भन्सार असुली घट्यो

कान्तिपुर संवाददाता

महोत्तरी — जलेश्वर भन्सार कार्यालयले आव ०७५/७६ मा लक्ष्यबमोजिम राजस्व संकलन गर्न सकेन । यस अवधिको लक्ष्य २ अर्ब ६८ करोड ९१ लाख तोकिएको थियो । असुली भने २ अर्ब ४२ करोड २२ लाख मात्र हुन सक्यो । यो असुली लक्ष्यको ९० प्रतिशत हो । 

ZenTravel

जलेश्वर भन्सारमा विगत ५ वर्षदेखि लक्ष्यको दोब्बर संकलन गर्दै आएको थियो । भन्सार छलेका सामान पक्राउ गर्ने र सीमा तस्करीबारे व्यापारीलाई सर्तक गराउँदै आएकाले राजस्व असुलीमा वृद्धि हुने भन्सारकर्मीले जनाउँदै आएका थिए । यही सक्रियताका कारण आव ०७४/७५ को यसै अवधिमा लक्ष्यको १ सय २२ प्रतिशत बढी अर्थात २ अर्ब ५९ करोड राजस्व असुली भएको उनीहरूको भनाइ छ ।

Meroghar


आव ०७५/७६ मा घटेको असुलीलाई भन्सारकर्मीले अस्वाभाविक मानेका छैनन् । यो अवधीमा असुली घटेको नभई लक्ष्य नै बढी भएको उनीहरूको जिकिर छ । प्रमुख भन्सार अधिकृत केशव भण्डारीले लक्ष्य घटनुको पछाडि आयात व्यापारमा ह्रास, वर्षा बाढी र डुवान, जर्जर सडक, विषादी परीक्षणजस्ता विविध कारण रहेको बताए ।

उनकाअनुसार जलेश्वर भन्सारले इन्धन आयातबाट सबैभन्दा बढी राजस्व असुल्दै आएको थियो । भारतको बरौनीबाट आयात हुने पेट्रोलियमबाट जलेश्वर भन्सारले ७० प्रतिशत राजस्व असुल्दै आएको थियो । गएको वर्ष रकसौलमा उत्पन्न ट्राफिक समस्याका कारण वीरगन्ज नाकामा जाने पेट्रालियम पनि केही समय जलेश्वर भन्सारबाटै पास भएका थिए । त्यो कारण यहाँको असुलीमा अप्रत्यासित वृद्धि देखियो । आव ०७५/७६ सम्म आइपुग्दा त्यताको ट्राफिक समस्या समाधान भयो र यताबाट पेट्रोलियमको आयात पनि घट्यो ।

असुली बढनुको वस्तुगत विश्लेषण नगरी वृद्धि भएको अंकका आधारमा आव ०७५/७६ को लक्ष्य तोकिनाले असुली चुनौतीपूर्ण बनेको उनको जिकिर छ । अर्कोतर्फ जलेश्वर भन्सार रुटमा पर्ने नेपाली तथा भारतीय क्षेत्रमा जर्जर सडक, कमजोर पुल र साँगुरो डाइभर्सनका कारण २२ चक्के २८ चक्के ठूला मालवाहक आाउन छाडेका छन् ।

‘आव ०७५/७६ को लक्ष्य भेटन बाधा पुर्‍यो,’ भण्डारीले भने, ‘त्यसपछि असार अन्तिम साताको बाढीले र डुवानले असुलीलाई शून्यमा झारेपछि अशुली ९० प्रतिशतमा सीमित हुन गएको हो ।’ भन्सार कार्यालयकाअनुसार पेट्रोलियमपछि खाधान्न, निर्माण सामग्री र औधोगिक कच्चा पदार्थबाट करिब ३० प्रतिशत असुली भएको छ ।

महोत्तरीबाट हुने निर्यात ब्यापार भने विगत ३ वर्षले शून्यमा झरेको छ । यसअगि यहाबाट सुठो, पिना, पाते चिराइतो, सुनाखरी, अमरिसो, वावियो, रुद्राक्ष, हरियो तरकारी, खाधान्न, प्लाष्टिक पाइप लागायतका नेपाली सामान निकासी हुने गरेका थिए ।

प्रकाशित : श्रावण ३, २०७६ ०९:५९
ADVERTISEMENT
प्रतिक्रिया
पठाउनुहोस्

१ खर्ब ८० अर्ब राजस्व संकलन

कान्तिपुर संवाददाता

पर्सा — मुलुकको आर्थिक राजधानी वीरगन्जका २ भन्सारले गत आर्थिक वर्षमा करिब १ खर्ब ८० अर्ब रुपैयाँ राजस्व संकलन गरेका छन् । वीरगन्ज/आईसीपी र सिर्सिया सुक्खा बन्दरगाहले गरी उक्त राजस्व संकलन गरेका हुन् । 

यो मुलुकका सम्पूर्ण भन्सारले संकलन गर्ने राजश्वको झन्डै आधा हिस्सा हो । वीरगन्ज भन्सार कार्यालय एक्लैले १ खर्ब ४७ अर्ब ५० करोड रुपैयाँ संकलन गरेको छ । सुक्खा बन्दरगाह भन्सारले ३२ अर्ब २५ करोड रुपैयाँ राजस्व संकलन गरेको छ । राजस्व संकलनका दृष्टिले वीरगन्ज भन्सार मुलुककै प्रमुख भन्सार हो ।

सुक्खा बन्दरगाह भन्सार पनि उत्कृष्ट ५ भित्रै पर्छ । दुवै भन्सारले धेरै राजस्व संकलन गरे पनि वार्षिक राजस्व असुली लक्ष्य भेट्टाउन भने दुवै असफल भएका छन् । वीरगन्ज भन्सार कार्यालयले गत आवका लागि १ खर्ब ७१ अर्ब रुपैयाँ राजस्व असुली लक्ष्य पाएको थियो । बन्दरगाह भन्सारले ३६ अर्ब ९ करोड रुपैयाँ असूली गर्नु पर्थ्यो । वीरगन्ज भन्सारले लक्ष्यको ८५ दशमलव ५७ प्रतिशत र बन्दरगाह भन्सारले ८९ दशमलव ३६ प्रतिशत राजस्व असुली गरेको छ ।

समग्रमा आयात घटेको तथा राजस्वमा योगदान गर्ने केही वस्तुको आयात घटेकाले लक्ष्य अनुरूपको राजस्व असुली हुन नसकेको भन्सार अधिकारीहरू बताउँछन् । सुक्खा बन्दरगाह भन्सार कार्यालयका प्रमुख उमेश श्रेष्ठले अघिल्लो आर्थिक वर्षभन्दा गत आवमा लक्ष्य नै बढी रहेकाले लक्ष्य भेट्टाउन हम्मेहम्मे भएको बताए ।

‘अघिल्लो आवभन्दा गत आवमा लक्ष्य नै करिब ३२ प्रतिशत बढी थियो,’ उनले भने, ‘तैपनि अघिल्लो आवभन्दा गत आवमा बढी नै राजस्व संकलन भएको छ ।’ समग्रमै व्यापार घटेको तथा चिनी र केहीव्यापारिक वस्तुको आयात घट्नु तथा इसीटीएस प्रणाली लागू भएपछि कोलकाता भन्सारका कस्टम हाउस एजेन्टको हडतालले पनि राजस्व असुली प्रभावित भएको हो ।

वीरगन्ज भन्सार कार्यालयका सूचना अधिकृत मनीष महतो पनि समग्र आयात घटेकाले त्यसको असर राजस्व असूलीमा परेको बताउँछन् । ‘राजस्वमा योगदान गर्ने मुख्य वस्तु मोटरसाइकल र जिप, कार, भ्यानको आयात वैशाखदेखि नै घटेको हो,’ उनले भने, ‘यसबाहेक केही औद्योगिक कच्चा पदार्थको आयात पनि घट्न गएकाले त्यसको नकारात्मक असर राजस्व असुलीमा परेको हो ।’

प्रकाशित : श्रावण ३, २०७६ ०९:५७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×