सुध्रिँदै गजेन्द्रनारायण सिंह अस्पताल

अवधेशकुमार झा

(राजविराज) — रेफरल सेन्टरजस्तै बनेको राजविराजस्थित गजेन्द्रनारायण सिंह अस्पताललाई सुविधासम्पन्न बनाउन थालिएको छ । विशेषज्ञ चिकित्सकको पूर्ति र विभिन्न सेवाको सुचारुसँगै अस्पतालमा सुधारको संकेत देखिएको छ ।

गजेन्द्रनारायण सिंह अस्पताल राजविराज परिसरमा स्थापना गरिएको रामराजाप्रसाद सिंह स्वास्थ्य विज्ञान प्रतिष्ठान पूर्वाधार तयारी विकास समितिको कार्यालय । तस्बिर : अवधेश/कान्तिपुर

पछिल्लो दुई महिनामा अस्पतालमा मेडिसिन, सर्जरी, पेडियाट्रिक, एनेसथेसिया, नाककान घाँटी, अर्थो, रेडियोलोजी र डेन्टलको विशेषज्ञ सेवा सुरु भएको छ । यी सेवा सुरु हुनु भन्दा अगाडि सामान्य बिरामीलाई पनि विराटनगर वा धरान रेफर गर्ने गरिएको थियो ।

अस्पतालमा पितथैली, हाइड्रोसिल, हर्निया र एपेन्डिक्सको शल्यक्रिया पनि सुरु भएको अस्पतालका मेडिकल सुपरिटेन्डेन्ट डा चुमनलाल दासले जानकारी दिए । उनका अनुसार अस्पतालमा चाँडै आईसीयु र सिटिस्क्यान सेवा सञ्चालन गर्ने तयारी गरिएको छ । यसका अतिरिक्त डायलासिस सेवा सञ्चालन गर्ने तयारी पनि अन्तिम चरणमा रहेको दासले जनाए । थाइराइड र मधुमेहको जाँच भने सुरु भइसकेको छ । ‘पछिल्लो समय एडभान्स मेसिनका साथै विशेषज्ञ चिकित्सकहरूको पदपूर्ति भएपछि बिरामीको चाप बढनुका साथै रेफर गर्ने क्रम पनि घटेको छ,’ मेसु डा. दासले भने ।

विसं २०१३ सालमा पृथ्वी वीर उपचार केन्द्रलाई सप्तरीको हनुमाननगरबाट राजविराज सारिएको थियो । २०२९ सालमा सो उपचार केन्द्रलाई सगरमाथा अञ्चल अस्पतालको नामकरण भई ५० शय्याको अस्पतालका रूपमा स्तरोन्ति भएको थियो । २०६१ साल भदौ २८ गते तात्कालीन श्री ५ को सरकार सचिव स्तरको निर्णयबाट आफ्नै स्रोत र साधनबाट सञ्चालन हुने गरी ५० शय्या थप गरिएको थियो । ४ बिघा १३ कठा ४ धुर जग्गामा फैलिएको अस्पताललाई २०६९ सालमा गजेन्द्र नारायण सिंह सगरमाथा अञ्चल अस्पतालका रूपमा परिणत गरिएको थियो । ‘अहिले १ सय २५ शय्या सञ्चालनमा छ,’ मेसु डा. दासले भने, ‘अहिले ओपिडीमा दैनिक २ सयदेखि २ सय ५० जना सम्म बिरामी आउँछन्, भर्ना हुने बिरामीको संख्या पनि हातै बढेको छ ।’ ‘आईसीयू सेवा सञ्चालन र सिटिस्क्यान सेवाका लागि केही समय लाग्ने भएकाले सो बाहेकका अन्य सेवाका बिरामीलाई रेफर गर्नुपर्ने अवस्था नरहेको उनले दाबी गरे ।

विशेषज्ञ चिकित्सकबाहेक मेडिकल अफिसरका लागि राजविराज नगरपालिका र अस्पताल विकास समितिले पनि सहयोग गरेको छ । नगरपालिकाले चारजना र विकास समितिले एकजना गरी पाँच जना मेडिकल अफिसर राखिएको छ । अस्पतालमा चापको आधारमा नर्सिङ स्टाफहरूको आवश्यकता महसुस भएकाले जिल्लाका अन्य स्थानीयतहरू सित समन्वय गरी सोको व्यवस्थापन मिलाउने कार्य भइरहेको मेसु डा. दासले बताए । गजेन्द्रनारायण सिंह अस्पतालको सुधारसँगै राजविराजमा रामराजाप्रसाद सिंह स्वास्थ्य विज्ञान प्रतिष्ठानको कार्य पनि अघि बढेको छ । सरकारी घोषणासँगै राजविराज नगरपालिकाले राजविराज १० मा उपलब्ध गराएको ६१ बिघा जग्गामा प्रतिष्ठान बनाउने लक्ष्यका साथ निर्माण पूर्वका कार्य सुरु भएको छ ।

प्रकाशित : भाद्र १५, २०७६ ०९:४१
प्रतिक्रिया
पठाउनुहोस्

विदेश छाडेर राँगा व्यापार

प्रत्येक हाटबजारमा ३० लाख मूल्य बराबरका २ सयदेखि ५ सयसम्म राँगाको कारोबार हुन्छ ।
रवीन्द्र उप्रेती

(महोत्तरी) — कृषि क्षेत्रमा गोरुको उपयोगिता कम भएसँगै यसको कारोबार घटदै गएका बेला राँगा व्यापार भने तराई–मधेसमा उच्च भएको छ । राँगाको माग बढेपछि यसको व्यावसायिक कारोबार सिरहादेखि रौतहटसम्म विस्तार भएको छ ।

महोत्तरीको गौशाला बजारस्थित बिहीबारे हाटमा राँगा किनबेच गर्दै व्यापारी । तस्बिर : रवीन्द्र/कान्तिपुर

चौपाया ठेकेदारका अनुसार हाट लागेको दिन महोत्तरीको गौशालाबाट ३० लाख रुपैयाँसम्मको राँगा कारोबार हुन्छ । राँगा व्यापारबाट मुनाफा पनि राम्रो हुन थालेपछि यसतर्फ अहिले युवा व्यवसायीको आकर्षण बढदो छ । राम्रो कमाई देखेर वैदेशिक रोजगारमा जाने सोच बनाएका दर्जनभन्दा बढी युवा यही व्यापारमा रमाएका छन् । ‘एउटा राँगाबाट १५ सयदेखि २ हजारसम्म फाइदा हुन्छ,’ गौशाला–९ भरतपुरका व्यापारी दीपक श्रेष्ठले भने, ‘गाउँघरमै काम र दाम पाइयो भने विदेश जाने कसलाई रहर हन्छ ?’

२५ वर्षीय श्रेष्ठ रोजगारिका लागि साउदीअरब गएका थिए । त्यहाँ ३ वर्ष बिताए । फर्किएपछि ४ जना साथी मिलेर राँगा व्यापार सुरु गरे । उनीहरूको ‘टिम’ पूर्व सिरहादेखि पश्चिम रौतहटसम्मका गाउँ पुगेर राँगा संकलन गर्छन् । महोत्तरीको गौशाला, सर्लाहीको बयलवास र धनुषाको सखुवाबजारको चौपाया हाटमा खरिद–बिक्री गर्छन् । बजार पुर्‍याएका राँगा पहाडतिरबाट झरेका व्यापारीले राम्रो मुनाफा दिएर खरिद गर्छन् । माग बढन थालेपछि महोत्तरीमा राँगा अपुग भएको छ । बिहीबारे हाटलाई लक्षित गरी श्रेष्ठले सिरहाको ग्रामीण भेगबाट १८ राँगा खरिद गरेका थिए । ‘खाडी मुलुकको कमाई यतै हुन थालेपछि अब विदेश जानुपर्ने आवश्यकता छैन,’ उनले भने ।

गौशालाको बिहीबारे हाटमा राँगा खरिद–बिक्री गर्ने बर्दिवास १२ विजलपुराका ३२ वर्षीय बारिक राइन पनि यसअघि मलेसिया गएका थिए । त्यहाँ ६ वर्ष गाडी चलाए । गतवर्ष घर फर्केपछि साथीभाइका कुरा सुनेर राँगा व्यापारमा हात हाले । त्यहाँदेखि उनले पछाडि फर्केर हेर्नु परेको छैन ।‘जहिलेदेखि यो व्यापारमा हातहालें त्यहाँ (मलेसिया) भन्दा राम्रो कमाई यही हुन थाल्यो,’ राइनले भने ।

गौशाला नगरपालिका ८ बेलगाछीका अर्का चौपाया व्यापारी ३५ वर्षे विनोद झाका अनुसार गौशालमा राँगा खरिद गर्न काठमाडौंतिरका व्यापारी आउँछन् । आफू आउन नसक्नेले यतैका कारोबारीलाई पारिश्रमिक दिएर राखेका छन् । काठमाडौंबाट फोन आए बमोजिम उनीहरूले यहाँबाट राँगाभैसी किनेर पठाउँछन् ।

गौशाला बजारका चौपाया ठेकेदार इजारुलका अनुसार गोरु कारोबारको मन्दीले सुनसान बनेको चौपाया बजारमा फस्टाउँदो राँगा व्यापारले रौनक फर्काएको छ । प्रत्येक हाटको दिन ३० लाख मूल्यबराबरका २ सयदेखि ५ सय राँगाभैंसी किनबेच हुन्छ । व्यापारीकाअनुसार फस्टाउँदो रागा व्यापारका कारण नै गौशालाको चौपाया बजार (खसीबाहेक) को ठेक्का पनि बढेको छ ।

गत आवमा ५४ लाखमा लागेको चौपाया बजारको ठेक्का बढाबढमा १७ लाखबाट बढेर चालु आव (०७६/७७) का लागि ७१ लाखमा सकार भएको छ । गौशाल बजारमा भने माईस्थान–गौशाला–समसी सडक कालोपत्रे भएपछि आवागमन सहज हुदा राँगा कारोबार बढेको कारोबारीको भनाइ छ ।

प्रकाशित : भाद्र १५, २०७६ ०९:३९
पूरा पढ्नुहोस्
प्रतिक्रिया
पठाउनुहोस्