मालपोत र नापी कुर्दै सिम्रौनगढ

लक्ष्मी साह

बारा — सरकारले दुई तले भवन भाडामा लिएको छ । भवनमा भूमिसुधार तथा मालपोत कार्यालयको साइन बोर्ड पनि झुण्ड्याइएको छ । दराज, कुर्सी, टेबल र स्रेस्ता समेत कार्यालयमा राखिएको छ । तर, त्यहाँबाट सेवा दिन भने तदारुकता देखाइएको छैन ।

एक वर्षदेखि मासिक ५४ हजारका दरले भाडा तिर्दै आए पनि सेवाग्राहीले सेवा भने पाउन सकेका छैनन् । सरकारले नापी र मालपोत कार्यालय सिम्रौनगढमा राख्ने निर्णय गर्दा स्थानीय भैरवप्रसाद जयसवाल निकै हौसिएका थिए । कार्यालय स्थापना हुने निर्णय सुनेर सिम्रौनगढ नगरपालिका–८, कचोर्वाका भैरवले ५ लाखभन्दा बढी खर्चेर बजारमा होटल व्यवसाय सुरु गरे ।

होटल सञ्चालन गर्दाको हौस्याइ धेरै दिन टिकेन । न कार्यालय सञ्चालन भयो न ग्राहक आए । यतिबेला उनी निराश छन् । ‘खोई कहिले आउँला मालपोत र नापी कार्यालय ? कुर्‍याकुर्‍यै छौं,’ उनले भने, ‘लगानी अनुसारको कमाइ छैन । कार्यालय सञ्चालनमा नआएपछि होटलमा बिक्री छैन ।’

सरकारले जिल्लाको सिम्रौनगढ बजारमा नापी शाखा र मालपोत कार्यालय स्थापना गर्ने निर्णय गरेको ३ वर्ष नाघिसक्यो । सर्वसाधारणको आन्दोलनपछि सरकारले गरेको त्यो निर्णय अझै कार्यान्वयनमा आएको छैन । साविकका २७ वटा गाविसका सेवाग्रही अझै सदरमुकाम कलैया धाउने बाध्य छन् । सरकारले त्यसैताका उक्त निर्णयसँगै जिल्लाको सिमरा र रौतहटको मौलापुर तथा चन्द्रपुर नगरपालिकामा तिनै दुइवटा कार्यालयराख्ने निर्णय गरेको थियो ।

त्यहाँ १ वर्षदेखि कार्यालय सञ्चालन भएका छन् । कार्यालय सञ्चालनले सुविधा पुगेको सेवाग्रहीको प्रतिक्रिया छ । तर, सदरमुकाम कलैयादेखि २५ किमि पूर्वदक्षिणमा पर्ने जिल्लाको सुदूर ठाउँ, जो दसगजासित जोडिएको छ, त्यहाँ दुवै कार्यालय अझै पुग्न सकेका छैनन् । सिम्रौनगढमा ती कार्यालय राख्ने निर्णय कागजमै सीमित छ ।

‘कार्यालयको भवन र बोर्ड मात्र हेर्छु, कार्यालयबाट सेवा छैन,’ सिम्रौनगढ नगरपालिकाका प्रमुख वीजयशंकर यादवले भने, ‘सरकारलाई सेवाग्रहीको पीडा र आफैंले गरेको निर्णयको वास्ता छैन । कराउँदा कराउँदै थाकिसक्यौं ।’ प्रमुख जिल्ला अधिकारीदेखि मन्त्रालयसम्म पुगेर कार्यालय स्थापनाका लागि पटकपटक संवाद गरेको २ वर्ष नाघे पनि कसैले नटेरेको उनले बताए ।

‘दुई तले भवन छ, नजिकै इलाका प्रहरी कार्यालय छ । असुरक्षा पनि छैन, तर किन र कसरी कार्यालय सञ्चालन हुँदैन, बुझ्न गाह्रो छ,’ उनले भने । ‘सरकारी सेवालाई सहज बनाउन र सेवाग्रहीको पहुँच सरकारी सेवामा पुर्‍याउन कार्यालय स्थापनाको निर्णय भयो, तर कर्मचारी अभाव, विद्युत र इन्टरनेटको समस्याले सेवा दिन सकेका छैनौं, भाडा मात्र दिएका छौं,’ भूमिसुधार तथा मालपोत कार्यालयका प्रशासन प्रमुख कौशल झाले भने ।

उनका अनुसार सरकारले २०७२ सालमा मालपोत र नापी कार्यालयको सेवा केन्द्र खोल्ने निर्णय गरेको थियो । ‘घरभाडा मात्र दिएर सरकारी खर्च बढेको छ,’ उनले भने, ‘सेवाग्राहीले सेवा पाउन सकिरहेका छैनन् । सम्बन्धित निकायले ध्यान दिन जरुरी छ ।’ प्रमुख जिल्ला अधिकारी राजेश पौडेल जनशक्ति अभावले सेवा दिन नसकिएको बताउँछन् ।

प्रकाशित : श्रावण २०, २०७६ ०९:४३
ADVERTISEMENT
प्रतिक्रिया
पठाउनुहोस्

वाग्मतीको जल मढियामा

ओमप्रकाश ठाकुर

सर्लाही — साउन महिनाको आइतबार र सोमबार शिवालयमा चढाउने जल लिनका लागि वाग्मती नदीमा शनिबार हजारौं भक्तजनको घुइँचो लागेको छ । 

