चलचित्र महोत्सवको तयारी पूरा

कान्तिपुर संवाददाता

पर्सा — कात्तिक २१ देखि वीरगन्जमा सुरु हुन लागेको नेपाली चलचित्र स्वर्णिम महोत्सव ०७६ को तयारी अन्तिम चरणमा पुगेको आयोजकले जनाएको छ । वीरगन्जमा पत्रकार सम्मेनल गरी महोत्सव बारे जानकारी दिइएको हो । 

पत्रकार सम्मेलनमा महोत्सव तयारी समितिका संयोजक एवम् चलचित्र निर्माता संघका उपाध्यक्ष विमल पौडेलले महोत्सवको उद्घाट्न राष्ट्रपति विद्यादेवी भण्डारीले र समापन प्रदेश २ का मुख्य मन्त्री लालबाबु राउतले गर्ने बताए । पौडलले तराई र मधेसका पात्रलाई पनि नेपाली चलचित्रको मूल धारमा ल्याउने उद्देश्यले महोत्सवको आयोजना गर्न लागिएको बताए ।

पौडेलले महोत्सवमा नेपाली चलचित्रका पुराना पुस्ताका शिव श्रेष्ठ, भुवन केसी, राजेश हमाल, निर शाह, करिश्मा मानन्धर, गौरी मल्ल, निरुता सिंहदेखि नयाँ पुस्ताका अनमोल केसी, प्रदीप खडका, पल शाह, केकी अधिकारी, सामाज्ञी राज्यलक्ष्मी शाहसम्मका अभिनेता अभिनेत्रीदेखि नेपाली चलचित्र क्षेत्रसँग जोडिएका अन्य विधाका हस्तीसमेत सक्रिय सहभागी हुने बताए । उनले महोत्सवको आकर्षण बलिउडका चर्चित अभिनेता गोविन्दा पनि रहने बताए । पौडेलले नेपाली भाषी मात्र नभई मुलुकका अन्य भाषाभाषीले पनि हेर्ने र मनपराउने खालको बनाउन नेपाली चलचित्रलाई समयानुकुल र परिस्थितिजन्य रूपमा कथा तयार गरी निर्माण गर्न पनि महोत्सवले सघाउने बताए ।

वीरगन्ज महानगरपालिकाका मेयर विजयकुमार सरावगीले महोत्सवले कुनै न कुनै रूपमा वीरगन्जलाई लाभ मिल्ने हुँदा वीरगन्ज महानगरपालिकाको समेत महोत्सवलाई आवश्यक सहयोग गरेको बताए । उनले महोत्सवको सफलताले यस क्षेत्रकै भाषा, कला, संस्कृति एवं कलाकारलाई राष्ट्रिय तथा अन्तर्राष्ट्रिय क्षेत्रमा चिनाउन महत्त्वपूर्ण भूमिका खेल्ने बताए ।

वीरगन्ज उद्योग वाणिज्य संघका वरिष्ठ उपाध्याक्ष सुवोधकुमार गुप्ताले वीरगन्ज क्षेत्रकै पर्यटन प्रवर्द्धनमा महोत्सवले महत्त्वपूर्ण भूमिका खेल्नेमा आफू आशावादी रहेको बताए । उनले यस भेगका बासिन्दाले महोत्सवको सक्दो लाभ लिन सक्नुपर्ने बताए । महोत्सव आयोजक समितिका स्थानीय संयोजक नन्दु श्रीवास्तवले वीरगन्जेली सञ्चार जगत र वीरगन्जबासीलाई महोत्सवको सफलताको हातेमालो गर्न आग्रह गरेका थिए ।

प्रकाशित : कार्तिक १९, २०७६ ०९:४०
ADVERTISEMENT
प्रतिक्रिया
पठाउनुहोस्
ADVERTISEMENT

हुर्राको भाकामा छमछमी

कान्तिपुर संवाददाता

(धनकुटा) — यति बेला धनकुटाका मगर बाहुल्य गाउँबस्ती हुर्राको भाकाले गुञ्जिएको छ । तिहारलगत्तै सुरु हुने हुर्रा नृत्य तिहारपछिका केही दिनसम्म जारी रहन्छ । 

