मालपोतमा सेवाग्राहीलाई सास्ती

सुनिता बराल

(बर्दिवास) — मालपोत कार्यालय बर्दिवासमा कर्मचारी अभाव हुँदा विभिन्न काम लिएर कार्यालय पुग्ने सेवाग्राही मारमा परेका छन् । मुद्दा फाँट र तामेली फाँटमा कर्मचारी अभाव भएपछि सेवाग्राहीलाई एउटै कामका लागि २/३ दिन धाउनुपर्ने बाध्यता छ । 

साविकका बर्दिवास, गौरीवास, हाथीलेट, किसाननगर, बिजलपुरा, खयरमारा, पशुपतिनगर (हाल बर्दिवास नगरपालिका) र भंगहा गाविस (हाल भंगहा नगरपालिकाका ३, ४ र ५) बाट सेवा लिन आउने सेवाग्राही मर्कामा परेका हुन् । जनतालाई सजिलै सेवा दिने उद्देश्यले २०७२ सालमा स्थापना भएको मालपोत कार्यालय बर्दिवासबाट कर्मचारी नहुँदा काममा ढिलासुस्ती हुने गरेको जनगुनासो बढेको छ ।

५ धुर जग्गा पास गर्न कार्यालय पुगेकी सिन्धुली भिमानकी पुजादेवी साहले भनिन्, ‘कित्ताकाट गरेर जग्गा पास गराउन ३ दिनदेखि धाइरहेको छु । ३ हजार रुपैयाँ कागज तयार पारिदिनेले लिए । काम अझै भएको छैन ।’ काम गराउने ठाउँमा कर्मचारी नै नभएपछि अरुकै हातमा कागजपत्र र मागेजति पैसा दिएर काम लगाएको उनले बताइन् ।

कर्मचारीको अभावमा काम ढिला हुने भएपछि सेवाग्राही विचौलियाबाट पनि ठगिने गरेका छन् । एक दिनमै काम नहुँदा बारम्बार कार्यालय धाउनको झन्झटले काम गराइदिन्छु भन्ने व्यक्तिलाई सेवाग्राहीले मागेजति पैसा दिएर काम गराउने गरेका स्थानीय सरिता साहले बताइन् । हाल कार्यालयमा एक उपसचिव, दुई अधिकृत, सात नायबसुब्बा (नासु), तीन खरिदार, एक सहलेखापाल, दुई कम्प्युटर अपरेटर र चार कार्यालय सहयोगीसहित २० जनाको दरबन्दी भए पनि १० जनामात्र छन् । यिनमा पनि स्थायी कर्मचारी ५ जनामात्र रहेको कार्यालयले जनाएको छ ।

गत भदौ ३० गतेबाट मालपोत कार्यालय बर्दिवासले ‘अनलाइन’ बाट काम सुरु गरेको छ । अनलाइन सेवा सुरु भएपछि कार्यालयबाट काम लिन अझै ढिलासुस्ति हुने गरेको सेवाग्राही बताउँछन् ।

कार्यालयमा विभिन्न फाँटमा कर्मचारी नहुँदा र भएका कर्मचारी पनि अनलाइन सेवाका लागि दक्ष नभएकाले सेवाग्राहीले झन् दु:ख पाएका लेखापढी व्यवसाय सञ्चालन गरेर बसेका शान्तप्रसाद चौलगाईंले बताए । कार्यालयबाट सेवा प्रवाह ढिलो हुने गरेकाले कतिपय सेवाग्राहीको काम कर्मचारीको उपस्थिति र अनुकुलतामा गर्नपरेपछि सेवाग्राहीले बाध्यतामा आफूहरूलाई काम छोडेर जाने गरेको उनले बताए ।

सेवाग्राहीको काम गरे वापत लेखापढी व्यवसायी संघ बर्दिवासले तोकेको शुल्कका आधारमा आफूले सेवाग्राहीबाट १ हजार ५ सयभन्दा बढी रकम नलिएको उनले दाबी गरे । यता सेवाग्राहीले भने आफूसँग ३ हजारसम्म लिने र आफूलाई पैसा तिरेको रसिदसम्म नदिने गरेको बताएका छन् ।

यता, कार्यालयका निमित्त प्रमुख कोमल रञ्जन बरालले भने जनताको काममा कुनै ढिलासुस्ती नभएको दाबी गर्छन् । कर्मचारी अभावकै बीचमा पनि नेट र सर्भरले काम गर्दा जनताको काम नरोकिएको उनले बताए ।

