प्रयोगमा नआउँदै भासियो कालोपत्रे

वीरगन्ज बस टर्मिनल सञ्चालनका लागि ठेकेदारले सरसफाई गर्ने क्रममा कालोपत्रे उप्केको र भाँसिएको पाइएको हो
भूषण यादव

वीरगन्ज — वीरगन्जमा हालै निर्माण भएको बस टर्मिनलको कालेपत्रे भासिएको छ  । बसमा यात्रु चढाउने/ओराल्ने क्षेत्रमा कालोपत्रे भासिएको हो  ।

बस टर्मिनल सञ्चालनका लागि ठेकेदारले सरसफाइ गर्ने क्रममा कालोपत्रे उप्केको र भासिएको थियो। असोज पहिलो साता महानगरपालिका कार्यालयले सार्वजनिक निजी साझेदारीअन्तर्गत एनके इन्टरनेसनललाई ५ वर्षका लागि ७ करोड ५० लाख रुपैयाँमा बस टर्मिनल सञ्चालनका लागि सम्झौता गरेको थियो ।

‘ठेक्का परेपछि सञ्चालनका लागि सरसफाइ गरिंदैथियो,’ एनके इन्टरनेसनलका निर्देशक केशव नेपालले भने, ‘प्रयोगमा नआउँदै यात्रु चढाउने/ओराल्ने क्षेत्रको कालोपत्रे ठाउँ/ठाउँमा भासिएको पाइयो ।’

नेपालका अनुसार बस टर्मिनलको नवनिर्मित भवनमा समेत समस्या देखिएका छन् । ‘छतमा जम्मा भएको वर्षातको पानीको निकास निकालिएको छैन,’ उनले भने, ‘ट्यांकीमा पानी भर्ने पाइप जडान गरिएको छैन, पानी बाहिरिने पाइप मात्र छ । अन्य दुईवटा ट्यांकीमा पाइप जडान गरिएको छैन ।’ नाला सफा नगरी ढक्कन लगाइएको छ, जसले गर्दा ढलको पानी ‘ओभर फ्लो’ भइरहेको छ । ‘बिजुली जडानमा समेत कैफियत छ,’ उनले भने, ‘मोज्याक र टाइल्सको ‘फिनिसिङ’ समेत गरिएको छैन ।’

गत भदौ १० मा उपप्रधान स्वास्थ्य तथा जनसंख्यामन्त्री उपेन्द्र यादव र प्रदेश– २ का मुख्यमन्त्री लालबाबु राउतले बस टर्मिनलको उद्घाटन गरेका थिए । १५ करोड ७० लाख ८६ हजार रुपैयाँमा निर्माण सम्पन्न भएको बस टर्मिनलको ठेक्का आशिष/पप्पु/रोशन जेभीले पाएका थिए । २ वर्षभित्र निर्माण गर्ने गरि २०७१ माघ २२ मा सम्झौता भए पनि विभिन्न कारणले निर्माणमा ढिलाइ भएको महानगरपालिकाले जनाएको छ । ९० प्रतिशत सफ लोन, साढे ७ प्रतिशत सरकारी अनुदान र दुई दशमलव पाँच प्रतिशत महानगरपालिकाको म्याचिङ फन्डबाट ५ बिघा ५ कट्ठामा बस टर्मिनल निर्माण भएको हो ।

बस टर्मिनल निर्माणका लागि १९ करोड ८ लाख ९५ हजार रुपैयाँ इस्टिमेट गरिएको थियो । ठेकेदार कम्पनीले १७ करोड ७३ लाख ५० हजार रुपैयाँमा ठेक्का सकार गरे पनि १५ करोड ७० लाख ८६ हजार मात्र खर्च भएको महानगरपालिकाले जनाएको छ ।

बस टर्मिनल प्रयोगमा नआउँदै पिच भासिएको र भवनमा समेत विभिन्न कैफियत देखिएपछि के आधारमा ठेकेदारलाई भुक्तानी गरियो भन्ने विषयमा महानगरवासीले चासो लिएका छन् । वीरगन्ज युवा समाजका अध्यक्ष कमल चौगाईंले बस टर्मिनल निर्माणमा भएको अनियमितताबारे छानबिन गर्नुपर्ने बताए ।

महानगरपालिकाको योजना शाखाका इन्जिनियर कुमारकान्त झाका अनुसार कन्सल्ट्यान्टले बिल पेस गरेपछि भुक्तानी दिने हो । ‘कन्सल्ट्यान्ट २४ औँ घन्टा निर्माणस्थलमै हुन्छ,’ उनले भने, ‘उसैले फाइनल गरेको बिलको आधारमा भुक्तानी गरिन्छ ।’ झाका अनुसार बस टर्मिनल निर्माण भएको क्षेत्र पहिले दलदल थियो । ‘दलदल क्षेत्र भएकाले ठेकेदारले कटिङ गरेर नयाँ माटो फिलिङ गर्नुपर्थ्यो,’ उनले भने, ‘बेस राम्रो नभएकाले पिच भासिएको हो ।’ यस अघि ठेकेदारलाई पटकपटक भन्दा पनि भवनको छतको काम गरेनन् ।

महानगरपालिकाले २ दिन अगाडि योजनाका कन्सल्ट्यान्ट र ठेकेदार कम्पनीका प्रतिनिधिलाई बोलाएर स्थलगत अनुगमन गरेको थियो । ‘हस्तान्तरण गरेको एक वर्ष भित्रसम्म योजनाको मर्मत सम्भारको जिम्मेवारी ठेकेदार कम्पनीकै हुन्छ,’ इन्जिनियर झाले भने, ‘यथाशीघ्र मर्मत गर्न निर्देशन दिएका छौँ ।’

