गण्डकमा पानी आउन डेढसाता लाग्ने

शंकर आचार्य

पर्सा — ओरिया खोलाको भेल पसेर क्षति पुगेको गण्डक नहरमा पानी आउन एकदेखि डेढसाता लाग्ने भएको छ । नारायणी सिँचाइ व्यवस्थापन कार्यालयका प्रमुख इन्जिनियर राजेन्द्रप्रसाद साहले मर्मतमा कम्तीमा एक साता लाग्ने र त्यसपछि भारतले पानी छोडेपछि नेपाल आइपुग्न कम्तीमा पनि ३ दिन लाग्ने बताए ।

भारतीय पक्षले नहरमा नेपालतर्फ आउने पानीको रेगुलेटरको ढोका बन्द गरेपछि गण्डक नहरमा क्षति भएको हो । पर्सा र बारा जिल्लामा गरी ४ स्थानमा नहरको किनार फुटेर क्षति भएको छ । नहरको उत्तरी किनारमा क्षति भएकाले मर्मत गर्न अप्ठेरो नहुने साह बताउँछन् । तत्कालै नहरमा पानी प्रवाह गर्न नहरको किनारमा आली बनाएर पनि काम चलाउन सकिने उनले बताए । पछि बजेट प्राप्त भएपछि दीर्घकालीन मर्मत गर्न सकिने उनले बताए ।

हाल नहरको कमाण्ड क्षेत्रमध्ये पर्सामा ६० र बारामा करिब ५० प्रतिशत क्षेत्रमा रोपाइ हुन सकेको उनले बताए । हाल परेको पानीबाटै रोपाइ सम्भव भए पनि त्यसपछि धान बालीलाई सिंचित गर्न गर्न नहरमा पानी आवश्यक पर्छ ।

शुक्रबार दिउँसो करिब १ बजे भारतीय दोन कनाल कार्यालय प्रमुख शैलेन्द्रप्रसाद आफैं आई नेपाल तर्फको नहरको ढोका बन्द गरे लगत्तै त्यहाँस्थित ओरिया खोलाको पानी ओवरफ्लो भई गण्डक नहरमा प्रवेश गरेको थियो । अत्यधिक पानी प्रवाह भएर नहरमा बगेपछि त्यसले ४ ठाउँमा नहरमा क्षति गरेको छ ।

पर्साको मसिहानीमा २५ मिटर, डकैला बहुअरीमा १० मिटर, बाराको त्रिवेणीमा १५ मिटर र नकटुवामा करिब मिटर १५ नहरको किनार बग्नुका साथै नहरको सर्भिस रोडसमेत बगेको छ । भारतीय पक्षले आफ्नो भूभागमा नहरको संरचना जोगाउन नेपाल तर्फको नहरको ढोका बन्द गरेको थियो ।

ओरिया खोला नहरमा पसेपछि १ हजार १ सय देखि १ हजार २ सय क्युसेक पानी प्रवाह भएको उनले बताए । जुन नहरको क्षमताभन्दा करिब डेढ गुना बढी हो । नहरको क्षमता ८ सय ५० क्युसेक हो ।

प्रकाशित : असार ३१, २०७६ ०९:३०
प्रतिक्रिया
पठाउनुहोस्

हुलाक बैंकको निक्षेप ५ करोड

कान्तिपुर संवाददाता

पर्सा — निजी क्षेत्रका वाणिज्य बैंकको बाक्लो उपस्थिति रहेको वीरगन्जमा हुलाक बचत बैंकले पनि ५ करोडभन्दा बढी निक्षेप संकलन गरेको छ ।

जिल्ला हुलाक कार्यालयमा सञ्चालित यो बैंक शाखाले चालु वर्षको जेठ मसान्त सम्ममा गरी ५ करोड ५२ लाख ८६ हजार १ सय २ रुपैयाँ १ पैसा निक्षेप संकलनगरेको छ ।

शाखा इन्चार्ज चन्द्रदेव दासका अनुसार यस अवधिमा शाखाको आफ्नै बैंक मौज्दात ४ करोड ५० लाख ११ हजार ६ सय ५० रुपैयाँ रहेको छ ।

शाखाले १ करोड ४२ लाख २९ हजार ३ सय ६ रुपैयाँ ऋण लगानी गरेको छ । ४८ लाख १० हजार ५ सय ६० रुपैयाँ ४ पैसा नाफा गरेको छ । हालसम्म शाखामा २ हजार ३ सय २४ खातावाला ग्राहक रहेका छन् ।

सरकारी बैंक भएकाले सर्वसाधारणले विश्वस्त भई बचत गरेकाले बैंकको निक्षेप र समग्र कारोबार उत्साहजन रहेको दास दाबी गर्छन् । १ सय रुपैयाँमा खाता खोल्ने सुविधा रहेको यो बैंकमा ज्येष्ठ नागरिक तथा साधारण बचत गरी २ प्रकारका खाताको सुविधा छ । खातामा १ सय रुपैयाँ मात्र राखेर सबै निक्षेप झिक्ने सुविधासमेत रहेको छ । आफ्नो निक्षेप रकम झिक्न कुनै कागज वा सर्त गर्नु नपर्ने भएकाले पनि ग्राहकलाई यो बैंकमा कारोबार गर्न सहज हुन्छ ।

निक्षेपकर्ताले एउटा खातामा १० लाख रुपैयाँसम्म बचत गर्न सक्ने, गोपनीयता हुने र सानोदेखि ठूलो रकम पनि बचत गर्न र झिक्न सक्ने सुविधा समेत बैंकले दिएको छ । शाखाको कारोबारलाई कम्प्युटरकृत गरिएको र आफ्नै सफ्टवेयर समेत रहेकाले बैंकको सेवा प्रतिस्पर्धात्मक, गुणस्तरीय र विश्वसनीय समेत रहेको दास बताउँछन् । बैंकले आफ्ना कर्मचारी मध्ये पुरानाको ऋणलाई
निरन्तरता दिएको छ । नयाँलाई भने ऋण लगानी बन्द गरेको छ ।

प्रकाशित : असार ३१, २०७६ ०९:३०
पूरा पढ्नुहोस्
प्रतिक्रिया
पठाउनुहोस्