मेयर र प्रमुख प्रशासकीय अधिकृत विवादले परिषद् भएन

शिव पुरी

(रौतहट) — मेयर र प्रमुख प्रशासकीय अधिकृतबीच कुरा नमिल्दा यहाँको एक नगरपालिकाको परिषद हुन सकेको छैन  । यसले कर्मचारीको तलब समेत निकासा रोकिएको छ  ।

ZenTravel

तलबकै कारण बुधबार नगरक्षेत्रका सबै विद्यालयहरू बन्द गरेर शिक्षक धर्नामा बसेका छन् । अहिले त्यस क्षेत्रको शैक्षिक अवस्था अस्तव्यस्त भएको छ ।

फतुवा विजयपुर नगरपालिकाका मेयर गोपालराय यादव र प्रमुख प्रशासकीय अधिकृत रञ्जना साह बीचको विवादले अहिलेसम्म परिषद हुन नसकेको हो । नगरपालिकाको ३ करोड रकमको खर्चको विवरण मेयरले मागेपछि विवाद उत्कर्षमा पुगेको हो । यही विवादका कारण कर्मचारीको तलब निकास हुन सकेको छैन । यस क्षेत्रका ३२ वटा विद्यालयका झन्डै २ सय शिक्षक बुधबारबाट नगरपालिकामा धर्ना बसेका छन् । उनीहरू धर्नामा बसेपछि कार्यालयमा एक जना पनि कर्मचारी बसेका छैनन् । मेयर यादव र अधिकृत साह समेत कार्यालयमा छैनन् ।

Meroghar

दुवै बीचको विवादले परिषद हुन नसकेको र पर्व नजिकिँदै गर्दा तलब नपाएकाले मारमा परेको शिक्षक रञ्जन खरेलले बताए । ‘एउटा ३ करोडको हिसाब माग्ने अर्को दिन नसक्ने,’ उनले भने, ‘यस्तै विवादका कारण परिषद हुन सकेको छैन ।’ परिषद्कै कारण कोष तथा लेखा नियन्त्रकको कार्यालय गौरले रकम निकासा गरेको छैन । यही कारण तलब माग्दै शिक्षकहरू विद्यालय बन्द गरेर धर्नामा बसेपछि पठक–पाठन ठप्प छ । बिनासर्त खुवाउनु पर्ने तलब सरकारी रबैयाका कारण ढिला भएको शिक्षकको आरोप छ । दसैं लगायतका पर्व नजिकिँदै गर्दा एकजना पनि शिक्षकले तलब पाएका छैनन् । उनीहरूले ९ महिनादेखि तलब नपाएको गुनासो पोखे ।

चालु वर्ष ०७६/७७ का लागि परिषद् गराउन नसक्दा यो नगरपालिकाको बजेट निकासा हुन सकेको छैन । स्थानीय सरकार सञ्चालन ऐनअनुसार स्थानीय तहले प्रत्येक वर्ष असार मसान्तभित्र परिषद् अनिवार्य सम्पन्न गरी प्रदेश र संघीय सरकारलाई जानकारी गराउने प्रावधान छ । तर ४ महिना बितिसक्दा पनि नगरपालिका भित्रको विवाद मिलाउन नसक्दा परिषद् हुन सकेको छैन ।

जनप्रतिनिधि र कर्मचारी बीच विवादले परिषद् हुन नसकेको पाइएको छ । अघिल्लो वर्ष पनि यो नगरपालिकामा मेयर र उपमेयर बीच ठूलै विवाद भएको थियो । त्यस बेला विकास निर्माणको काम ठप्प भएको भन्दै चौतर्फी दबाब परेपछि परिषद् भएको थियो । परिषद् ढिला भएपछि चालु वर्षभित्र नगरपालिकामा कुनै पनि विकास निर्माणका काम राम्ररी सम्पन्न हुने छाट देखिएको छैन ।

अहिले विकास निर्माण लगायतका काम ठप्प छन् । मेयर यादवले माग गरेको खर्चको विवरणका विषयमा अधिकृत साहले केही बताउन चाहिनन् । मेयर यादव पहिला कुन कुन शीर्षकमा यति ठूलो रकम खर्च भयो भन्ने यथार्थ विवरण नआएसम्म परिषद हुन नसक्ने अडानमा छन् । ‘पहिला हिसाब पारदर्शी हुनुपर्‍यो,’ उनले भने, ‘त्यसपछि मात्र नगरपालिकाको अन्य काम गर्न सहज हुन्छ । सबैलाई गौण राख्नु हुन्न ।’ अधिकृत साहकै कारण परिषद हुन नसकेको उनको आरोप छ । जिल्लाको १८ स्थानीयतहमध्ये विवादबीच आधा जसोले ढिला गरी परिषद् सम्पन्न गरेका थिए । मौलापुर बाहेकका नगरपालिकामा अहिले पनि बिवाद छ ।

नगरबासीहरू अधिकृत साह आफैं राजनीति गर्न लागेको आरोप लगाउँछन् । केही दिनअघि ठेक्का नै नलगाई बकैया खोलामा नियम मिचेर अधिकृत साहले आफ्ना आसेपासेलाई नदीजन्य वस्तुको निकाश गर्न पठाएकी थिइन् । स्थानीयले प्रशासनलाई खबर गरेपछि प्रहरीले झन्डै २ दर्जन ट्याक्टर नियन्त्रणमा लिइएको थियो । स्थानीयले अधिकृत साहलाई घेरेर नियम मिचेर जथाभावी गर्न लागेको भन्दै दुर्व्यवहारको प्रयास गरे ।

स्थानीयतहले ठेक्का नलगाई नदीबाट ढुंगा, गिटी, बालुवा निकाश गर्न पाइँदैन । अधिकृत साहले आफ्ना मानिसलाई निकाश गर्न दिएपछि स्थानीय आक्रोसित बनेका हुन् ।

प्रकाशित : आश्विन ९, २०७६ १०:३७
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

रौतहट पुग्यो गण्डकको पानी

शंकर आचार्य

(पर्सा) — गण्डक नहरको इतिहासमै सम्भवतः दोस्रोपटक रौतहटको बंकुल क्षेत्रसम्म पानी पुगेको छ  । नारायणी सिँचाइ व्यवस्थापन डिविजन कार्यालय बहुअरीका सूचना अधिकृत एवम् इन्जिनियर सुरेश साहका अनुसार हाल नहरको १३ नम्बर ब्लकको आधा भागसम्म पानी पुगेको छ  ।

यस कारण रौतहटको बंकुल क्षेत्रका किसान लाभान्वित भएका छन् । ‘झन्डै २ दशकपछि तथा नहरको इतिहासमा सम्भवतः दोस्रोपटक यति धेरै क्षेत्रमा नहरको पानी पुगेको हो,’ उनले भने, ‘यो हाम्रा लागि ठूलो उपलब्धि र प्रतिष्ठाको विषय पनि हो ।’ गत वर्ष पर्सा र बारामा नहरको सफाई गरिएपछि नहरमा पानीको निर्वाध प्रवाह सहज हुन थालेको उनले बताए ।

नहरका कुल १५ ब्लकमध्ये अब १४ र १५ ब्लकसम्म मात्र पानी पुग्न सकेको छैन । ती ब्लकमा लामो समयदेखि सफाई नभएको र नहरकै बीचमा झारपात र रूख समेत उम्रिएकाले त्यसको सफाइ नभएर ती ब्लकमा पानी पुग्न सहज नभएको उनले बताए ।

नहरको भौतिक अवस्था र भारतले दिने पानी समेतको आधारमा कार्यालयले बर्सेनि धान र गहुँ सिजनमा १० नम्बर ब्लकसम्म पानी प्रवाह गर्ने लक्ष्य हुन्छ । त्यसबाहेक ११ देखि १३ नम्बर ब्लकसम्म थोर बहुत पानी पुगे त्यो अतिरिक्त उपलब्धि मानिन्छ । हाल भारत नहरमा ७ सयदेखि ७ सय २५ क्युसेकसम्म पानी दिएको र यतिको पानी यो सिजनका लागि पर्याप्त रहेको उनले बताए ।

भारतमै नहरको संरचना कमजोर रहेकाले धेरै पानी छोड्दा नहर भत्कने सम्भावना रहेको बताउँदै नहरमा सन्तुलन मिलाएर पानी दिइरहेको छ । नेपाल र भारतबीचको गण्डक सम्झौताअनुसार नहरमा भारतले नेपालतर्फ ८ सय ५० क्युसेक पानी छाड्नु पर्ने हो । नवलपरासीको भैंसालोटनस्थित नेपाल भारत सीमामा निर्मित व्यारेजबाट भारतीय पक्षले पानी छोड्ने गर्छ । भारतसँगको सम्झौताअनुसार बर्सेनि धान सिजनका लागि असार १५ र गहुँ सिजनका लागि पुस १० देखि नहरमा पानी आइसक्नु पर्छ ।

सन् १९७५ र ७६ मा दुई चरणमा भारत सरकारले नेपाल सरकारलाई गण्डक नहर हस्तान्तरण गरेको हो । पर्साको जानकीटोलाबाट नेपाल प्रवेश गर्ने र रौतहटको वाग्मतीमा गएर मिसिने नहरलाई पूर्वी नहर भनिन्छ ।

८१ किमि लामो यो नहरले पर्सा, बारा र रौतहटको ३१ हजार ४ सय हेक्टर जग्गालाई सिंचित गर्ने लक्ष्य थियो । तर बर्सेनि कुनै न कुनै प्राविधिक समस्या देखाउँदै भारतबाटै पर्याप्त पानी नछोडिने भएकाले पर्सा र बाराका पूर्वी भेगसम्म मात्र पानी पुग्छ । रौतहटमा पानी पुग्दैन । रौतहटसम्म पानी लग्न हाल बारामा जमुनी सिँचाइ आयोजना निर्माणाधीन छ । जसबाट गण्डक नहरमा पानी झारिनेछ ।

प्रकाशित : आश्विन ९, २०७६ १०:३७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×