ठेकेदारले बस टर्मिनल हस्तान्तरण गरेको झन्डै ८ महिनापछि महानगरपालिकाले गत भदौमा उद्घाटन गरेको हो । ‘पैसा भुक्तानीका लागि ठेकेदारले गत पुसमै बस टर्मिनल हस्तान्तरणको कागजात बुझाएको थियो,’ नाम उल्लेख नगर्ने सर्तमा महानगरका एक अधिकृतले भने, ‘मर्मत सम्भारको अवधि अब तीन महिना मात्र बाँकी छ ।’ महानगरपालिकाले सितारा कन्सल्ट्यान्टलाई बस टर्मिनलको कन्सल्टयान्ट नियुक्त गरेको थियो ।

कन्सल्ट्यान्टका इन्जिनियर अमित श्रीवास्तवका अनुसार वर्षातमा पानी जमेकाले पिच भासिएको हो । ‘पानी जम्यो,’ उनले भने, ‘महानगरपालिकाको निर्देशन दिएबमोजिम मर्मत सम्भारका लागि ठेकेदार कम्पनीलाई भनेका छौँ ।’ मर्मत सम्भार नगरे निर्माण कम्पनीले राखेको करिब डेढ करोड धरौटी रकम फिर्ता नगर्ने महानगरपालिकाले जनाएको छ ।

मुख्य भवन भएको बस टर्मिनलमा ५५ वटा सटर, रेस्टुरेन्ट, यात्रु प्रतीक्षालय, चालकलाई आराम कक्ष र प्राथमिक स्वास्थ्य कक्षको पनि व्यवस्था छ । लामो दूरीका ५९ बसका साथै ट्याक्सी, लोकल बस, मिनी बस, रिक्सा, मोटरसाइकलको छट्टाछुट्टै पार्किङको व्यवस्था गरिएको छ । बैंक एटीएम, सैलुन र ब्युटीपार्लरको समेत सुविधा रहने महानगरपालिकाले जनाएको छ ।

प्रकाशित : आश्विन १८, २०७६ १०:५८
प्रतिक्रिया
पठाउनुहोस्
ADVERTISEMENT

डायलाइसिस कक्षमै २ मेसिन थन्किए

शंकर आचार्य

पर्सा — नारायणी अस्पतालको डायलाइसिस कक्षमा ९ मध्ये ७ मेसिन मात्र प्रयोगमा छन्  । बाँकी दुई मेसिन थन्किएको थन्कियै छन्  ।

एक वर्षअघि साँघुरो कक्षको कारण त्यहाँ २ वटा मेशिन मात्र सन्चालन भएका थिए । गत बर्षको भदौको तेश्रो सातादेखि साबिकको आइसियु कक्षमा डायलाइसिस कक्ष सन्चालन गर्न थालिएको हो । तर नया कक्षमा पनि सबै डायलसिन मेशिन सन्चालन गर्नका लागि पर्याप्त हुन सकेको छैन ।

आईसीयू कक्ष हाल इमर्जेन्सी कक्षको माथिल्लो तल्लामा नवनिर्मित भवनमा सञ्चालनमा रहेको छ । डायलाइसिस कक्षकी इन्चार्ज स्टाफ नर्स ज्योति गुप्ता बाँकी रहेका २ वटा डायलाइसिस मेसिन प्रयोगमा ल्याउन हालको कक्ष पनि सानो भएको बताउँछिन । ‘हामीलाई अझै पनि आवश्यक आकारको कक्षको अभाव छ,’ उनले भनिन, ‘२ वटा मेसिन चलाउन सकेका छैनौं, दुबै मेसिनको नियमित सरसफाइ गरेर राखेका छौं ।’

कुल ९ मध्ये २ दाताले र बाँकी सरकारले उपलब्ध गराएको मेसिन हो । एकै साथ ७ मेसिन सञ्चालनमा आएपछि विगतको जस्तो डायलाइसिसका लागि आउने बिरामीले उपचारका लागि प्रतीक्षा गर्नुपर्ने बाध्यताको भने अन्त्य भएको गुप्ता दाबी गर्छिन् ।

‘विगतमा मेसिन कम हुँदा बिरामीले लामो समय उपचारका लागि कुर्नुपर्थ्यो, अहिले त्यो स्थिति छैन,’ उनले भनिन्, ‘दैनिक १४ बिरामीको उपचार गरिरहेका छौं, हाल नियमित उपचारका लागि आउने बिरामी ४० छन, अहिले प्रतीक्षामा बस्ने बिरामीको संख्या ८ देखि १० मात्र छ ।’

बाँकी रहेका २ मेसिन पनि सञ्चालनमा आए कुनै बिरामीले पनि उपचारका लागि प्रतीक्षा गर्न नपर्ने स्थिति आउने उनले बताइन् । हाल एक बिरामीलाई ३ देखि साढे ३ घण्टाको सेसनमा डायलाइसिस गरिन्छ । २०७१ असोज १३ बाट यो अस्पतालमा डायलाइसिस सेवा सुरु गरिएको हो । उपचार गराउन आउने अधिकांश पर्सा, बारा र रौतहट जिल्लाका हुने गरेका छन् । बिरामीमध्ये महिलाको तुलनामा पुरुष बढी हुने गरेका छन् ।

बिरामी ३० देखि ८५ वर्ष उमेरसम्मका हुने गरेका छन् । बिरामीलाई सरकारले निःशुल्क उपचार सेवा उपलब्ध गराउँछ । तराईका सरकारी अस्पतालमध्ये वीरगन्जपछि भरतपुर र जनकपुरमा मात्र डायलाइसिस सुविधा उपलब्ध रहेको छ ।

प्रकाशित : आश्विन १८, २०७६ १०:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT