गर्मीमा विद्युत्‌को मार

कान्तिपुर संवाददाता

सर्लाही — दिनभर मजदुरी गरेर फर्किने कविलासी नगरपालिका–१ का रामएकवाल मण्डल राति थकाई मार्ने बेलामा पंखा चलाउन नपाउँदा खुला आकाशमुनि सत्ने गरेका छन् । बाहिर सुत्दा फेरि लामखुट्टे र सर्पको त्रास उस्तै छ ।

विद्युत् कटौतीले पंखा चलाउन नपाएका मण्डल लामखुट्टेको टोकाईबाट बिरामी पर्ने सम्भावना भए पनि बाहिरै सुत्न बाध्य छन् । प्रत्येक दिन दर्जनौं पटक कटौती हुने विद्युत् राति पनि आउने जाने मात्र गरेपछि निदाउन नसकिएको उनको गुनासो छ । ‘दिनभरि अर्काको काम गरेर थाकेको हुन्छु, राति सुत्ने बेलामा बिजुली जान्छ, गर्मीले सुत्न नसकेपछि बाहिर आएर सुतिरहेको छु,’ उनले भने, ‘राति निदाइएन भने भोलि काम गर्न कठिन हुन्छ, लामखुट्टे र सर्पको जोखिम भए पनि गर्मीका कारण बाहिर सुत्नु मेरो बाध्यता हो ।’

खपि नसक्नु गर्मीमा छिन–छिनमै हुने विद्युत् कटौतीले मण्डल मात्र होइन सर्लाहीबासी नै हैरान बनेका छन् । नेपाल विद्युत प्राधिकरणले लोडसेडिङमुक्त भएको घोषण गरे पनि दैनिक दर्जनौं पटक विद्युत अवरुद्ध हुँदा जिल्लाबासी पीडित बनेका हुन् । गर्मीले आहाल बनेको बेला घरिघरि बत्ती गइरहँदा गर्मीमा पंखा समेत चलाउन नपाउँदा जनजीवन थप प्रभावित बनेको स्थानीय मनोज ठाकुरले बताए । ‘दिनभरिको कडा मिहनेत त छँदैछ राति राति सुत्ने बेलामा विद्युत कटौतीले हैरान बनाउँछ,’ उनले भने, ‘देशलाई लोडसेडिङ मुक्त घोषणा गरेर अन्य मुलुकमा विद्युत् बिक्री गर्ने योजना सुन्दैछु, तर हामी घण्टौंसम्म विद्युत नआएर सास्ती खेप्न बाध्य छौं ।’

उखरमाउलो गर्मीमा विद्युत प्राधिकरणले छिनछिनमै विद्युत काट्ने गरेकाले उपभोक्ताहित विपरीत भएको नागरिक अगुवा रजनीकान्त झाको भनाइ छ । उनले छिनछिनमै हुने विद्युत् कटौती उपभोक्ता हकहित विपरीत भएको भन्दै अदालतमा मुद्दा दिने मन:स्थितिमा पुगेका छन् । ‘नेपाल विद्युत् प्राधिकरणले उपभोक्ता हकहितको ख्याल गरेको देख्न पाइँदैन, जिल्लाबासी अनियमित विद्युत कटौतीले हैरान छन्,’ झाले भने, त्यही भएर उपभोक्ता हकहितका लागि अदालत गुहार्ने योजना बनाएको छु ।’ झाले अनियमित विद्युत कटौतीसँगै भोल्टेज पनि अपडाउन हुने गरेको सुनाए ।

वर्षौंअघि मलंगवा वितरण केन्द्र मात्र हुँदा आकाशमा कालो बादल मडारिना साथ बिजुली जाने गरेको थियो । त्यस यता लालबन्दी वितरण केन्द्र र बरहथवा वितरण केन्द्र स्थापना भए पनि सेवामा भने सुधार हुन सकेको छैन । अहिले जुनेली रातमा पनि विद्युत घण्टौंसम्म जाने गरेको छ । विद्युत भोल्टेज स्थिर नहुँदा विद्युतीय उपकरण खराब हुने गरेको स्थानीयको भनाइ छ । विद्युतको रकम समयमा नतिरे २५ प्रतिशत जरिवाना तिर्नुपर्ने, तर विद्युत छिनछिनमै आउने जाने र भोल्टेज समस्याका कारण विद्युतीय सामग्री खराब भएमा क्षतिपूर्ति कसले तिर्ने भनेर स्थानीयले आवाज उठाइरहेका छन् । उखरमाउलो गर्मीमा घण्टौं हुने विद्युत कटौतीको तत्काल समाधान गर्न स्थानीयले आग्रह गरेका छन् ।

यता नेपाल विद्युत प्राधिकरणले भने आपतकालीन समस्यामा मात्र विद्युत कटौती गर्नु परेको जनाएको छ । विद्युतमा पुरानो संयन्त्र र गर्मीका बेला पंखा, एसी, फ्रिज जस्ता विद्युतीय उपकरण धेरै चल्ने भएकाले बढी भार थाम्न नसकेर बेला–बेलामा बत्ती जाने गरेको वितरण केन्द्रले जनाएको छ । ‘विद्युत कटौतीको तालिका छैन, केही समस्या आए मात्र हामीले विद्युत कटौती गर्ने हो,’ नेपाल विद्युत प्राधिकरण लालबन्दी वितरण केन्द्रका प्रमुख विजय महतोले भने ।

प्रकाशित : भाद्र १५, २०७६ ०९:४४
प्रतिक्रिया
पठाउनुहोस्

३ र्‍याक डीएपी मल भित्रियो

शंकर आचार्य

(पर्सा) — डिएपी मलको चरम अभाव झेलिरहेका बेला सातायता कृषि सामग्री कम्पनीको ३ र्‍याक डिएपी मल वीरगन्ज भन्सारबाट नेपाल भित्र्याएको छ ।

कम्पनी वीरगन्ज क्षेत्रीय कार्यालय प्रमुख गोविन्द पराजुलीका अनुसार भदौ ७ गते पहिलो, बिहीबार दोस्रो र तेस्रो गरी २ र्‍याक वीरगन्जस्थित सिर्सिया सुक्खा बन्दरगाह आइपुगेको हो ।

भारतको विशाखापटनम बन्दरगाहबाट मल बोकेका यी रेल र्‍याक आइपुगेका हुन् । भारतकै इन्डियन पोटास लिमिटेड मलको यो कन्साइन्मेन्टको सप्लायर रहेको छ । पराजुलीका अनुसार थप अर्को रेल र्‍याक डिएपी मल लिएर सोमबार वा मंगलबारसम्म वीरगन्ज आइपुग्नेछ ।

कम्पनी क्षेत्रीय कार्यालय भैरहवाका लागि आएको एक र्‍याक डिएपी मल बिहीबार नै भैरहवा नजिकको भारतीय रेल्वे स्टेसन नौतनवा आइपुगेको छ । एक रेल्वे र्‍याकले २ हजार ५ सय मेटन मल बोक्छ । कुल २५ हजार मेटन डिएपी मल आयातको यो सम्झौता अन्तर्गत १० हजार मेटन मल वीरगन्ज क्षेत्रीय कार्यालय, ९ हजार मेटन भैरहवा क्षेत्रीय कार्यालय र ६ हजार मेटन विराटनगर क्षेत्रीय कार्यालयले पाउनेछ । वीरगन्ज कार्यालयको आधा मल आइसकेको छ । बिहीबार आएको दोस्रो र्‍याकमध्ये आधा विराटनगर जानेछ । अब आउने चौथो र्‍याक मल पूरै विराटनगर जानेछ ।

पहिलो र दोस्रो र्‍याकमा आएको डिएपी मल वीरगन्ज क्षेत्रीय कार्यालय मातहतका वीरगन्ज समेत जनकपुर, हेटौंडा, त्रिशुली, कावासोती, भरतपुर, धुलिखेल, काठमाडौं, गजुरी, कलैया, सर्लाही, चन्द्रपुर, सिन्धुली, दमौली लगायतका कार्यालयमा आवश्यक परिचालन भइसकेको छ ।

मुलुकका अधिकांश जिल्लामा डिएपी मलको अभाव रहेको थियो । धान रोप्ने बेलामा मल नपाउँदा किसान गुणस्तरहीन तथा महँगो भारतीय डिएपी मल खरिद गर्न बाध्य भएका थिए ।

प्रकाशित : भाद्र १५, २०७६ ०९:४२
पूरा पढ्नुहोस्
प्रतिक्रिया
पठाउनुहोस्