर्फ केही घाइते भएका छन् ।
केही दिन अघि जिल्ला प्रशासन कार्यालयमा दुई पक्षबीच भएको सहमति कार्यान्वयन नभएपछि प्रहरीले छठ घाटको छठी माताको माटो र ईंटले बनाइएको पिंड उठाउन जाँदा झडप भएको हो । हिन्दू र मुस्लिम समुदायबीच छठी माताको पिंड गत १९ गते (छठपछि) उठाउने सहमति थियो । त्यही छठ घाट नजिक मुस्लिम समुदायको कबरगाह (मसानघाट) पनि छ ।
झडपमा प्रहरी निरिक्षक रुद्रबहादुर शाहीसहित केही सुरक्षाकर्मीलाई स्थानीयले गरेको ढुंगा प्रहारबाट चोटपटक लागेको प्रहरी नायब उपरिक्षक रञ्जितसिंह राठौरले बताए । त्यसैगरी प्रहरीलाई घेरा हालेका स्थानीयमाथि प्रहरीले लाठी प्रहार गर्दा केही महिलासहित स्थानीयहरुसमेत घाइते भएको स्थानीय सामाजिक अगुवा मदन सहनीले बताए ।
‘पिंड उठाउने विवाद भएपछि उक्त पिंड वडा कार्यालय १५ मा राखिएको छ,’ प्रहरी नायब उपरिक्षक राठौरले भने, ‘गाउँमै बसेर विवाद मिलाउने सहमति भउपछि पिंड त्यहाँ राख्यौ ।’
