‘विमानस्थल निजगढमै बन्नुपर्छ’

लक्ष्मी साह

बारा — प्रदेश २ सरकारको उद्योग, वन, पर्यटन तथा वातावरणमन्त्री रामनरेश रायको प्रस्तावित निजगढ अन्तर्राष्ट्रिय विमानस्थल निर्माणस्थलका रूख काट्न नदिने अभिव्यक्तिको बाराका स्थानीयले कडा प्रतिवाद गरेका छन् । 

विमानस्थल निर्माणको वरिपरि रहेको निजगढ तथा कोल्हवी नगरपालिका र जितपुरसिमरा उपमहानगरपालिकासहित निजगढ विमानस्थल निर्माण सरोकारवाला समितिहरूले विज्ञप्ति जारी गर्दै मन्त्री रायको अभिव्यक्तिको प्रतिवाद गरेका हुन् ।

विमानस्थल बनाउन आवश्यक पर्ने रूखहरू काट्न नदिने र प्रदेशभित्रकै अरू खाली जमिन प्रयोग गरेर विमानस्थल बनाउनुपर्ने मन्त्री रायले धारणा सार्वजनिक गरेपछि उनको यहाँ विरोध सुरु भएको हो । ‘मन्त्रीज्यूको अभिव्यक्तिप्रति खेद प्रकट गर्छौं,’ कोल्हवी नगरपालिकाका नगर प्रमुख भरतभण्डारीले विज्ञप्तिमा उल्लेख गरेका छन् ।

निर्माण प्रक्रिया सुरु भइसकेको र राष्ट्रिय गौरवको आयोजनालाई असफल बनाउने यस्तो अभिव्यक्ति फिर्ता लिनुपर्छ,’ उनले भने ।
जितपुरसिमरा पमहानगरपालिकाका प्रमुख डा. कृष्ण पौडेलले मन्त्रीको अभिव्यक्तिले हामीलाई निराश बनाएको बताए । ‘मुलुककै विकासमा टेवा पुग्ने र कायापलट गराउने खालको आयोजना भएकाले यो विमानस्थल बन्नुपर्छ,’ निजगढ नगरपालिकाका प्रमुख सुरेश खनालले भने । यसैबीच निजगढमा सोमबार गरिएको पत्रकार सम्मेलनमा पनि मन्त्री रायको अभिव्यक्तिको विरोध गरिएको छ । निजगढमा आइतबार साँझ स्थानीयहरूले मन्त्री रायकोपुतलासमेत दहन गरेका थिए ।
निजगढ सरोकार समितिले आयोजना गरेको पत्रकार सम्मेलनमा वक्ताहरूले मन्त्री रायको अभिव्यक्ति गैरजिम्मेवार रहेको भन्दै फिर्ता लिन सुझाए । सम्मेलनमा बोल्दै नेकपाका नेता एंव युवा तथा खेलकुद पूर्वमन्त्री पुरुषोत्तम पौडेलले वातावरणको नाममा अनावश्यक हल्ला चलाएर परियोजनालाई असफल पार्ने षड्यन्त्र भइरहेको बताए । ‘विमानस्थल निर्माणमा षड्यन्त्र भए संघर्षमा उत्रिन्छौं,’ उनले भने ।

विमानस्थल निर्माणमा निजगढका जनताको भूमिका सबैभन्दा महत्त्वपूर्ण हुने उनले बताए । कार्यक्रममा फास्टट्र्याक एयरपोर्ट निर्माण मूल समितिका संयोजक रविराज दंगालले विमानस्थल निर्माण हुन नदिन विभिन्न चलखेल हुँदै गरेको र नेपालीको भाग्य र भविष्यसँग जोडिएको आयोजना भएकाले सफलताको लागि सशक्त रूपमा दबाब अभियान सञ्चालन गर्नुपर्ने बताए ।

त्यसैगरी कोल्हवी सरोकार समितिका संयोजक ढुण्डिराज उप्रेतीले परियोजना प्रदेश २ को निम्ति सुनको अण्डा पार्ने कुख्रुाजस्तै भएको प्रतिक्रिया दिए । समितिका संयोजक एकबहादुरश्रेष्ठले फास्ट्र्याकको नाका भएको र वीरगन्ज तथा काठमाडौंसँगसमेत नजिक भएकाले निजगढमा नै विमानस्थल बन्नुपर्ने बताए ।

पत्रकार सम्मेलनमा निजगढ सरोकार समितिले जारी गरेको विज्ञप्तिमा मन्त्री रायले अभिव्यक्ति फिर्ता लिनुपर्ने अन्यथा आन्दोलनमा उत्रिने चेतावनी दिएको छ ।

प्रकाशित : भाद्र १८, २०७६ ०९:५१
ADVERTISEMENT
प्रतिक्रिया
पठाउनुहोस्
ADVERTISEMENT

मार्बल कमसल भएको शंका

कान्तिपुर संवाददाता

जनकपुर — जनकपुरको जानकी मन्दिरमा सौन्दर्यीकरण आयोजनाअन्तर्गत ओछ्याइरहेको मार्बल कम गुणस्तरको रहेको दाबी गर्दै युवाको समूहले काममा अवरोध पुर्‍याएका छन् । आयोजनाअन्तर्गत मन्दिरको बाहिरी परिसरमा ढल निर्माणसँगै सेतो मार्बल ओछ्याउने काम भइरहेको छ ।

ठेकेदारले प्रयोग गरिरहेको मार्बल कमसल भएको तथा ढल निकासका लागि ह्युमपाइप जडान गर्नुपर्ने स्थानमा चार इन्चको पाइप मात्र जडान गरिएको आरोप युवाको छ ।

‘मन्दिरको दक्षिण भागमा रहेको शौचालय तथा भोजनालयबाट निस्किने फोहोरमैला सफाइ नै नगरी पाइप जडान र पीसीसी गरिएको छ,’ युवा सुशील कर्णले भने, ‘प्रयोग भइरहेको मार्बल हातले छुँदा टुक्राटुक्रा भाँचिन्छ । गुणस्तरीय काम हुनुपर्छ ।’

निर्माणाधीन कामको निरीक्षण गर्न मंगलबार प्रदेश २ का भौतिक पूर्वाधार मन्त्रालयअन्तर्गतका सिँचाइ विभागका सिनियर डिभिजन इन्जिनियर तथा प्रोजेक्ट मैनेजर भगवान झा, ठेकेदार एमएस प्रेरा–आर जे–राजन जेभी ललितपुरका कन्टेक्ट म्यानेजर खुसीलाल ठाकुर पुगेका थिए । युवाले मन्दिरको सौन्दर्यकरणमा हेलचक्र्याइँ नगर्न उनीहरूलाई दबाब दिएको युवा सरोज मिश्रले बताए ।

प्रोजेक्ट मेनेजर झाले मन्दिर परिसरमा प्रयोग भइरहेको मार्बल उच्च क्वालिटीको भएको दाबी गरे । उनले भने, ‘भारत राजस्थानको मेटामोर्फेक रक भएको मार्बल हो । यो प्राकृतिक भएकाले नरम छ तर जडान भइसकेपछि ५० वर्ष टिक्छ ।’ सिनियर इन्जिनियर झाले निर्माणको क्रममा अनियमितता देखिए वा गुणस्तरहीन सामग्री प्रयोग भएको पाइए ठेकेदारालाई कारबाही हुने बताए ।

प्रकाशित : भाद्र १८, २०७६ ०९:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT