प्रदेश प्रमुख परियारले सम्हाले पदभार

अजित तिवारी

जनकपुर — प्रदेश २ का नवनियुक्त प्रदेश प्रमुख तिलक परियारले बुधबार पदभार ग्रहण गरेका छन् । परियारलाई प्रदेश सरकारका भौतिक पूर्वाधारमन्त्री जितेन्द्र सोनलले जनकपुरस्थित कार्यालयमा स्वागत गरेका छन् ।

बुद्ध एयरको बिहानको जहाजमा जनकपुर अवतरण गरेका प्रदेश प्रमुख परियारलाई एयरपोर्टमै संघीय सरकारका मन्त्री उपेन्द्र यादव र प्रदेश २ का मुख्यमन्त्री लालबाबु राउतले स्वागत गरे ।


प्रदेश २ मा सरकार रहेको समाजवादी पार्टी अध्यक्ष रहेका यादव बुद्ध एयरबाटै काठमाडौं फर्किने क्रममा दुवै जनाको भेटघाट भएको हो । ‘मिथिलानगरी जनकपुरमा स्वागत छ’ मन्त्री यादवले प्रदेश प्रमुख परियारलाई स्वागत गर्दै भने । प्रदेश प्रमुख परियार श्रीमती र नेपाली सेनाको निजी अंगरक्षकसहित जनकपुर पुगेका हुन् । प्रदेश प्रमुख परियारलाई एयरपोर्टमा नेकपाका सांसद, नेता र मेयरहरुले भब्य स्वागत गरे ।


एयरपोर्टबाट सोझै प्रदेश प्रमुखको कार्यालय रहेको जनकपुर चुरोट कारखानामा परियार पुगेका थिए । त्यहाँ उनलाई सरकारमा मन्त्री, सचिव र कर्मचारीहरु स्वागत गरेका थिए ।



प्रकाशित : कार्तिक २०, २०७६ १२:१५
प्रतिक्रिया
पठाउनुहोस्

नेपालको प्रथम श्रेणीको क्रिकेटमा पुनरागमन, शरदबाहेक सबैको ‘डेब्यु’

एमसीसीको राम्रो सुरुआत
विनोद पाण्डे, तस्बिर : हेमन्त श्रेष्ठ

काठमाडौँ — चौध वर्षपछि प्रथम श्रेणीको क्रिकेटमा नेपाल फर्किएको छ । इंग्ल्यान्डको मेरिलेबोन क्रिकेट क्लब (एमसीसी)सँग खेल्दै नेपालले आधिकारिक तीनदिवसीय खेलमा पुनरागमन गरेको हो । नेपालले टस जितेपछि ब्याटिङमा आएको एमसीसीले भोजन समयसम्म २८ ओभर खेलेर १ विकेट गुमाई ८४ रन बनाएको छ ।

विल रोड्स र कप्तान टोम वेस्ट्ली क्रिजमा छन् । रोड्स ४४ र वेस्टली २५ रन बनाई खेलिरहेका छन् । सोमपाल कामीले बिली गोडलम्यान १० रनमा आउट गरे । गोडलम्यानले गरेको प्रहारलाई कभरमा ललितनारायण राजवंशीले दोस्रो प्रयासमा क्याच आउट गरे ।

१० खेलाडीले बुधबार नेपालबाट प्रथम श्रेणीको क्रिकेटमा ‘डेब्यु’ गरे । शरद भेषावकरले नेपालले खेलेको सबै ४ प्रथम श्रेणीको क्रिकेटमा खेल्दै आएका छन् । नेपालले २००४ र २००५ मा गरी चार प्रथम श्रेणीको क्रिकेट खेलेको थियो । त्यसपछि नेपालले पहिलोपटक मान्यता प्राप्त तीनदिवसीय खेल खेलेको हो ।

कप्तान ज्ञानेन्द्र मल्लसहित दीपेन्द्रसिंह ऐरी, राजु रिजाल, आरिफ शेख, विनोद भण्डारी, सोमपाल कामी, पवन सर्राफ, सन्दीप लामिछाने, ललितनारायण राजवंशी, करण केसीले नेपालबाट प्रथम श्रेणीको क्रिकेटमा पहिलो खेल खेलेका हुन् । सोमपाल कामीले २०१५ र २०१६ मा गरी श्रीलंकामा क्लब क्रिकेट खेल्दा साराकेन्स स्पोर्टस क्लबबाट दुई प्रथम श्रेणीको म्याच खेलेका थिए ।

३ वर्षपछि क्यानको लोगो
नेपाली क्रिकेट टोलीले झन्डै ३ वर्षपछि क्यानको लोगो लगाएर मैदानमा उत्रिएको छ । नेपाल क्रिकेट संघ (क्यान)लाई अन्तर्राष्ट्रिय क्रिकेट परिषद् (आईसीसी)ले २०७३ को वैशाखमा निलम्बन गरेको थियो । तर विश्व क्रिकेटको सर्वोच्च निकायले नेपाली क्रिकेट टोलीलाई अन्तर्राष्ट्रिय क्रिकेटमा भने खेल्न दिइरहेको थियो ।

नेपाली क्रिकेट टोलीले अन्तर्राष्ट्रिय प्रतियोगितामा खेलिरहे पनि निलम्बनका कारण क्यानको झन्डा लगाएको थिएनन् । यो अवधिमा राष्ट्रिय क्रिकेट टोलीले नेपालको झन्डामात्र लगाएर खेलिरहेको थियो ।

एमसीसीसँगको खेलमा कप्तान ज्ञानेन्द्र मल्ल क्यानको लोगो समावेश सेतो शर्ट लगाएर टसका लागि गएका थिए । उनीसँगैं नेपाली टोली सोही किसिमको पोसाक लगाएर मैदानमा खेलिरहेका छन् ।


प्रकाशित : कार्तिक २०, २०७६ ११:४९
पूरा पढ्नुहोस्
प्रतिक्रिया
पठाउनुहोस्
×