ट्राफिक नियम मिच्नेमा विद्यार्थी बढी

कान्तिपुर संवाददाता

रौतहट — नियम मिचेर गाडी चलाउनेलाई इलाका प्रहरी र जिल्ला ट्राफिक कार्यालयले मिलेर कारबाही थालेको छ । छड्के जाँच गरेर नियम मिच्नेलाई सम्झाउने र दोहर्‍याएर बदमासी गर्नेलाई कारबाहीको दायरामा ल्याएको छ । 

गौर–चन्द्रनिगाहपुर खण्डमा साना सवारी चलाउनेले खुलेआम नियम मिच्न थालेपछि इलाका प्रहरी र ट्राफिक प्रहरीले कडाइगरेको हो ।

जथाभावी सवारी चलाउँदा यस क्षेत्रमा दिनहुँ सवारी दुर्घटना हुन्थ्यो । मोटरसाइकल, अटो र इरिक्साको दुर्घटना बढ्दो छ । दैनिक २/३ वटा सम्म दुर्घटना हुन थालेपछि इलाका प्रहरी चन्द्रपुरले ट्राफिकलाई सहभागी गराईबृहत सडक चेतनाको कार्यक्रम अघि बढाएको छ । जाँचका क्रममा सवारीको कागजपत्र बिनाका, भारतीय नम्बर प्लेटका विशेष निगरानी गरिएको छ ।

यसै क्रममा कतिपय चोरीका सवारीसमेत फेला पारेको डिएसपी कवित कट्वालले बताए । ‘हेलमेट नलगाई मोटरसाइकल चलाउने, ३ जना चढाएर यात्रा गराउने, लाइसेन्सबिना सवारी चलाउनेजस्ताकार्यलाई निरुत्साहन गरिएको छ,’ उनले भने, ‘नियम सडकमा प्रायः गरी क्याम्पस पढ्ने विद्यार्थीले नियम मिच्ने गरेकोपाइएको छ ।

उनीहरूले तिब्र गतिमा सवारी चलाउने गरेको प्रहरीको भनाइ छ । यहाँको गरुडा, शिवनगर, सन्तपुर, डुमरिया, हर्साह, बिर्ता, शिवनगर, शुकदेव क्षेत्रमा ट्राफिक नियम मिचेर मोटरसाइकल चलाउने संख्याको बढ्दो छ । ‘पहिला जे भए पनि अहिले नियम मिचेर सवारी चलाउनेलाई छाडिन्न,’ जिल्ला ट्राफिक प्रमुख प्रहरी निरीक्षक शैलेश न्यौपानेले भने, ‘जथाभावि सवारी चलाउँदा दुर्घटना हुन्छ । यसले सबैलाई क्षति हुन्छ ।’

सडकमा सवारी चलाउनेलाई ट्राफिक नियमका बारेमा सम्झाउने बुझाउने गरेको उनले सुनाए । जिल्ला ट्राफिकले हेलमेट नलगाउनेसँग ५ सयदेखि १ हजार ५ सयसम्म जरिवाना र चालक अनुमतिपत्र नभएकालाई १ हजारदेखि १ हजार ५ सयसम्म जरिवाना लिने गरेको छ ।

जिल्ला ट्राफिका अनुसार साउनयता एक वर्षको अवधिमा विभिन्न स्थानमा भएका सवारी दुर्घटनामध्ये मोटरसाइकल बढी छन् । यस अवधिमा १ सय १६ वटा सवारी दुर्घटना भए । तीमध्ये ४ सय २४ भन्दा बढी मोटरसाइकल दुर्घटना भएको ट्राफिकको तथ्यांक छ । दुर्घटनामा ५५ को मृत्यु भएको थियो । गएको साउनमा मात्र २० वटा सवारी दुर्घटना भएकोमा १७ वटा मोटरसाइकलपरेका छन् ।

प्रकाशित : भाद्र १७, २०७६ ०९:५५
ADVERTISEMENT
ADVERTISEMENT
प्रतिक्रिया
पठाउनुहोस्

सीडीओलाई समस्याको चाङ

ओमप्रकाश ठाकुर

सर्लाही — सर्लाहीका उखु किसानका समस्या, विद्युत् अनियमित र महिनौंदेखि नगरपालिकामा लगाइएको ताला लगायतका समस्या सुल्झाउन प्रमुख जिल्ला अधिकारीलाई ध्यानाकर्षण गराइएको छ । 

धनकौलस्थित अन्नपुर्ण चिनी उद्योगले तीन वर्ष देखि किसानको भुक्तानी नदिएको, सरकारबाट उखु अनुदान वापत पाएको रकम पनि किसानले नपाएको, दिनहुँ नेपाल विद्युत् प्राधिकरणले अघोषित रूपमा गरेको लोडसेडिङ तथा भोल्टेज अपडाउन हुँदा नागरिकले खेपिरहेको मार र बलरा नगरपालिकामा महिनौं अघि लगाइएको ताला नखुल्दा स्थानीयले ब्यहोरिरहेको सास्तीका बारेमा प्रमुख जिल्ला अधिकारी मोहनबहादुर जिसीको ध्यानाकर्षण गराइएको हो ।

केही पीडित उखु किसानलाई लिएर जिल्ला प्रशासन कार्यालय पुगेका नागरिक अगुवाले जिल्लाबासीको समस्या सुल्झाइदिन स्थानीय प्रशासनको ध्यानाकर्षणगराएका हुन् ।
अन्नपूर्ण चिनी उद्योगले तीन वर्षदेखि किसानसँग खरिद गरेको उखुको भुक्तानी नदिँदा जिल्लाका दक्षिणी क्षेत्रका किसान मारमा परेका छन् । उखु बिक्री गरेको भुक्तानी माग्न उद्योगमा जाने, धर्नामा बस्ने लगायतका काम गरे पनि रकम नपाएको किसानको गुनासो छ ।

पैसा नपाउँदा किसान ऋणमा चुर्लुम्म डुब्दै गएको, उनीहरूमा मानसिक तनाव बढेको घर व्यवहार धान्नै मुस्किल परेको जस्ता समस्याबारे प्रमुख जिल्ला अधिकारीलाई भेटेर ध्यानाकर्षण गराइएको प्रेस युनियन सर्लाहीका निवर्तमान अध्यक्ष अजित सिंहले बताए ।

सिंहको मात्रै अन्नपूर्ण चिनी उद्योगबाट झन्डै तेह्रलाख रकम भुक्तानी लिन बाँकी छ । ‘सरकारले दिने अनुदान पनि उद्योगले दिएको छैन,’ उनले भने, ‘पीडा नै पीडाले भरिएको आनो कथा प्रमुख जिल्ला अधिकारी समक्ष पोखेका छौं ।’ वर्षौंदेखि किसान मारमा परिरहँदा समेत अन्नपूर्ण चिनी उद्योगका सञ्चालकले भुक्तानीमा झमेला गरिरहेका छन् । भुक्तानीका लागि किसानहरू धर्ना तथा आन्दोलनमा बस्दा उद्योगी सम्पर्कविहीन बन्ने गरेका छन् ।

यस्तै जिल्लामा खपि नसक्नु गर्मीमा छिन–छिनमै हुने विद्युत् कटौतीले सर्लाहीबासी नै हैरान बनेका छन् । नेपाल विद्युत् प्राधिकरणले लोडसेडिङमुक्त भएको घोषण गरे पनि दैनिक दर्जनौं पटक विद्युत् अवरुद्ध हुँदा जिल्लाबासी पीडित बनेका हुन् । यस विषयमा पनि प्रजिअको ध्यानाकर्षण गराइएको छ ।

उखरमाउलो गर्मीमा विद्युत प्राधिकरणले छिनछिनमै विद्युत काटने गरेकाले उपभोक्ताहित विपरित भएको भन्दै नागरिक अगुवा रजनीकान्त झाले प्रजिअसमक्ष गुनासो पोखेका थिए । झाले अनियमित विद्युत कटौतीसँगै विद्युत भोल्टेज स्थिर नहुँदा विद्युतीय उपकरण खराब भएपछि नागरिक थप मारमा परिरहेको जानकारी गराएको बताए ।

त्यस्तै जिल्लाको दक्षिणी क्षेत्रस्थित बलरा नगरपालिकामा असार पहिलो साता नगरकी उपप्रमुखसहित अन्य जनप्रतिनिधिले मेयरले एकलौटी र नियम विपरीत काम गर्न थालेको भन्दै ताला लगाउँदा स्थानीय सरकारबाट सेवासुविधा पाउन नसकेको प्रजिअसमक्ष गुनासो गरे । मेयरले विवाद समाधानका लागि पहल गर्नु भन्दा पनि आनै घरमा वैकल्पिक कार्यालय खोलेको बारेमा पनि जानकारी गराइएको नागरिक अगुवा कौशल किशोर सिंहले जानकारी दिए ।

किसानको पीडा, विद्युत्को बेथिती र नगरमा लगाइएको तालाको बारेमा सामूहिक रूपमा गएर प्रजिअ जिसीको ध्यानाकर्षण गराइएको नागरिक समाजका महासचिव शिवचन्द्र चौधरीले बताए । किसानसहित नागरिकको समस्या हल्कारूपमा नलिन समेत प्रजिअ समक्ष आग्रह गरिएको नागरिक अगुवाले बताए ।

उनीहरूको भेटमा प्रजिअ जिसीले किसानले लामो समयदेखि उद्योगबाट पाउन नसकेको भुक्तानी दिलाउन पहल गर्ने, विद्युतीय समस्या निर्मुल पार्ने र बलराको विवाद मिलाउने प्रतिबद्धता जनाए ।

प्रकाशित : भाद्र १७, २०७६ ०९:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT