‘नेपालीको न्यानो स्वागत कहिल्यै बिर्सने छैन’

शंकर आचार्य

पर्सा — ४० औं विश्व पर्यटन दिवसको अवसरमा वीरगन्ज नाका हुँदै नेपाल प्रवेश गरेका फ्रान्सेली पर्यटकलाई भव्य स्वागत गरिएको छ । शुक्रबार बिहान करिब साढे ९ बजे शंकराचार्य नेपाल प्रवेशद्वारमा पहिलो पर्यटकका रूपमा आइपुगेका फ्रान्सेली युवा पर्यटक २३ वर्षीय ओलिभर दि लेभवर्टलाई स्वागत गरिएको हो ।

विश्व पर्यटन दिवशको अवसरमा वीरगन्ज नाका हुँदै भित्रिएका पहिलो फ्रान्सेली पर्यटकलाई शुक्रबार स्वागत गरिँदै ।तस्बिर : शंकर/कान्तिपुर

वीरगन्ज महानगरपालिकाको कार्यालय, होटल तथा पर्यटन व्यवसायी संघ, पर्यटक प्रहरी लगायतका सरोकारवालाले उनलाई फुलमाला, खादासहित स्वागत गरेका हुन् ।

आकस्मिक रूपमा न्यानो स्वागत पाएपछि लेभवर्टले अत्यन्त खुसी लागेको बताए । ‘नेपालमा यसरी भव्य र न्यानो स्वागत पाइएला भनेर सोचेको पनि थिइन, नेपाल र नेपालीबारे राम्रा कुरा सुनेको थिएँ, अहिले प्रत्यक्ष अनुभव भयो, म यो स्वागत र आफ्नोपन कहिल्यै बिर्सने छैन,’ उनले भने, ‘म स्वदेश फर्केर आफना आफन्त, इष्टमित्रलाई जीवनमा कम्तीमा एकपटक नेपाल भ्रमण गर्न अवश्य प्रेरित गर्नेछु ।’

अध्ययनको सिलसिलामा आफू १ वर्षदेखि भारतमा रहँदै आएको र यसै क्रममा पहिलो पटक नेपाल प्रवेश गरेको उनले बताए । १५ दिने नेपाल यात्राको क्रममा आफू काठमाडौं बस्नुका साथै लाङटाङमा ट्रेकिङमा जाने योजना बनाएर आएको बताए । ‘मैले हालसम्म विश्वका २० भन्दा बढी देशको भ्रमण गरिसकेको छुँ,’ उनले भने, ‘नेपाल जस्तो स्वागत सत्कार कतै पाएको थिइन, म अत्यन्त प्रभावित भएको छुँ ।’

यसअघि लेभवर्टलाई वीरगन्ज महानगरका मेयर विजयकुमार सरावगी, उपमेयर शान्ति कार्की, होटल तथा पर्यटन व्यवसायी संघ वीरगन्जका अध्यक्ष हरि पन्त, भिजिट मधेस कार्यक्रमका संयोजक ओमप्रकाश सर्राफ लगायतकाले स्वागत गरेका थिए ।

संघले लेभवर्टलाई अध्यागमन कार्यालयमा भिसा आवेदन प्रकृयाका लागि सहजीकरण गर्नुका साथै निःशुल्क खाजा तथा खाना समेत खुवाएको थियो । नेपाल प्रवेशद्वारबाट फर्कने क्रममा लेभवर्ट संघको र्‍यालीमा सहभागी समेत भए ।

प्रकाशित : आश्विन ११, २०७६ ११:३७
प्रतिक्रिया
पठाउनुहोस्

नगरपालिका कार्यालय तोडफोड

शिव पुरी

रौतहट — शिक्षक सरुवाको विषयलाई लिएर विद्यार्थीले शुक्रबार कटहरिया नगरपालिकाको कार्यालयमा तोडफोड गरेका छन् । विद्यार्थीले त्यहाँ रहेको प्रहरी कार्यालयको सवारी साधनमा समेत क्षति पुर्‍याएका छन् । घटनाका बेला बिहान बजारको स्थिति तनावपूर्ण थियो ।

कार्यपालिकाको बिहीबार बसेको बैठकले नगर अन्तर्गत जनता मावि कटहरियाका सहायक प्रधानाध्यापक सचेन्द्रप्रसाद यादव लगायत ९ जना शिक्षकलाई अन्यत्र सरुवा गर्ने निर्णय गरेको थियो । त्यसको विरोधमा विद्यार्थीले कार्यालयमा तोडफोड गरेका हुन् । यादववलाई मावि भषेडवा सुरुवा गरिएको थियो ।

तोडफोडबाट कार्यालयको ६ वटा ल्यापटप, ६ वटा डेक्सटप कम्प्युटर, १ सय ८५ वटा झोला, कार्यालयको सीसी टीभी क्यामेरा र झ्यालमा क्षति पुगेको प्रहरीले जनायो । उनीहरूले नगरपालिकाको केही कागजात च्यातेर फालिदिएका छन् । कार्यालय बन्द रहे पनि उनीहरू फोडेरभित्र पसेका थिए । विद्यार्थीको समूहले प्रहरी कार्यालय परिसरमा रहेको ना३६प ४४१७, लु२२प ७३४७ र बिआर ६४२७ नम्बरको मोटरसाइकलमा क्षति पुर्‍याएका छन् ।

फर्किने बेला प्रहरीको सवारीमा ढुंगाुमढा गरी क्षति पुर्‍याएका हुन् । घटना लगत्तै ठूलो संख्यामा प्रहरी परिचालन गरिएको छ । घटना सुनियोजित र केही शिक्षकको उक्साहटमा लागेर विद्यार्थीले तोडफोड गरेको आरोप लगाइएको छ । मेयर सियाराम कुशवाहाले तोडफोडको घटनाले आफू दुःखी भएको बताए ।‘घटना कसरी हुन गयो भन्ने विषयमा पत्ता लगाउँदै छौं,’ उनले भने, ‘शिक्षा क्षेत्रलाई राजनीतिबाट टाढा राख्नुपर्छ । यस्तो घटना दोहोरिनु हुँदैन ।’ घटनापछि सरोकारवाला बसेर प्रहरी कार्यालयमा छलफलबाट टुग्याउने तयारीमा जुटेका थिए । स्थानीयतहले आफ्नो नगरक्षेत्रभित्रको विद्यालयको रेखदेख र कर्मचारीको सरुवा गर्न पाउँछ । नगरपालिकाको शिक्षा शाखाले सरुवाको अधिकार पाएको हुन्छ । स्थानीयतहको चुनाव अघि तत्कालीन जिल्ला शिक्षा कार्यालयले जिल्लाभरिका शिक्षकको सरुवा गर्थ्यो ।

शिक्षक अझै धर्नामा
दसैका बेला तलब नपाएको भन्दै फतुवा विजयपुर नगरपालिकाका शिक्षकहरू शुक्रबार पनि नगरपालिकामा धर्ना दिई बसेका छन् । मेयर र प्रमुख प्रशासकीय अधिकृत बीचको मनमोटावले त्यस क्षेत्रका शिक्षकले अहिलेसम्म तबल पाएका छैनन् । उनीहरू तीन दिनदेखि नगरपालिकामा धर्ना दिई बसेका छन् । बुधबारदेखि नगरक्षेत्रका सबै विद्यालयहरू बन्द गरेर शिक्षक धर्नामा बसेका हुन् । अहिले त्यस क्षेत्रको शैक्षिक अवस्था अस्तव्यस्त भएको छ ।

फतुवा विजयपुर नगरपालिकाका मेयर गोपालराय यादव र प्रमुख प्रशासकीय अधिकृत रञ्जना साहबीचको विवादले कर्मचारीले तलब नपाएका हुन् । नगरपालिकाको ३ करोड रकमको खर्चको विवरण मेयरले मागेपछि विवाद उत्कर्षमा पुगेको हो । यही विवादका कारण कर्मचारीको तलब निकास हुन सकेको छैन । यस क्षेत्रका ३२ वटा विद्यालयका झन्डै २ सय शिक्षक बुधबारबाट नगरपालिकामा धर्ना बसेका छन् । दसै नजिकिँदै गर्दा शिक्षकले तलब नपाएर मारमा परेको शिक्षक रञ्जन खरेलले बताए ।

‘नगरपालिकाको विवादले शिक्षकलाई किन अप्ठेरोमा पार्ने,’ उनले भने, ‘तलब निकाशा नभएसम्म धर्ना जारि रहन्छ ।’ परिषद् नभएकै कारण कोष तथा लेखा नियन्त्रकको कार्यालय गौरले रकम निकाशा गरेको छैन । यही कारण तलब माग्दै शिक्षक विद्यालय बन्द गरेर धर्नामा बसेपछि पठक–पाठन ठप्प छ । बिनासर्त खुवाउनु पर्ने तलब सरकारी रबैयाका कारण ढिला भएको शिक्षकको आरोप छ । दसैं लगायतका पर्व नजिकिँदै गर्दा शिक्षकहरूले ९ महिनाको तलब पाएका छैनन् ।

प्रकाशित : आश्विन ११, २०७६ ११:३४
पूरा पढ्नुहोस्
प्रतिक्रिया
पठाउनुहोस्