पसल चोरी गरिरहेका २ भारतीयसहित ४ पक्राउ, प्रहरीको गोली लागी १ घाइते  

प्रहरी उपरीक्षक शेखर खनालले जनकपुर २ स्थित जानकी फर्निसिङमा डकैती गर्दै गरेको बेला ४ डाँका पक्राउ परेको पत्रकार सम्मेलनमा जानकारी दिए । प्रहरी उपरीक्षक खनालका अनुसार पक्राउ पर्नेमा भारत विहारका ४० वर्षीय मोहम्मद ईलियास, ३९ वर्षीय ओजिर अन्सारी, रौतहटका ३५ वर्षीय गगन पटेल र ४५ वर्षीय विनोदप्रसाद सिंह छन् । प्रहरीले चलाएको गोली विनोदप्रसाद सिंहको खुट्टामा लागेको छ । सिंहको उपचार जनकपुर अञ्चल अस्पतालमा हुँदैछ ।

बिहीबार बिहान घटनास्थल पुगेको प्रहरी देखेपछि उनीहरुले पेस्तोल देखाउँदै भाग्न खोज्दा प्रहरीले ३ राउन्ड हवाई फायर गरेको थियो । हवाई फायर गर्दा पनि भाग्न नछाडेपछि गोली चलाउनु परेको एसपी खनालले जानकारी दिए । उनीहरुको साथबाट एक थान कटुवा पेस्तोल तथा २ राउण्ड गोली, ताल्चा काट्न प्रयोग हुने कटर, मोबाइल लगायत सामान बरामद भएको छ ।

एसपी खनालले जिल्लामा दसैं-तिहार-छठ पर्व लक्षित सुरक्षा व्यवस्था कडा पारिएको बताए । उनका अनुसार ४ सय ८५ सादा पोसाकका प्रहरी परिचालन गरिएको छ ।