पीडितको समस्या नसुनी फर्कियो मन्त्रीको जम्बो टोली

शिव पुरी

रौतहट — बाढी प्रभावित जिल्लाको स्थलगत निरीक्षण गर्न आएका मन्त्री र पूर्वप्रधानमन्त्री सहितको टोली बुधबार पीडितलाई नभेटी राजधानी फर्किएको छ । उनीहरू हेलिकप्टरबाट आएर गौरको पुरेनवास्थित सेनाको गणमा स्थानीय प्रशासनसँग क्षति र बाढीको अवस्था बुझेर फर्किएका हुन् ।

ZenTravel

टोलीको हेलिकप्टर अवतरण भएको स्थानबाट बाढीपीडित बसेकाहरु नजिकै थिए।

पूर्वप्रधानमन्त्री तथा नेकपाका वरिष्ठ नेता माधवकुमार नेपाल, उपप्रधान एवं स्वास्थ्यमन्त्री उपेन्द्र यादव, गृहमन्त्री रामबहादुर थापा, भौतिक पूर्वाधार तथा यातायात मन्त्री रघुवीर महासेठ, ऊर्जा तथा जलस्रोत मन्त्री वर्षमान पुन, विकास समितिका सभापति कल्याणी खड्का, राजपा अध्यक्ष मण्डलकासदस्य अनिल झा, नेकपाका प्रदेश २ का संयोजक प्रभु साह लगायतको टोली बाढी प्रभावित क्षेत्रको स्थलगत अवलोकनका लागि आएका थिए।

राजधानीबाट सेनाको हेलिकप्टर लिई आएको टोली पुरेनवास्थित इन्द्र बक्स गणमा ओर्लिएको थियो। त्यही सुरक्षा निकायका प्रमुखसहित सरोकारवाला निकायका प्रमुखलाई बोलाएर बाढी र डुबानबाट भएको क्षतिको जानकारी र विवरण लिएर फर्किएका हुन्। उनीहरू हेलिकप्टरबाट ओर्लनासाथ सबै भन्दा पहिला सामूहिक तस्बिर खिचाए। त्यसपछि सिधै सेनाको गणस्थित माथिल्लो तल्लामा गए।

त्यहाँ प्रमुख जिल्ला अधिकारी किरण थापाले टोलीलाई बाढी र डुबानबारे जानकारी गराए। उनले सांसद विकास कोषको रकम जथाभावी बाटोमा खर्च गरेर समस्या ल्याएको भनेपछि सांसद झाले कुन सांसदको रकम कहाँ दुरुपयोग भयो भनेर प्रतिवाद गरे। बैठकमा केहीबेर रस्साकसी भयो।

गृहमन्त्री थापा चुपचाप सुनिरहे। प्रजिअ थापाले बाढी र डुबानबाट सबैभन्दा धेरै ईशनाथ नगरपालिकाको बन्जाराहा र दुर्गभगवती गाउँपालिकाको सबै वडा प्रभावित भएको सुनाए। उनले स्वास्थ्यमन्त्री यादवलाई चिकित्सकको अभाव भएको भन्दै ध्यानाकर्षण गराएका थिए।

भौतिकमन्त्री महासेठले बाढीबाट सडकको क्षतिको विवरण लिएका थिए। ऊर्जामन्त्री पुनले बाढीबाट विद्युत् क्षेत्रमा भएको क्षतिको विवरण लिए। पूर्वप्रधानमन्त्री नेपालले गौर नजिकको पुल निर्माण सम्पन्न हुन नपाउँदै चर्किएको भनेर डिभिजन सडकको ध्यानाकर्षण गराएका थिए।

टोलीलाई जिल्लाको वस्तुस्थितिबारे जानकारी गराइएपछि फर्कनेक्रममा मन्त्री थापाले वर्षाबाट हुने क्षति र डुबानको पूर्व तयारीमा केही कमी भएको बताए। उनले अब पुनर्निर्माण र राहतमा सरकार केन्द्रित हुने जानकारी दिए। फर्कने बेला पुनः सामूहिक तस्बिर लिए।