प्रकाशित : कार्तिक ३, २०७६ १०:००
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

जानकी लीलाको तयारी

श्यामसुन्दर शशि

(जनकपुर) — भारत उत्तर प्रदेश सरकारको आयोजनामा यही कात्तिक ७ गतेदेखि १० सम्म अयोध्यामा आयोजन हुन लागेको दीप महोत्सव तथा अन्तर्राष्ट्रिय रामलीला महोत्सवमा सहभागी हुन मिथिला नाटयकला परिषद् जनकपुरधाम जानकी लीलाको तयारीमा जुटेको छ ।

गत वर्ष भारत सरकारले नयाँ दिल्ली र जयपुरमा आयोजन गरेको अन्तर्राष्ट्रिय रामायण महोत्सव तथा उत्तर प्रदेश सरकारको अयोध्या शोध संस्थानले ०७२ मा आयोजन गरेको अन्तर्राष्ट्रिय रामलीला महोत्सवमा पनि मिनाप सहभागी भएको थियो । यस पटकको यात्रालाई मिनाप अध्यक्ष परमेश झा भावनात्मक यात्राको नाम दिन्छन् ।

नेपाल र भारत सरकार रामायण सर्किट परियोजनामार्फत मिथिला–अवधबीचको रामायणकालीन सम्बन्धलाई अझ सुदृढ बनाउने पहल गरिरहेका बेला जनकपुरको मिनापको यस कदमले दुई देशबीचको वैवाहिक तथा सांस्कृतिक सम्बन्धलाई अझ सुदृढ बनाउने जानकी मन्दिरका छोटे महन्त रामरोशन दासको प्रतिक्रिया छ ।
भारत, रूस, मलेसिया, बंगलादेश, श्रीलंका, चीन लगायतका देशका रामलीला समूह सहभागी रहेको यस महोत्सवमा नेपालको प्रतिनिधित्व गर्दै मिनाप अयोध्या जान लागेकोमा जनकपुर उपमहानगर पालिकाका मेयर लालकिशोर साहले प्रशन्नता व्यक्त गरे ।

‘यो मिथिला र जनकपुरमात्रको प्रतिष्ठाको विषय होइन, अन्तर्राष्ट्रिय रामलीला महोत्सवमा जनकपुरको नाटय समूहको सहभागिता सिंगै मुलुकको प्रतिष्ठाको विषय हो,’ साहको प्रतिक्रिया छ । रामलीलामा सामान्यतया रामको चरित्रलाई महत्त्व दिइन्छ तर मिनापको जानकी लीलामा जानकीको चरित्रलाई महत्त्वका साथ उजागर गरिएको छ ।

विवाह महोत्सव समिति गठन
मंसिर दोसो साता आयोजन हुने सप्ताहव्यापी राम जानकी विवाह महोत्सव भव्यतासाथ मनाउने निर्णय भएको छ । यस वर्ष अयोध्याबाट साधु सन्तहरू जन्तीका रूपमा सहभागी हुने भएकाले महोत्सवलाई अझ भव्य बनाउन विभिन्न समिति गठन गरिएका छन । जानकी मन्दिरका छोटे महन्त रामरोशन दास वैष्णवको अध्यक्षतामा बसेको बैठकमा जनकपुर उपमहानगर पालिकाका प्रमुख लालकिशोर साह, जिल्लास्थित सुरक्षा निकायका प्रमुखहरू, युवा संघ संस्थाका प्रतिनिधिसँगै नागरिक समाजका अगुवाको उल्लेख्य सहभागिता थियो ।

विवाह महोत्सवमा सहभागी हुन भारतका अयोध्या, बनारस, दिल्ली लगातका सहरबाट प्रत्येक वर्ष साधु महात्माको सहभागिता रहने गरे पनि प्रत्येक पाँच वर्षमा अयोध्याबाट विधिवत जन्ती नै आउने प्रावधान छ । छोटे महन्त रामतपेश्वर दास वैष्णवका अनुसार यस वर्ष सयौंको संख्यामा सन्त महन्तको सहभागिता हुनेछ । बैठकमा मञ्च व्यवस्थापन, शान्ति सुरक्षा, शौचालय तथा सरसफाई, खानेपानी व्यवस्थापन, पण्डाल तथा आवास व्यवस्थापनलगायतका उपसमितिहरू गठन गरिएको थियो भने जानकी मन्दिरको अगुवाईमा मूल समिति गठन गरिएको थियो ।

प्रकाशित : कार्तिक ३, २०७६ ०९:५९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT