महोत्तरीमा पाँच दिनपछि घाम

रासस

बर्दिबास — महोत्तरीमा पाँच दिन लामो वर्षा आज मध्यान्हपछि थामिएको छ । गत बुधबारयता आज मध्यान्हपछि मात्र घाम देखिएको हो ।

आकाश उघ्रेर घाम देखिए पनि महोत्तरीवासी डुवानबाट भने अझैं आक्रान्त छन् । जिल्लाका गाउँ/नगर वर्षा र बाढीको पानीले अझै डुबेका छन् ।

पछिल्लोपटक पाँच दिनको वर्षासँगैको बाढीले जिल्लाका १५ वटै स्थानीयतहका गाउँ/नगर बस्तीका गरी ४० हजार व्यक्ति प्रभावित भएको जिल्ला दैवीप्रकोप उद्धार समितिका अध्यक्षसमेत रहेका प्रमुख जिल्ला अधिकारी उमेशकुमार ढकालले बताए ।

जिल्लामा यसपटक बाढीले बगाएर बलवा नगरपालिका–२ का ७० वर्षीय हनिफ बैठा बेपत्ता भएका छन् । अविरल वर्षासँगै आएको बाढीले पूर्व–पश्चिम राजमार्गको भब्सीपुल बगाएपछि अझै सो ठाउँमा यातायात सञ्चालन हुनसकेको छैन् । वर्षा र बाढीले धेरै नोक्सान सडक, पुल–पुलेसा र निर्माणाधीन योजनामा पुर्‌याएको छ । यसबाहेक सयौं बिघा उप्जाउ जग्गा बाढीले कटान गरेको छ ।
धेरै दिनपछिको वर्षाले पानी पर्याप्त भए पनि खेत खनजोत गर्न खेतमा जमेको बाढी पानीले अप्ठ्यारो परेको छ । अघिल्लो मध्य जेठताका राखिएको धानको ब्याड खडेरीले सकेपछि राखिएको ब्याडको बीउ अझै रोप्ने बेला पनि नभएको किसानले बताएका छन् ।

किसानलाई अहिले धेरै सकस घरपालुवा पशु बस्तुबाट भएको छ । चरणक्षेत्र पानीले डम्म भरिएपछि बस्तु डुलाउने ठाउँ नभएको र भूइँ घाँस पनि पानीले छोपिएकाले आहारा जुटाउन सकस भएको किसान बताउँछन् ।

पाँच दिनपछि घाम झुल्किँदा अब राम्ररी काम गर्न पाइने किसानको आशा छ । तर, आकाशमा बादल अझै मडारिन रहेको देखिँदा भने बाढीको त्रासदी मेटिन नसकेको सर्वसाधारण बताउँछन् ।

प्रकाशित : असार २९, २०७६ १६:१६
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

सिद्धार्थ राजमार्ग दुईतर्फी खोल्ने प्रयास 

माधव अर्याल

पाल्पा — एकतर्फी स‌ंचालनमा आएकाे सिद्धार्थ राजमार्गमा दुईतर्फी यातायात संचालन गर्न ढुंगा पन्छाउने काम भइरहेकाे छ । बिहान साढे १० बजेदेखि एकतर्फी चलेकाे राजमार्ग दुईतर्फी खुलाउनका लागि यातायात बन्द गरेर काम संचालन भइरहेकाे छ । राजमार्ग बन्द गरेर ढुंगा फोर्नु परेको जिल्ला प्रहरी पाल्पाका प्रमुख दीपेन्द्र जीसीले बताए । 

२ बजेदेखि राजमार्ग बन्द गरेर ढुंगा फोर्न लागिएको छ । ‘ढुंगा फोरेर सकेपछि राजमार्ग सुचारु हुन्छ,’ उनले भने, ‘केही समय लाग्ने र सवारी साधन गुड्दा काम गर्न नसकेपछि राजमार्ग बन्द गरेर काम गरेको हो ।’

शनिबार दिउँसो राजमार्गको तिनाउ गाउँपालिका–३, विद्युत ड्याम साइड रामापिथेकस पार्क नजिकै ढुंगासहितको ठूलो पहिरो खसको थियो । पहिरोले बगाएर एक ३१ वर्षीय निस्दी–४, मित्याल भिरपानीका घनबहादुर सुनारी मगरको घटनास्थलमै मृत्यु भएको थियो ।

पहिरोले मोटरसाइकलसहित चालकलाई तिनाउ नदी नजिक पुर्‍याएको थियो । सिद्धबाबा क्षेत्रमा पानी नपर्दासमेत ढुंगा खस्ने र पहिरो जाने भइरहेको छ ।

प्रकाशित : असार २९, २०७६ १६:०८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×