टोली सुरुमा ईशनाथ नगरपालिकास्थित बाढीबाट डुबानमा परेका बन्जाराहा गाउँ जाने योजना थियो। सुरक्षा निकायले डुंगाबाट जानुपर्ने र जोखिम हुने भएपछि गएनन्। गौर ,पिप्राभलोहिय र बडहर्वामा रहेका विस्थापितहरुलाई भेट्नसमेत मन्त्री गएनन्।

हेलिकप्टरबाट एक चक्कर लगाएर फर्किए। डुबान र बाढीबाट प्रभावित क्षेत्र निरीक्षण गर्न आएका मन्त्रीको जम्बो टोली पीडितको समस्या नसुनी फर्कियो। पूर्वप्रधानमन्त्री एवं कांग्रेस सभापति शेरबहादुर देउवा पनि बाढी र डुबानबारे जानकारी लिन रौतहट आएका छन्।

प्रकाशित : श्रावण १, २०७६ १६:५४
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

किन सरुवा भए विमानस्थल अध्यागमनका अधिकृत ?

जनकराज सापकाेटा

काठमाडौँ — अध्यागमन विभाग डिल्लीबजार कार्यालयले विमानस्थल अध्यागमनका एक अधिकृतलाई रातारात सरुवा गरिदिएको छ । मंगलबार डिल्लीबजार कार्यालयले विमानस्थलमा काम गरिरहेका कमल आचार्यलाई जिल्ला प्रशासन कार्यालय सिरहा सरुवा गरिदिएको हो ।

गत सोमबार कतारबाट काठमाडौं ओर्लिएका सुरेश गुरुङलाई विमानस्थलस्थित अध्यागमन विभागका अधिकृत आचार्यले आगमन छाप हान्दिएका थिए। उक्त छाप हानिसकेपछि मात्रै विमानस्थलबाट बाहिरन पाइन्छ।

कतारबाट फर्केका गुरुङ तिनै व्यक्ति हुन्-जो प्रहरीको अन्तर्राष्ट्रिय संगठन (इन्टरपोल) ले खोजी गरिरहेको थियो। उनलाई नेपाल प्रहरीको अनुरोधमा इन्टरपोलले गत जेठ १७ गते डिफ्युजनको नोटिस जारी गरेको थियो। इन्टरपोलले नोटिस जारी गरेको व्यक्तिलाई विमानस्थलमै समाउनुपर्नेमा आगमन छाप लगाएर बाहिरन सघाउ पुर्‍याएको भन्दै आचार्यलाई कारबाहीस्वरुप सिरहा सरुवा गरिएको हो।

विभागमा महानिर्देशक ईश्वरी पौडेलले भने, 'समाउनु पर्ने व्यक्तिलाई बाहिरिन किन छाप हानियो अनुसन्धान जारी छ।'गुरुङ विमानस्थलबाट बाहिरिएर गोंगबुमा बसेको सुराकीको आधारमा हिजो मंगलबार मित्रनगरबाट प्रहरी परिसरको विशेष ब्युरोको टोलीले पक्राउ गरेको थियो।

गुरुङमाथि कतारमा बसेर एक युवतीलाई सामाजिक सञ्जाल फेसबुक र इमोमा अश्लिल तस्बिर र म्यासेज पठाएको आरोप छ। तीनै युवतीले गुरुङविरुद्ध उजुरी दिएकी थिइन्। गुरुङले युवतीलाई मात्रै नभइ युवतीका अभिभावकलाई समेत धम्क्याएको उजुरीमा छ। उनी केही वर्षअघि वैदेशिक रोजगारीको सिलसिलामा कतारमा गएका थिए।

गुरुङलाई पक्राउपछि थप अनुसन्धान जारी गरिराखिएको प्रहरीले जनाएको छ।

प्रकाशित : श्रावण १, २०७६ १६:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×