वारि गाउँ हेर्‍यो हौ सिमसिमे पानी
पारि गाउँमा हौ घमाइलो, देशै रमाइलो
सोमबार औंसी हौं खेलिजाउँ देउसी
गरि जाउँ रमाइलो, देशै रमाइलो

धनकुटाको मुढेबासबाट हुर्रा नाचको सुरुवात भएको मगर समुदायका अग्रजको दाबी छ । यसर्थ यतिबेला विशेषत चौबिसे क्षेत्रमा मादल, बासुरी, खैजडीसहित हुर्राको आकर्षक भाका ‘हुर्रा हा..हा...’ र ‘देशै रमाइलो...’ ले रौनकता छाएको छ । गाउँबस्तीमा जोर मादल र बाँसुरीको साथमा हुर्राको रौनक सुरु भइसकेको मगर संघका जिल्ला अध्यक्ष जेवी घले बताउँछन् ।

जिल्लाको चौबिसेको वसन्तटार, भेडेटार, राजारानी साथै साँगुरीगढी, सहिदभूमि गाउँपालिका र महालक्ष्मी नगरपालिका क्षेत्रमा मगर समुदायको बाहुल्य बस्तीमा प्रत्येक वर्ष हुर्रा नृत्यले रमाइलो प्रदान गर्ने मगर संघका पूर्व सचिव इन्द्र सारु मगर बताउँछन् । खासगरी मुलुकको पूर्वी केही जिल्लामा लोकप्रिय हुर्रा नाच धनकुटासँगै सुनसरी, मोरङ लगायतका जिल्लामा पनि विस्तार हुँदै गएको मगरले बताए ।

हुर्राको अर्को भाका देशै रमाइलो थेगोमा गाइन्छ । आफ्नै मौलिक पहिरनमा युवा युवती नृत्य र बाध्यबादनमा सहभागी हुने र वृद्धवृद्धा भने गीतको भाका हाल्न व्यस्त छन् । हुर्रामा चेली र माइतीबीचको भ्रातृत्व प्रेम दर्शाउने गरिएको वसन्तटारका मनप्रसाद मगरको भनाइ छ ।

एकापसमा हात समाएर गोलो घेरा लगाउँदै नाचिने हुर्रामा नाच्दा नाच्दै दिन र रात बितेको समेत पत्तै नहुने उनले बताए । हुर्रा भाकाको उद्गमस्थल चौबीसे गाउँपालिका १ ठूलो मुक्ताराका युवा जमातले त केही दिनदेखि प्रस्तावित कोपिला युवा क्लबमार्फत जिल्लाका विभिन्न स्थानमा पुगेर हुर्रा नृत्य प्रस्तुत गर्दै क्लबका अध्यक्ष दिवश मगरले बताए ।

भीमकुमारी मगर पनि हुर्राको भाका हाल्न निकै सिपालु मानिन्छिन् । मादल, बासुरी बजाउने र भाका हाल्नेहरू नृत्य गर्नेको गोलो घेराभित्र रहन्छन् । नृत्य गर्नेहरू बिस्तारै गीतको भाकामा चालमा चाल मिलाएर घुम्दै नाचिने गरिएको हुर्रामा सबै उमेर समूहका सहभागी हुन्छन् । तर नृत्यमा युवा युवतीको आकर्षण बढी रहने सहभागी सुवास मगर बताउँछन् ।

मगर मुक्ति मोर्चाका संयोजक सुवासले मादल र झ्यालीको ताल तथा गीतको भाका नाच्नका लागि जोसिलो हुने हुनाले मगरबाहेक अन्य समुदाय पनि हुर्रामा झुम्न आउने गरेको बताए । हुर्रा नृत्यलाई व्यवस्थित गर्न इन्द्र सारु, जेबी घले, मनबहादुर आले, डम्बर राना लगायतका युवा जमात अग्रसर छन् ।

प्रकाशित : कार्तिक १९, २०७६ ०९:४०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT