पतिबाटै असुरक्षित महिला

सामाजिक, पारिवारिकसँगै घरायसी उल्झनका कारण महिला घरपरिवारबाटै असुरक्षित छन्
भरत जर्घामगर

(सिरहा) — सिरहा प्रहरीले हत्या घटनाको अनुसन्धान दायरालाई बढाएर अपराधी पक्राउलाई तीव्रता दिएपछि महिला पतिबाटै असुरक्षित भएको रहस्य खुलेको छ । दुई वर्षअघि पति सत्य नारायण यादवको हत्या भएपछि सिरहा कल्याणपुर नगरपालिका–४ की २५ वर्षीया गीतादेवीले देवर अक्षय कुमारसँग २०६६ सालमा सामाजिक रीतिरिवाज अनुसार विवाह गरिन् । 

बालबच्चा नजन्मिँदै पति सत्यनारायणको हत्या भएपछि अक्षयले सहमतिमै भाउजू गीतालाई स्विकारी विवाह गरेका थिए । तर, चार वर्ष नबित्दै गीताको पनि हत्या भयो । घटनाको ६ वर्षपछि उनको हत्या अक्षयले गरेको प्रहरी अनुसन्धानबाट खुलेको छ । दाजुको मृत्युपछि अक्षयले भाउजूसँग सहमतिमै बिहे गरे पनि पछि उनले दाइजोमा ५० हजार नगद र मोटरसाइकल माग गर्न थाले । बिहेपछि अक्षय र गीता कर्जन्हा नगरपालिका २ मा डेरा गरी बस्न थाले । २०७० पुस ९ गते उनीहरू मेला हेर्न मिर्चैया बजार गएका थिए । घर फर्किने क्रममा कर्जन्हा ४ स्थित भेडवा खोलामा गीताको घाँटीमा ब्लेडले काटिएको अवस्थामा शव फेला पर्‍यो ।

घटनास्थलमा जिकैं माओवादी नामबाट हिन्दीमा लेखिएको ‘हमारा सूचना’ भन्ने पर्चा भेटिएको थियो । घटना अन्तै मोड्न र आफू बच्नलाई अक्षयले त्यो पर्चा आफैंले लेखेर घटनास्थलमा छाडेको प्रहरी अनुसन्धानबाट खुलेको छ । दाइजो नदिएकै कारण गीताको हत्या गरेको प्रहरीसमक्ष उनले बयान दिएका छन् । ‘गीताको शव नजिकै भेटिएको पर्चाबाट अनुसन्धान थाल्यौं, पर्चामा लेखिएको अक्षर र प्रतिवादीले अनुसन्धान अधिकृतसमक्ष लेखेको नमुना अक्षर प्राविधिक परीक्षणका लागि केन्द्रीय विधि विधान प्रयोगशालामा पठायौं,’ सिरहाका प्रहरी प्रमुख एसपी उमाप्रसाद चतुर्वेदीले भने, ‘हस्तलिपि मेल खाएको प्रतिवेदन आधारमा अक्षयलाई घटनाको ६ वर्षपछि पक्राउ गर्न सफल भयौं ।’ घटनापछि विदेश गएका अक्षयको ११ वर्षीय छोरा छन् ।’

मञ्जु रायले सुखीपुर नगरपालिका ७ का इलियास मियासँग प्रेम गरिन् । उनीहरू बिहेपछि ससुराली घरको ५ सयमिटरको दुरीमा गोलबजार नगरपालिका ६ का नरेन्द्र झाको घरमा डेरा गरी बस्न थाले । मञ्जुले बालिकालाई जन्म दिइन् । बालिकाको जन्मेसँगै इलियासले आफ्नो बच्चा नभएको विवाद गर्न थाले । त्यही विषयमा उनीहरूबीच विवाद बढ्दै गयो । गतवर्ष फागुन २१ गते मञ्जुको शव डेरामै फेला पर्‍यो ।

घटनापछि इलियासले सासूलाई मञ्जुको मृत्यु भएको खबर सुनाएका थिए । पोस्टमार्टम रिर्पोटमा आत्महत्या वा विष सेवन गरेको नदेखिएपछि प्रहरीले उनका पति इलियासमाथि अनुसन्धान थाल्यो । मञ्जुसँग प्रेम गर्दा
राजेश पासवान भनेर ठगेका इलियासले नै मञ्जुको हत्या गरेको प्रहरीको अनुसन्धानबाट खुल्यो । प्रहरीले उनलाई पक्राउ गरी सार्वजनिक गरेको छ । चालु आर्थिक वर्षको दुई महिनाको अवधिमा समेत एउटा घटना भएको प्रहरीले जनाएको छ ।

प्रकाशित : आश्विन १२, २०७६ १०:०५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

मध्यपहाडी लोकमार्ग : लमजुङ खण्डमा विवाद

आश गुरुङ

(लमजुङ) — मध्यपहाडी (पुष्पलाल) लोकमार्ग बस्तीभित्रबाट बनाउने सरकारी योजनाको विरोधमा स्थानीय उत्रिएका छन् । उनीहरूले सडक निर्माणका लागि रेखांकन (सर्भे) समेत गर्न दिएका छैनन् । सरकारले जसरी पनि बस्ती भित्रबाटै सडक निर्माण गर्ने योजना अघि सारेको भन्दै स्थानीय सशंकित बनेका छन् । 

स्थानीयले ५ वर्षदेखि सर्भे गर्न नदिएका हुन् । हाल बस्तीभित्र सडकको लगत कट्टा भएको छैन । सडकका लागि प्रयोग गरिएको जग्गाको कर स्थानीयले तिर्दै आएका छन् । सुन्दरबजार नगरपालिका–६ खत्रीठाँटीका नवीन श्रेष्ठले कुनै पनि हालतमा अहिलेको सडकबाट लोकमार्ग बनाउन नदिने बताए । ‘हामीले अस्थायी रूपमा आफ्नै लागि सडक कालोपत्रे गरेका हौं । यही बाटो पछयाउँदै मध्यपहाडी लोकमार्ग लान्छु भन्न पाइँदैन,’ उनले भने, ‘सरकारले चाहेमा विकल्प निकालेर तलमाथिबाट सडक लैजान सक्छ । सुकुम्बासी भएर हामी जग्गा दिन सक्दैनौं ।’ केही साताअघि आफ्ना मागहरू लिएर भौतिक पूर्वाधार तथा यातायात व्यवस्थामन्त्रीसँग भेट भएको र मन्त्रीबाट सकरात्मक आश्वासन नपाएको स्थानीयको गुनासो छ ।

स्थानीयको अवरोले दायाँबायाँ क्षेत्रमा सडक निर्माण भए पनि सुन्दरबजार क्षेत्रमा लोकमार्ग निर्माण हुन सकेको छैन । पाउँदीदेखि सुन्दरबजार हुँदै खत्रीठाँटी भएर किरिञ्चेखोला पुग्नेगरी सडक निर्माण गरिने भनिएको छ । करिब ८ किमिको क्षेत्रमा सर्भे नभएको हो । लोकमार्गको मापदण्ड अनुसार दायाँबायाँ ३१/३१ मिटर फराकिलो बनाएमा बजार ध्वस्त हुने र अर्बौं रुपैयाँको नोक्सान हुने भन्दै स्थानीय आन्दोलनमा छन् । संघर्ष समितिका संयोजक उत्तम गुरुङले वैकल्पिक रूपमा सडकको सर्भे गरेर निर्माण गर्न भने पनि सरकारी पक्ष नमानेको बताए । ‘हामी बजारको बीचबाट सडक लान दिँदैनौं । विकल्प सरकारले खोज्नुपर्छ’ उनले भने, ‘कहाँबाट बाटो लाँदा कम क्षति हुन्छ,
त्यहाँबाट लानु पर्छ ।’

पाउँदीदेखि सुन्दरबजार, खत्रीठाँटी हुँदी किरिञ्चेसम्म यसअघिको कच्ची सडकलाई पछयाँदै सडक निर्माण गर्ने आयोजनाको योजना छ । यसअघि सडक भएकाले यही सडकलाई पछयाएमा खर्च कम लाग्ने आयोजनाको दाबी छ । तर, उक्त सडकको लगत कट्टा नगरेको, सडक भएकै ठाउँबाट अधिग्रहण गरेर सडक लाँदा प्रायः सबै सुकुम्बासी हुने भन्दै स्थानीयले विरोध जनाएका हुन् । ‘कतिपयले पुर्ख्यौली ठाउँ बेचेर घर बनाए । विदेशको कमाइले बनाए । घर बनाइएको ठाउँमा सडक बनाउने अनि हामी सुकुम्बासी हुने लमजुङ उद्योग वाणिज्य संघ सुन्दरबजार इकाईका निवर्तमान अध्यक्ष गालु मियाले भने । स्थानीयले बस्तीबाट सडक नलान माग गर्दै मन्त्रालय र गण्डकी प्रदेश सरकारसमक्ष प्रमुख जिल्ला अधिकारीमार्फत ज्ञापनपत्र बुझाएको बताएका छन् । माग पूरा नभए थप आन्दोलन गर्ने स्थानीयले बताएका छन् ।

सुन्दरबजार नगरपालिकाका प्रमुख जनकराज मिश्रले बस्तीभित्र सडक पार्ने योजनामा सहमति नभएको बताए । ‘जनतालाई सुकुम्बासी बनाउन दिइने छैन । यसमा स्थानीय सरकार प्रतिबद्ध छ’ बिहीबार आयोजित पत्रकार भेटघाटमा उनले भने । नगरपालिकाको नगरसभाले मानव वस्ती नभएको पाउँदी खोलाको तिरैतिर सडक निर्माण गर्न माग गरिसकेको छ । उक्त ठाउँबाट सर्भे गरिए नयाँ बजारको अवधारणा पूरा हुने र क्षतिपूर्ति कम तिर्नुपर्ने सुझाव छ । यसले सुन्दरबजारलाई चक्रपथका रूपमा समेत विकास गर्न सकिने भएकाले यस क्षेत्रमा मध्यपहाडी लोकमार्गलाई सोही अनुसार गरिनुपर्ने, यसबाट केही स्थानीय सुकुम्बासी बन्न गएमा सरोकारवालाले रकम उठाएर भए पनि क्षतिपूर्तिमा सरकारलाई सहयोग गर्ने संघर्ष समितिले बताएको छ ।

स्थानीय द्वारिकाप्रसाद मिश्रले सरोकारवालालाई मागबारे जानकारी गराए पनि समस्याको समाधान नभएको बताए । ‘हामी विकासविरोधी होइनौं । बस्तीबाट २/३ किमि टाढा सडकमार्ग बनाएका धेरै उदाहरण छन्,’ उनले भने । लोकमार्गको मापदण्ड लागु गरिए सार्वजनिक संरचनासहित ८ सय १३ घर विस्थापित हुने उनले बताए ।

स्थानीयको अवरोध र माग सम्बन्धमा मध्यपहाडि लोकमार्ग समस्या अध्ययन तथा सुझाव संकलन गर्न गण्डकी प्रदेशका मन्त्री रामशरण बस्नेतको नेतृत्वमा कार्यदल गठन भएको थियो ।

प्रकाशित : आश्विन १२, २०७६ १०:०४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×