सुनकोसी–मरिन डाइभर्सनको डीपीआर अन्तिम चरणमा

कान्तिपुर संवाददाता

रौतहट — राष्ट्रिय गौरवको आयोजना सुनकोसी–मरिन डाइभर्सनको विस्तृत अध्ययन प्रतिवेदन (डीपीआर) अन्तिम चरणमा पुगेको छ । डीपीआर तयार भएपछि आयोजनाको काम कसलाई जिम्मा दिने भन्ने प्रक्रिया अघि बढाइनेछ । 

आयोजना सम्पन्न भएपछि तराई–मधेसमा सिँचाइ सुविधा पर्याप्त हुनेछ । जलविद्युत् उत्पादन गर्नु पनि डाइभर्सनको लक्ष्य हो । तराई/मधेसका रौतहट, सर्लाही, महोत्तरी, बारा र धनुषाका कुल १ लाख २२ हजार हेक्टर खेतीयोग्य क्षेत्रलाई सिँचाइ सुविधा पुर्‍याउने आयोजनाको उद्देश्य रहेको सुनकोसी–मरिन डाइभर्सन आयोजना प्रमुख सुशील आचार्यले बताए । ‘अहिले डाइभर्सनको विस्तृत अध्ययन प्रतिवेदन (डीपीआर) को काम अन्तिम चरणमा पुगेको छ । यसपछि दाता खोज्ने वा सरकारले नै निर्माण गर्ने निष्कर्षमा पुग्छौं,’ उनले भने ।

डीपीआरको काम पनि एक महिनाभित्र सकिने उनले बताए । डीपीआर तयार पार्ने जिम्मा इ–टेक कन्सलटेनलाई दिइएको छ । सुनकोसीको पानी डाइभर्सनपछि मरिना नदीमा मिसाउन कमलामाई २ कुसुमटार फाँटमा खसालिनेछ । त्यसपछि मरिना नदी हुँदै ४२ किलोमिटर दूरीमा रहेको रौतहट/सर्लाहीस्थित बागमती बाँधमा पुर्‍याई सिँचाइको सुविधा बढाउने सरकारको लक्ष्य छ । वाग्मती सिँचाइ आयोजनाबाट रौतहट र सर्लाहीको ४२ हजार हेक्टर जमिनमा मात्र सिँचाइ हुँदै आएको छ ।

आयोजना सम्पन्न भएपछि थप ८० हजार हेक्टर जमिनमा सिँचाइ सुविधा पुग्ने देखिएको छ । डीपीआर तयार भएपछि निर्माण सम्पन्न गर्न करिब ५ वर्ष लाग्नेछ । निर्माणको ठेक्का प्रक्रिया यसै वर्षबाट सुरु हुनेछ । ठेक्का सम्झौता भएको मितिले ५ वर्षभित्र आयोजनाका मुख्य संरचनाको निर्माणको काम सक्नु पर्ने लक्ष्य लिइएको प्रमुख आचार्यले जनाए ।

सुनकोसी नदीबाट सिन्धुलीको मरिन हुँदै रौतहटको चन्द्रपुर नगरपालिका १ पौराईस्थित वाग्मती नदीमा पानी मिसाउन आयोजनाले अध्ययन थालेको थियो । यो सम्पन्न गर्न लगभग ७५ अर्ब बढी रकम लाग्न सक्ने आयोजना प्रमुख आचार्यले जनाए । आचार्यका अनुसार हाइड्रो पावरको डीपीआर भने सम्पन्न भइसकेको छ ।

सुनकोसीबाट १३.१ किलोमिटर टनेल बनाई सिन्धुलीको मरिनमा पानी झारिनेछ । त्यसपछि ४२ किमि नदीबाट वाग्मती दोभानमा मिसाइने छ । यही पानी १० किमि दक्षिण ब्यारेजमा जम्मा भएर शाखा, प्रशाखा नहरमार्फत खेतसम्म पुग्छ ।

प्रकाशित : श्रावण २६, २०७६ ०९:४१
प्रतिक्रिया
पठाउनुहोस्

मेयर–उपमेयर विवाद : दुवै ठाउँमा कार्यालय

श्यामसुन्दर शशि

जनकपुर — मेयर र उपमेयर बीचको विवादको कारण झन्डै एक महिनादेखि काम कहाँबाट सञ्चालन गर्ने ? अन्योल रहेको हंसपुर नगरपालिकामा शुक्रबारदेखि दुवै कार्यालयबाट काम सञ्चालन गर्ने सहमति भएको छ ।

जिल्ला समन्वय समिति धनुषाका प्रमुख रामदेव वनरैत तथा प्रमुख जिल्ला अधिकारी प्रदीपराज कणेलको पहलमा सर्वपक्षीय बैठकमा मेयर रामज्ञान मण्डल र उपमेयर रेणुकुमारी झाबीच कार्यालय सञ्चालन गर्ने सहमति भएको हो ।

बैठकले नयाँ कार्यालय सञ्चालन गर्न आवश्यक रहे/नरहेको तथा उपभोक्ता समितिलाई दिनुपर्ने भुक्तानीको विषयमा राय–सल्लाह दिने उद्देश्यले जिल्ला समन्वय समिति धनुषाका प्रमुख बनरैतको संयोजकत्वमा अनुगमन समिति समेत बनाएको छ ।

यसअघि उपमेयर झा साविक बघचौडास्थित कार्यालयमा बसी काम गर्दै आएका थिए भने मेयर मण्डल हंसपुरचोकमा घर भाडा लिएर सामानान्तर कार्यालय सञ्चालन गर्दै आएका थिए । साविक कार्यालयमा रहेका कागजपत्र फिर्ता लाने क्रममा गत मंगलबार बघचौडाबासी तथा सुरक्षाकर्मीबीच झन्डै तीन घन्टासम्म झडप भएको थियो । झडपमा परी आधा दर्जन घाइते भए ।

हंसपुर नपाको निर्वाचनपछि नै सुरु भएको केन्द्र सार्ने विवाद कायमै रहे पनि कार्यालय सार्ने विवादले उग्र रूप लियो । विवाद समाधान समितिमा जिससका उपप्रमुख दीपककुमार झा, हंसपुर नपाका मेयर मण्डल, उपमेयर झा, मुख्यमन्त्री कार्यालयका एकजना अधिकृत, हंसपुर नपाका प्रमुख कार्यकारी अधिकृत हरिशंकर यादवलाई सदस्य राखिएका छन् । जिसस प्रमुख बनरैतले अनुगमन समिति यथाशिघ्र काम थाल्ने अनि काम थालेको एक साताभित्र सम्पन्न गरी प्रतिवेदन बुझाउने बताए ।

नगरपालिकाद्वारा गत वर्ष ०७५/७६ र चालु आव ०७६/७७ मा सञ्चालित योजनाको भुक्तानी दिनुपर्ने विषयमा प्राविधिक, योजना, प्रमुख प्रशासकीय अधिकृत तथा अनुगमन समितिको सिफारिसमा फरफाक गर्ने, भुक्तानी भइसकेका योजनाको त्यस अनुरूप काम भए/नभएको, आम्दानी बाँधे/नबाँधेको समेत अनुगमन समितिले हेरी कैफियत देखिन आएमा अग्रिम कारबाही उठान गर्ने, कार्यालयका कागजातको सम्पूर्ण जिम्मेवारी प्रमुख कार्यकारी अधिकृतलाई दिने तथा कार्यालय सार्ने क्रममा भएको झडपमा परी घाइते भएकाहरूको उपचार खर्च तथा क्षतिग्रस्त बनेको सशस्त्र प्रहरीको सवारी साधानको मर्मत खर्च हंसपुर नपाले बेहोर्ने निर्णय पनि भएको छ ।

प्रकाशित : श्रावण २६, २०७६ ०९:४०
पूरा पढ्नुहोस्
प्रतिक्रिया
पठाउनुहोस्