पवित्र नदीको जल चढाए मनले चिताएको पुग्ने विश्वासका साथ जल लिन भक्तजनको भिड लागेको हो । विशेष गरी भारतको सीतामढीस्थित मढिया मन्दिरमा चढाउने जल लिनका लागि वाग्मती नदीमा भक्तजनको भिड लाग्ने गरेको छ ।

मढिया मन्दिरमा आइतबार र महोत्तरीको टुटेश्वर मन्दिरमा सोमबार जल चढाइन्छ । हजारौं तीर्थयात्रीको भिडले वाग्मती सहित पूर्व–पश्चिम राजमार्ग तथा सदरमुकाम मलंगवा जाने सडक अस्तव्यस्त बन्ने गरेको छ ।

पालना भएन ट्राफिक नियम
तीर्थयात्राका नाममा बिना हेल्मेट ४ जनासम्म चढेर सयौं मोटरसाइकल अनियन्त्रित ढंगले कुदाइँदा पूर्व–पश्चिम राजमार्ग तथा नवलपुर–मलंगवा सडकखण्ड आसपासका बासिन्दा शनिबार राति त्रसित बनेका थिए । राजमार्गमा तीर्थयात्रीसहित सवारीसाधनको भीड व्यवस्थापन गर्न प्रहरीलाई हम्मे परेको थियो ।

पैदल तथा मोटरसाइकलमा सवार बोलबम तीर्थयात्री तथा तीर्थयात्री चढेर वाग्मतीसम्म आएका ट्रयाक्टर, टेम्पो र मोटरसाइकल पार्किङले वाग्मती नदी किनारसहित सदरमुकाम मलंगवासम्मकै सडक अस्तव्यस्त बनेको थियो । शनिबार राति राजमार्गको वाग्मती र लखनदेही पुलमा घन्टौंसम्म जाम लागेको थियो ।

एकैदिन हजारौं तीर्थयात्री आएकाले व्यवस्थापनमा निकै कठिनाइ भएको बोलबम सेवा समिति वाग्मतीका अध्यक्ष जय गोलेले बताए । साउन महिनाभर वाग्मती नदीमा जल लिनका लागि ५ लाख हाराहारीमा भक्तजन आउने गरेको समितिको दाबी छ । वाग्मतीमा भारतीय भक्तालु सहित सर्लाही, महोत्तरी, रौतहट, सिन्धुली लगायत जिल्लाबाट बोलबम भक्तजन जल लिन आउने गरेका छन् ।

बोलबमका नाममा विकृति
भक्तजनको भिड लाग्ने वाग्मतीमा बोल बमको नाममा विकृति पनि देखिएको छ । भक्तजनले जल लिइरहँदा नक्कली भारतीय बोल बमले रक्सी खाने र घर लिएर फर्कने गरेको पाइएको छ । नेपालमा मदिराजन्य पदार्थ खुला सेवन गर्न पाइने भएका कारण भारतीय युवा बोल बमको भेष धारण गरेर वाग्मती आउने गरेका हुन् ।

शनिबार पहेंलो वस्त्र धारण गरेका नक्कली बोल बमहरूको राजमार्गको छेउछाउका कोल्डस्टोर र होटेलमा घुइँचो लागेको थियो । बोल बमको भेषमा आउँदा जाँच नहुने भएका कारण मदिराजन्य पदार्थको कारोबार फस्टाएको छ । रक्सीसँगै अवैध मानिएको गाँजा समेत बाले बमले झोलामा राखेर भारत पुर्‍याउने गरेको स्थानीय बताउँछन् ।

बागमती नदीमा आएका भक्तजनमध्ये अधिकांश युवा युवती छन् । गाउँघरमा कडाइ महसुस गरेका युवायुवती बोलबमको बहानामा रमाइलो गर्ने पनि छन् । जल लिन आउने अधिकाँश मोटरसाइकलमायुवायुवतीको जोडी देखिन्छ ।

ट्रयाक्टरको ठक्करबाट तीर्थयात्रीको मृत्यु
नवलपुर–मलंगवा सडक खण्ड अन्तर्गत कविलासी ७ मा ट्रयाक्टरको ठक्करबाट शनिबार राति एक बोलबम यात्रीको मृत्यु भएको छ । चक्रघट्टा गाउँपालिका–९ का हृदय दासकी १७ वर्षर्यीा छोरी रामशिला गम्भीर घाइते भएकी थिइन् ।

वाग्मतीबाट जल लिएर भारतको मढिया मन्दिरमा चढाउनका लागि मोटरसाइकलमा जाँदै गर्दा दास चढेको बीआर३०भी ७१८७ नम्बरको मोटरसाइकललाई बोलबम तीर्थयात्री चढेकै ट्रयाक्टरले ठक्कर दिएको थियो ।

दासलाई जिल्ला अस्पतालमा प्राथमिक उपचार गरी थप उपचारका लागि वीरगन्जतर्फ लाने क्रममा बाटैमा मृत्यु भएको जिल्ला प्रहरी कार्यालयले जनाएको छ । ठक्कर दिने बोलबम तीर्थयात्री बोकेको ट्रयाक्टर फरार छ ।

प्रकाशित : श्रावण २०, २०७६ ०९:४२
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×