हात्ती धपाउन हवाइफायर

शंकर आचार्य

पर्सा — पथलैया–अमलेखगन्ज सडक खण्डमा हात्तीको बथान धपाउन मंगलबार राति नेपाली सेनाले करिब ५० राउन्ड हवाइफायर गरेको छ । हात्तीको बथानले हेटौंडाबाट पथलैया आउँदै गरेको मालवाहक ट्रकलाई पल्टाउन खोजेपछि सेनाले हवाई फायर गरेर धपाएको हो ।

पर्सा निकुञ्जबाट निस्केको हात्तीको बथान निकुञ्जको आधाभारस्थित कार्यालयबाट करिब १ किमि उत्तरको सडक पुग्दा ट्रक पनि त्यहीँ पुगेको थियो । चालकले ट्रक रोकेपछि हात्तीको बथानले आक्रमण गरेको थियो ।

ट्रकमा रहेको चामल खान खोजेपछि सिद्धिबक्स गणबाट खटिएका सेनाका जवानले हवाई फायर खोलेका थिए । ट्रकमा चालक र सहचालक समेत सवार रहेको र उनीहरूको ज्यानमा क्षति पुग्न सक्ने भएकाले हात्तीलाई धपाउन हवाई फायर गरिएको निकुञ्जका सूचना अधिकृत अशोक रामले बताए ।

राति ८ देखि १० बजेसम्म करिब २७ वटाको संख्यामा रहेका हात्तीको झुण्ड राजमार्ग पार गरेर निकुन्जको पूर्वीभेगतर्फ जाने प्रयासमा थियो । त्यस क्रममा राजमार्ग करिब २ घन्टा अवरुद्ध भएको थियो । राजमार्गमा दक्षिण र उत्तरतर्फ झन्डै २ सय मालबाहक तथा यात्रुबाहक सवारीसाधन रोकिएका थिए ।

हात्ती धपाउने क्रममा सेनाका एक जवान घाइते भए । हवाई फायरपछि हात्तीको बथान पुन: राजमार्गको पश्चिमतर्फ फर्किएको रामले बताए । उक्त समूह हाल निकुञ्जको आधारभारस्थित कार्यालयभन्दा करिब ४ किमि उत्तर हात्तीडण्डी भन्ने स्थानबाट करिब २ किमि पश्चिममा रहेको रामले बताए ।

हात्तीको एउटा समूह आइतबार राति नै राजमार्ग पार गरेर पूर्वतर्फ लागेको उनले बताए । यो समूह हाल राजमार्गबाट करिब १८ किमि पूर्व हल्खोरिया दह क्षेत्रमा छ । मंगलबार रातिको हात्तीको बथानबाट एउटा हात्ती छुट्टिएर निकुन्जको अमलेखगन्जस्थित हात्तीसार क्षेत्रमा बसेको रामले बताए ।

उता, सर्लाहीमा करिब ६ महिनादेखि आंतक मच्चाइरहेको २ वटा हात्ती त्यहाँबाट पश्चिमतर्फ बारास्थित निकुन्जको हल्खोरिया दह क्षेत्रमा पुगेको छ । वाग्मती, सन्तपुर, जंगलसैया सामुदायिक वन, टांगियाबस्ती हुँदै ती हात्ती हल्खोरिया दह क्षेत्रमा पुगेको रामले बताए ।

यस वर्ष निकुन्जका हात्तीले ढिलो गरी राजमार्ग पूर्व जाने प्रयास गरेको हो । सामान्यतया निकुन्जका रैथाने हात्तीको समूहले असारको पहिलो साता त्रिभुवन राजपथ छिचोलेरपूर्व रौतहट हुँदै सर्लाहीसम्मकोयात्रा गर्थे । यस वर्ष मोतिहारी–रक्सौल–अमलेखगन्ज तेल पाइप लाइनको निर्माण कार्यका लागि हात्तीकै परम्परागत पदमार्गमा रुख काटिनुका साथै पाइप लाइन पनि ओछ्याइएको छ ।

यसका साथै राजपथभन्दा करिब २० किमि पूर्व निजगढ काठमाडौं द्रुत मार्गको निर्माण पनि जारी रहेको छ । यसरी हात्तीको परम्परागत मार्गमा एकै साथ २ वटा अवरोध भएकाले उनीहरूले यस वर्ष यात्रा नगरेको हुन सक्ने अनुमान गरिएको थियो ।

