‘संघीय सरकारले बखेडा गर्दैछन्’

कान्तिपुर संवाददाता

धनुषा — प्रदेश २ का मुख्यमन्त्री लालबाबु राउतले प्रदेशमा औद्योगिक वातावरण निर्माणका लागि संघीय सरकारले अप्ठ्यारा परिस्थिति सिर्जना गरेको आरोप लगाएका छन् । 

आइएलओले बुधबार जनकपुरमा गरेको कार्यक्रममा मुख्यमन्त्री राउतले प्रदेश सरकार औद्योगिक विकासका लागि पहल सुरु गरे पनि संघीय सरकारले समयमा आवश्यक ऐन–कानुन निर्माण नगरिदिँदा समस्या भएको बताए । प्रदेश सरकारले प्रदेशमा लगानी गर्ने उद्योगलाई २० वर्षसम्म कर छुट, जग्गाको व्यवस्थापन गर्ने नीति अघि सारे पनि संघीय सरकारका मन्त्रीहरूले विभिन्न बखेडा झिकेर प्रदेशको अधिकार क्षेत्रभित्र हस्तक्षेप गर्न खोजेको उनले गुनासो गरे ।
मुख्यमन्त्री राउतले प्रदेश २ का युवाहरू रोजगार नपाएर खाडी मुलुकमा जान बाध्य भएकाले उनीहरूलाई रोजगारमूलक तालिम दिएर साना व्यवसाय सञ्चालनमा सक्षम बनाउन प्रदेश सरकारले ठोस योजनाका साथ अघि बढेको र त्यसको परिणाम केही दिनभित्रै देखिने दाबीसमेत गरे ।

प्रकाशित : श्रावण २२, २०७६ २०:२२
प्रतिक्रिया
पठाउनुहोस्

४२ हजार नक्कली नोटसहित पक्राउ

कान्तिपुर संवाददाता

उदयपुर — नेपाली ४२ हजार नक्कली नोटसहित बुधबार चौदण्डीगढी नगरपालिका ५ सिवाईबाट एक किशोर पक्राउ परेका छन् ।

सिवाई बजारको एक पसलमा मोबाइल रिर्चाज र अन्य वस्तु खरिद गर्ने क्रममा नक्कली भएको शंका लागेपछि स्थानीय १६ वर्षीय मोहम्द अनिल मियाँ पक्राउ परेका हुन् । पसलले नोट नक्कली भएको शंका लागेर प्रहरीलाई खबर गरेको थियो ।

प्रहरीले नोटको कारोबार गरिरहेको अवस्थामा अनिललाई पक्राउ गरेको हो । किशोरले हजार रुपैयाँका विभिन्न वस्तु खरिद गरेको, दुई हजारको दुईटा नोट नक्कली भन्दै आफैंले च्यातेको र घरमा लुकाएर राखेको हजार दरका ३९ हजार रुपैयाँ नक्कली नोट बरामद गरेको इलाक प्रहरी कार्यालय बेल्टारले जनाएको छ ।

४२ हजार नक्कली नोटसहित पक्राउ परेका मियालाई नियन्त्रणमा लिई थप अनुसन्धान गरिरहेको प्रहरी उपरीक्षक वीरबहादुर बुढामगरले बताए । इलाक प्रहरी कार्यालय सुन्दरपुरदेखि करिब ५ सय मिटरको दूरीमा घर भएका मिया मंगलबार मात्रै सप्तरीमा रहेका आफन्तको घरबाट आएका थिए । उनका काकाका छोरा दाजुसँग भेटेर आएपछि नक्कली नोटको कारोबार भएको प्रहरीले जनाएको छ ।

प्रकाशित : श्रावण २२, २०७६ २०:१४
पूरा पढ्नुहोस्
प्रतिक्रिया
पठाउनुहोस्