हात्तीको समूहले बर्सेनि निकुन्जको आधाभार कार्यालय नजिक करिब डेढ किमि उत्तर तथा हात्तीडण्डी भन्ने स्थानबाट राजपथ छिचोल्ने गरेको छ । हात्तीडण्डी निकुन्ज कार्यालयबाट करिब ४ किमि उत्तरमा रहेको छ । हात्तीले आवागमनका लागि बर्सेनि एउटै रुट प्रयोग गर्छ ।

प्रकाशित : भाद्र ५, २०७६ १०:३८
प्रतिक्रिया
पठाउनुहोस्
ADVERTISEMENT

नगरपालिकाको केन्द्र सार्ने विवाद : अन्तरिम निर्णय सदर

कान्तिपुर संवाददाता

जनकपुर — हंसपुर नगरपालिकाका मेयर रामज्ञान मण्डलको दबाबमा गत श्रावण ३ गते हंसपुर नगरकार्यपालिकाले गरेको केन्द्र सार्ने निर्णयलाई उच्च अदालत जनकपुरले गत मंगलबार दिएको अन्तरकालीन आदेशलाई निरन्तरता दिएको छ । 

उच्च अदालत जनकपुरका न्यायाधीश गोपालप्रसाद भट्टराई र राजेश्वर तिवारीको इजलासले गत मंगलबार यसै अदालतबाट विपक्षीहरूको नाममा जारी भएको अन्तरिम आदेशलाई निरन्तरता दिने आदेश दिएको छ ।

गत मंगलबार न्यायाधीश बालकृष्ण उप्रेतीको एकल इजलासले जारी गरेको अन्तरकालीन आदेशमा हंसपुर नगरपालिका कार्यपालिकाले साउन ३ गते गरेको केन्द्र सार्ने निर्णय अगामी भदौ ३ गतेसम्म कार्यान्वयन नगरी यथास्थितिमा राख्न अन्तरकालीन अन्तरिम आदेश जारी गरेको थियो ।

साउन ३ गते सम्पन्न नगरकार्यपालिका बैठकले बघचौडास्थित नगरपालिका केन्द्रको समानान्तर हंसपुर चोकमा कार्यालय स्थापना गर्ने तथा साविक केन्द्र बघचोडामा रहेको कागजपत्र हंसपुरस्थित समानान्तर कार्यालयमा सार्ने निर्णय गरको थियो ।

नगरकार्यपालिकाको यो निर्णयविरुद्ध भरत सहनीलगायतले उच्च अदालत जनकपुरमा उत्प्रेक्षण मिश्रित परमादेश मुद्दा दायर गरेका थिए । मुद्दाको पक्षमा अधिवक्ता चन्द्रकुमार शर्मा र बलराम सुवेदीले वहस गरेका थिए । प्रतिपक्षीको तर्फबाट वरिष्ठ अधिवक्ताद्वय विनोद शर्मा र नागेन्द्र लाभ कर्णले वहस गरेका थिए ।

मुद्दा सुनुवाई गर्ने क्रममा न्यायाधीशद्वय भट्टराई र तिवारीले नेपाल सरकारबाट मिति २०७४ जेठ ११ गतेमा सूचना प्रकाशित गरी हंसपुर नगरपालिका २ को बघचौडामा केन्द्र स्थापना गरेको र हालसम्म कानुनबमोजिम सो केन्द्र परिवर्तनको निर्णय नभएकाले उच्च अदालत नियमावली २०७३ को नियम ४२ बमोजिम अन्तरिम आदेश जारी गरिदिएको उल्लेख गरेका छन् ।

स्थानीय तहको निर्वाचन सम्पन्न भए लगतै एउटै पार्टी राष्ट्रिय जनता पार्टीबाट विजयी मेयर मण्डल र उपमेयर रेणुकुमारी झाबीच केन्द्र सार्ने विषयमा विवाद सृजना भएको थियो । मेयर मण्डल बघचौडास्थित नगरपालिकाको केन्द्र सार्ने लविङ सुरु गरेका थिए भने उपमेयर यसको विपक्षमा उभिएकी थिइन ।

पछिल्लो पटक मेयर मण्डलको दबाबमा हंसपुर बेलही चोकमा समानान्तर कार्यालय सञ्चालन गरिएको छ । उपमेयर रेणु कुमारी झाले अदालतको आदेश पछि हंसपुरमा सञ्चालन गरिएको समानान्तर कार्यालय बन्द हुने विश्वास गरेकी छन् ।

प्रकाशित : भाद्र ५, २०७६ १०:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT